By unusuma.lk on (LK time)
අද (6) පාර්ලිමේන්තු සභා වාරය රැස්වූ අවස්ථාවේ සමගි ජන බලවේගයේ පාර්ලිමේන්තු මන්ත්‍රී දයාසිරි ජයසේකර මහතා අග්‍රාමාත්‍යවරියගෙන් විමසූ ප්‍රශ්නයක් අතරතුර නැගී සිටි ආණ්ඩු පක්ෂයේ ප්‍රධාන සංවිධායක නලින්ද ජයතිස්ස මහතා දයාසිරි ජයසේකර මහතා විසින් නැගූ අතුරු ප්‍රශ්නය පාර්ලිමේන්තුවේ ස්ථාවර නියෝගයන්ට පටහැනිවූ බව පැවසීය. එහිදී ඉන් කෝපයට පත් දයාසිරි ජයසේකර මහතා “Who is this bugger” යනුවෙන් විමසීය.
එමෙන්ම විපක්ෂනායක සජිත් ප්‍රේමදාස මහතා ද ස්ථාවර නියෝගයන්ට පටහැනි ප්‍රශ්නයක් නැගූ අවස්ථාවේදී ඊට බාධා කළ නියෝජ්‍ය කතානායක රිස්වි සාලි මහතාට “පොඩ්ඩක් ඉන්න මැදින් පනින්නැතුව” යනුවෙන් ප්‍රකාශ කළේය.
එම අවස්ථාවේදී නැගී සිටි සභානායක විමල් රත්නායක මහතා විපක්ෂනායකවරයාගේ එම ප්‍රකාශයට එරෙහි දැඩි විවේචනයක් එල්ල කළ අතර විපක්ෂ නායකවරයාට වහාම එම ප්‍රකාශය ඉල්ලා අස්කර ගන්නා ලෙසද සඳහන් කළේය.
එමෙන්ම ඊයේ දිනයේ යාපනය පාර්ලිමේන්තු මන්ත්‍රී අර්චුනා රාමනාදන් විසින් කථානායකවරයාට “Shame on you” යනුවෙන් ප්‍රකාශ කිරීම සම්බන්ධවද දැඩි විවේචනයක් එල්ල කළ සභානායකවරයා වැඩිදුරටත් මෙසේ පැවසීය.
“ගරු කතානායකතුමනි දැන් මේකට ගොඩක් චන්ඩි ඇවිල්ලනේ, ඊයෙ එක්කෙනෙක් කතානායකතුමාට Shame on you කියලා කෑ ගැහුවා, අද එක්කෙනෙක් ආණ්ඩු පක්ෂයේ සංවිධායකතුමාට Bugger කිව්වා. දැන් විපක්ෂ නායකතුමා ඔබතුමාට කියනවා ‘මැදට පනින්නැතුව ඉන්නවා’ කියලා. ඔක්කොටම කලින් ඔබතුමාට ඉල්ලා අස්කර ගන්නවද කියලා කියන්න.”
කෙසේවෙතත් පසුව ප්‍රතිචාර දැක්වූ විපක්ෂ නායකවරයා එම ප්‍රකාශය ඉල්ලා අස්කර ගත්තේය.
