ජනාධිපතිවරණය

පාර්ලිමේන්තු මන්ත්‍රීනි ආචාර්ය හරිනි අමරසූරිය පවසා සිටියේ ආණ්ඩුව කුමන ආකාරයෙන් උත්සාහ කළත් මැතිවරණ කල් දැමීමට නොහැකි බවත් එසේ කිරීම ආණ්ඩුක්‍රම ව්‍යවස්ථාවට පටහැනි බවත්ය.

ජනාධිපතිවරණය අනිවාර්යයෙන්ම සැප්තැම්බර් 17 සිට ඔක්තෝබර් 17 අතර පැවැත්විය යුතු බව මන්ත්‍රීවරියා වැඩිදුරටත් පැවසීය.

විවිධ පාර්ශව හරහා ප්‍රකාශ සහ අදහස් සමාජ ගත කිරීම තුලින් පෙනී යන්නේ මැතිවරණය පිළිබඳව ජනතාව තුළ ඇති වී තිබෙන විශ්වාසය උනන්දුව බාල කිරීම සඳහා දරන බාල උත්සාහයක් බවත් ඇය පැවසීය.

එහිදී වැඩිදුරටත් අදහස් දැක්වූ ජාතික ජන බලවේගය පාර්ලිමේන්තු මන්ත්‍රී හරිනි අමරසූරිය,

“ආණ්ඩුව පරදින බව සක්සුදක් සේ දන්නවා. ඒ පරාජයට මුහුණ දෙන්න බැරුව බියෙන් තමයි ජනමතය දුර්වල කරන්න උත්සාහ කරන්නේ. ජනතාව ඒ දේවල් පිළිගන්නේ නැහැ. ඒ නිසා ජනාධිපතිවරණය සැප්තැම්බර් 17 සිට ඔක්තෝබර් 17 අතර දිනයක අනිවාර්යෙන්ම තිබිය යුතුයි”

ජ්‍යෙෂ්ඨ අධිනීතිඥ ශ්‍රී. ප්‍රතිභා මහානාමහේවා කියා සිටියේ ජනාධිපතිවරණය සහ මහ මැතිවරණය කල් දැමීමේ හැකියාවක් පවතින බවයි.

අදාළ පනත් කෙටුම්පත කැබිනට් මණ්ඩලය විසින් අනුමත කර පාර්ලිමේන්තුවට ඉදිරිපත් කිරීමෙන් අනතුරුව එය පාර්ලිමේන්තුවේ තුනෙන් දෙකක අනුමැතිය ලබාගෙන ජනමත විචාරණයකින් සම්මත විය යුතු බවද ඔහු පැවසීය.

මීට පෙර 1982 වසරේදී ද මෙවැනිම සිදුවීමක් සිදුවූ බව පැවසේ.

ජනාධිපති ජේ.ආර්. ජයවර්ධන 1982 ජනාධිපතිවරණයේ ප්‍රචාරක රැලියට අනුරාධපුරයට ගිය අවස්ථාවේ මැතිවරණ සිතියම අකුළන කතාවක් මුල්වරට රටට ප්‍රකාශ කළේ මෙසේය ,

“අපට වාසිදායක මේ අවස්ථාවේ අපට උදවු කරන අය සමඟ එක් වී දේශපාලන ක්‍රීඩාවෙන් ජයග්‍රහණය කර දේශපාලන වශයෙන් විරුද්ධ පක්ෂ නැති කර දමා, නැපෝලියන් අවසන් යුද්ධයෙන් ජය ගත් අවස්ථාවේදී එංගලන්තයේ සිටි විලියම් පිට් යුරෝපයේ සිතියම අවුරුදු දහයකට අකුළා දමන්න කියලා පාර්ලිමේන්තුවේදී කිව්වා වගේ, අවුරුදු දහයකට ලංකාවේ මැතිවරණ කොට්ඨාස සිතියම අකුළා තබන්නය කියලා අපි ජනතාවට කියනවා.”

එහිදී එම කතාව ඇසූ කතාව ඇසූ එක්සත් ජාතික පාක්ෂිකයන් ප්‍රීතිඝෝශා කළ බව වාර්තා වේ. නමුත් ෙම ප්‍රකාශය කළ ජේ.ආර් ට නැවත දෙවැනි වතාවවේදී ජනාධිපතිවරණයට ඉල්ලීමට හෝ අවස්ථාව නොලැබුනි.

