By unusuma.lk on (LK time)
ඉදිරි දිනවලදී රථ වාහන පෙළපාලි, බීමතින් රිය පැදවීම්, අපරික්ෂාකාරී රිය පැදවීම්, අනවසර මගීන් ගෙනයෑම වැනි මාර්ග වැරදි ගැන දැඩි විමසිල්ලෙන් පසුවන බව වැඩබලන පොලිස් මාධ්‍ය ප්‍රකාශක, සහකාර පොලිස් අධිකාරී, එෆ්.යූ. වුට්ලර් සදහන් කරයි.
පසුගිය කාලයේ වාර්තා වුණු ජීවිත හානි, බරපතළ රිය අනතුරු, කලහකාරී සිදුවීම් වැනි ඛේදජනක සිදුවීම් හේතුවෙන් පාසල් ක්‍රිකට් තරග අතරතුර නීති කඩන පුද්ගලයින්ට එරෙහිව නීතිය ක්‍රියාත්මක කිරීමට පොලීසිය දැඩි විමසිල්ලෙන් පසුවන බවද වැඩබලන පොලිස් මාධ්‍ය ප්‍රකාශකවරයා සදහන් කරයි.
වැඩබලන පොලිස් මාධ්‍ය ප්‍රකාශකවරයා සදහන් කළේ,
“මේ දිනවල රටේ පවතින පාසල් ක්‍රිකට් තරගාවලි ඉතාම උණුසුම් ස්වරූපයක් ගන්නවා. ඒ පිළිබඳව නැවතත් ශිෂ්‍යයන්, ආදි සිසුන්, දෙමව්පියන් දැනුවත් කිරීමේ අවශ්‍යතාවයක් අපිට නිරීක්ෂණය වෙනවා.
පසුගිය කාලයේ වාර්තා වුණු ඛේදජනක සිදුවීම් අපි කවුරුත් දන්නවා. ජීවිත හානි, බරපතළ රිය අනතුරු, කලහකාරී සිදුවීම් වගේ දේවල්. පොලීසිය මේ ගැන දැඩි අවධානයෙන් ඉන්නේ.
ඉදිරි කාලය තුළ අපි බලාපොරොත්තු වෙනවා රථ වාහන පෙළපාලි, බීමතින් රිය පැදවීම්, අපරික්ෂාකාරී රිය පැදවීම්, අනවසර මගීන් ගෙනයෑම වැනි මාර්ග වැරදි ගැන කටයුතු කරන්න.
ඒ ගැන ජනතාව දැනුවත් විය යුතුයි. තරග සංවිධායකයින් අදාළ පොලිස් වසමේ පොලිස් නිලධාරීන් හමුවී සංවිධාන කටයුතු කරගන්න. බාධාවලින් තොරව මෙම කටයුතු සිදුකරගෙන යෑමට ඉන් අවස්ථාව ලැබෙනවා.”
