මාර්ග ආරක්ෂාව පිළිබඳ ජනාධිපති කාර්ය සාධක බළකායක් පිහිටුවා එය පසුකාලීනව මාර්ග ආරක්ෂාව පිළිබඳ අධිකාරියක් බවට පත් කරන මෙන් ජනාධිපතිවරයාට යෝජනාවක් භාරදීමට බලාපොරොත්තු වන බව ශ්‍රී ලංකා වෛද්‍ය සංගමයේ සභාපති විශේෂඥ වෛද්‍ය සුරන්ත පෙරේරා සදහන් කරයි.
මෙම යෝජනාව මීට පෙර පැවැති පාලනයේදී එවකට ජනාධිපති ලේකම්වරයා වෙත භාරදුන් බවත් ඒ පිළිබඳ මෙතෙක් කිසිවක් සිදුනොවූ නිසා වර්තමාන ජනාධිපති අනුර කුමාර දිසානායක වෙත භාරදීමට පියවර ගන්නා බවද සභාපති විශේෂඥ වෛද්‍ය සුරන්ත පෙරේරා සදහන් කරයි.
ශ්‍රී ලංකා වෛද්‍ය සංගමයේ මාර්ග අනතුරු වැළැක්වීමේ විශේෂඥ කමිටුව විසින් ලෝක බැංකුව සැපයූ පහසුකම් මත සකස් කළ යෝජනාවක් මෙසේ භාරදුන් බවද ශ්‍රී ලංකා වෛද්‍ය සංගමයේ පැවැති මාධ්‍ය හමුවක් අමතමින් විශේෂඥ වෛද්‍ය සුරන්ත පෙරේරා මේ බව සදහන් කරයි.
පවතින නීති ශක්තිමත් කළ යුතු බවත් පොදු වාහන විචිත්‍ර කිරීමේදී දර්ශන පථය අවහිර නොවන පරිදි එය සිදුකළ යුතු බවත් ඒවායින් විශේෂයෙන්ම මගීන්ට හානි නොවිය යුතු බවත් ඒකපාර්ශ්විකව නොසිතා සෑම අතින්ම සිතා කටයුතු කළ යුතු බවද විශේෂඥ වෛද්‍ය සුරන්ත සදහන් කරයි.
