බදු 4කුත් කර තියන් හම්බන්තොටට ගොඩ බහින බඩි වෑන්.!

මුදල් අමාත්‍යාංශය විසින් රජයේ මුදල් කාරක සභාවට පෙරේදා (28) දැනුම් දී ඇත්තේ කාර් රථ සහ කුඩා ප්‍රමාණයේ වෑන් රථ (බඩී වෑන්) ආනයනයට අදාළ ගැසට්ටුව පෙබරවාරි මාසය අතුළත නිකුත් කරන බවයි.

එලෙස පෙරවාරි මාසයේදී ආනයනය කරන කාර් රථ සහ බඩි වෑන් සඳහා බදු වර්ග හතරක් ඇතුළත් වන බව වාර්තා වේ.

18%ක අගය එකතු කිරීමේ බදු (වැට්) 20%ක රේගු බදු, නිෂ්පාදන බදු සහ සුඛෝපභෝගී බදු වශයෙනි.

කෙසේවෙතත් මුදල් අමාත්‍යාංශය විසින් රජයේ මුදල් කාරක සභාවට දන්වා ඇත්තේ නිෂ්පාදන බදු ඇතුළත් කිරීමේ දී රේගු බදු ඇතුළත් නොකෙරෙන බවට 2018 වසරේ හඳුන්වා දී තිබූ රෙගුලාසිය මේ වන විට ඉවත් කර තිබෙන බවයි.

මෙවර වාහනවලට නිෂ්පාදන බදු අය කිරීමේ දී සියයට හයක පමණ වැඩිවීමක් ඇතැයි ද එලෙස බදු සැකසෙන්නේ කැබිනට් මණ්ඩලය අනුමත සූත්‍රයක් අනුව යැයි ද දැනුම් දෙනු ලැබ ඇත.

කාර් රථ ගෙන්වන ගැසට්ටුව නිකුත් කෙරෙන්නේ පෙබරවාරි මස පළමු වැනිදා සිට ද යනුවෙන් කාරක සභා සභාපති ආචාර්ය හර්ෂ ද සිල්වා කළ විමසුමට පිළිතුරු දෙමින් මුදල් අමාත්‍යාංශ නිලධාරීන් පවසා ඇත්තේ එම මාසය අතුළත එම ගැසට්ටුව නිකුත් කරන බව ය.