By unusuma.lk on (LK time)
‘නව රජයේ වැඩපිළිවෙල සමග පොලීසියේ කාර්යභාරය’ යන තේමාව යටතේ ඊයේ (17) රජයේ ප්‍රවෘත්ති දෙපාර්තමේන්තුවේ පැවැත් වූ විශේෂ මාධ්‍ය හමවේදී වැඩබලන පොලිස්පති ප්‍රියන්ත වීරසූරිය මහතාගෙන් මාධ්‍යවේදියෙකු විමසා සිටියේ 1968 වසරේ සිට මෙම රථ වාහන අලංකරණය සම්බන්ධයෙන් ක්‍රියාත්මක වූයේ එකම නීතියක් නම්, පසුගිය පළමුවනදා සිට ඒ සම්බන්ධයෙන් ආන්දෝලනාත්මක තත්වයක් ඇතිවූයේ පොලීසිය මාධ්‍ය යොදාගනිමින් සංදර්ශන පැවැත්වීම නිසාද යන වගයි.
ඊට ප්‍රතිචාර දක්වමින් ප්‍රියන්ත වීරසූරිය මහතා පැවසූවේ 2023 වසරේ එම නීති රාමුව යටතේ පොලීසිය විසින් 31,074ක් නඩු පැවරීම් සිදුකර තිබෙනා බවත් 2024 වසරේ 50,539ක් නඩු පවරා ඇති බවත් ය.
මාධ්‍ය යොදාගැනීම හරහා පොලීසිය බලාපොරොත්තු වූයේ මහජනතාව දැනුවත් කිරීම බවත්, කෙසේවෙතත් මහජනතාව ගමන් කරනා බස් රථ නවතා රියදුරන් දැනුවත් කිරීම පොලීසිය සිදුකළ වැරදි සහගත දෙයක් බවත් එහිදී ජනතාව අපහසුතාවට පත්වූ බවත් වැඩ බලන පොලිස්පතිවරයා පැවසීය.
“අපි වැරදි දෙයක් කළා, සමහර තැන් වල මහජනයා යන බස් නවත්තලා මහජනතාව ගැන හිතන්නේ නැතුව දේශන තියන්න පටන්ගත්තා.. මම ඒක දැකපු වෙලාවෙම ඒක නවත්තන්න කටයුතු කළා.. ඉතින් ඒ සමහර දේවල් වැරදියි.. වැරැද්ද අපේ නිළධරියෙක් කළත් කව්රු කළත් අපි වැරැද්ද වැරැද්ද විදියට දකිනවා”
වැඩබලන පොලිස්පති ප්‍රියන්ත වීරසූරිය මහතා වැඩිදුරටත් පැවසූවේ මෙම වැඩපිළිවෙළ සම්බන්ධයෙන් මේ වනවිට මහජනාතාව මෙන්ම බස් රථ හිමිකරුවනුත් නිසි අවබෝධයට පැමිණ ඇති බවත් අනාගතයේදී විදේශ රටවල දක්නට ලැබෙන මගී ප්‍රවාහන බස් රථ මට්ටමට මෙම බස් රථ උසස් කිරීම ශ්‍රී ලංකා පොලීසියේද සතුට බවත් ය.
