By unusuma.lk on (LK time)
තමා අත්අඩංගුවට ගැනීමේ සූදානමක් පවතින බැවින් තමන්ට අපේක්ෂිත ඇපයක් ලබාදෙන ලෙස ඉල්ලා හිටපු කම්කරු හා විදේශ රැකියා අමාත්‍ය මනුෂ නානායක්කාර ඉදිරිපත් කර ඇති ඇප අයැදුම්පතක් සම්බන්ධයෙන් කරුණු දැක්වීම සදහා එළඹෙන (20) වැනිදා අධිකරණය හමුවේ පෙනී සිටින ලෙස දන්වා අපරාධ පරීක්ෂණ දෙපාර්තමේන්තුවේ ස්ථානාධිපතිවරයාට හා සමුද්‍රීය අපරාධ විමර්ශන කොට්ඨාසේ ස්ථානාධිපතිවරයාට නොතීසී නිකුත් කරන ලෙස කොළඹ ප්‍රධාන මහෙස්ත්‍රාත් තනුජා ලක්මාලි නියෝග කරයි.
ශ්‍රී ලංකාව සහ දකුණු කොරියාව අතර කෘෂිකාර්මික හා ධීවර සේවක වැඩසටහනකට අදාළව පෙත්සම්කරු අත්සන් කර ඇති අවබෝධතා ගිවිසුමක් හා ඊ8 වීසා ගැටලුවක් සම්බන්ධව අපරාධ පරීක්ෂණ දෙපාර්තමේන්තුව තම සේවාදායකයා අත්අඩංගුවට ගැනීමේ සූදානමක් පවතින බවද නීතිඥවරු ඒ ඇප අයැදුම්පත යොමු කරමින් අධිකරණය හමුවේ සදහන් කරයි.
මෙම පෙත්සම්කරු කර ඇත්තේ ඇමැතිවරයා වශයෙන් රජයන් දෙකක් අතර අවබෝධතා ගිවිසුමක් අත්සන් කිරීම පමණක් බවත් එබැවින් ඔහුට එරෙහිව අපරාධ නඩුවක් පවත්වා ගෙන යාමට හැකියාවක් නොමැති බැවින් පෙත්සම්කරුට අපේක්ෂිත ඇපයක් නියම කරන ලෙසද නීතිඥවරු අධිකරණයෙන් ඉල්ලා ඇත.