ප්‍රේමදාස අපේක්ෂකත්වය ලබා නොගන්නට එජාපය පරාජය වන්නේ 1994දී නොව 1988දී බව පැවසේ.

විහිළු සැපයීම නොව ප්‍රජාතන්ත්‍රවාදී ලෙස ජනතා විශ්වාසය රැක ගැනීම වැදගත් බව එක්සත් ජාතික පක්ෂයේ කොළඹ දිස්ත්‍රික් නායක හිටපු මුදල් අමාත්‍ය රවී කරුණානායක මහතා පවසයි.

රවී කරුණානායක මහතා පවසන පරිදි අනිවාර්යයෙන්ම ජනාධිපතිවරණය පැවැත්වෙන අතර ජනාධිපති අපේක්ෂකයා ලෙස රනිල් වික්‍රමසිංහ මහතා ඉදිරිපත් වනු ඇත.

මැතිවරණය ජයග්‍රහණය කර රට යහමගට ගත යුතු බවද ඔහු කියා සිටියේය.

ජනතා විශ්වාසය රැක ගැනීම හැර වෙනත් මාර්ගවලින් කටයුතු කිරීමෙන් පලක් නොවන බවද රවී කරුණානායක හිටපු අමාත්‍ය වරයා වැඩිදුරටත් අවධාරණය කළේය.

ආණ්ඩුක්‍රම ව්‍යවස්ථා ප්‍රකාරව නියමිත දිනට ජනාධිපතිවරණය පවත්වන බව අග්‍රාමාත්‍ය දිනේෂ් ගුණවර්ධන පැවසීය.

කොළඹ ජාතික පුස්තකාල ප්‍රලේඛන සේවා මණ්ඩලයේ මාර්ටින් වික්‍රමසිංහ ජන ජීවිතය හා සාහිත්‍ය කලාභවන විශේෂ මැදිරිය විවෘත කිරීමේ අවස්ථාවට එක්වෙමින් අග්‍රාමාත්‍යවරයා මේ බව ප්‍රකාශ කළේය.

එමෙන්ම අග්‍රාමාත්‍යවරයා කියා සිටියේ වගකීම් විරහිත ප්‍රකාශවලින් රට කැලඹීමට ප්‍රජාතන්ත්‍රවාදී රජයක් හෝ පාර්ලිමේන්තුවක් ඉඩ නොතබන බවයි.

විවේචන වෙනුවට විසඳුම්, පොරොන්දු වෙනුවට උපාය මාර්ගික වැඩපිළිවෙළක් යන තේමාව යටතේ ශ්‍රී ලංකාවේ ප්‍රබල දේශපාලන චරිත කිහිපයක් සමඟින් නව දේශපාලන සන්ධානයක් අද (27) ගොඩනැගුණි.

මෙහිදී ඒ සියලු දේශපාලන පක්ෂ හා සංවිධාන ප්‍රධාන වශයෙන් එකතු වූයේ මව්බිම ජනතා පක්ෂය යටතේ වේ.

කොළඹ පැවති දේශපාලන සන්ධානයට අත්සන් තැබීමට දේශපාලන පක්ෂ නායකයින්, පාර්ලිමේන්තු මන්ත්‍රීවරුන් සහ පක්ෂ නියෝජිතයින් එක්ව සිටියහ.

පිවිතුරු හෙළ උරුමය නියෝජනය කරමින් එහි නායක පාර්ලිමේන්තු මන්ත්‍රී උදය ගම්මන්පිල, ජාතාන්ත්‍රවාදී වාමාංශික පෙරමුණේ නියෝජ්‍ය ලේකම් ඩී. බී. ඩී. තිලකසිරි, ජාතික නිදහස් පෙරමුණ වෙනුවෙන් පාර්ලිමේන්තු මන්ත්‍රී විමල් වීරවංශ, ශ්‍රී ලංකා කොමියුනිස්ට් පක්ෂයේ ලේකම් වෛද්‍ය ජී විරසිංහ, යුතුකම ජාතික සංවිධානය වෙනුවෙන් පාර්ලිමේන්තු මන්ත්‍රී ගෙවිඳු කුමාරතුංග, මව්බිම ජනතා පක්ෂයේ නායක දිලිත් ජයවීර සහ ස්වාධීන පාර්ලිමේන්තු මන්ත්‍රීවරු නියෝජනය කරමින් පාර්ලිමේන්තු මන්ත්‍රී චන්න ජයසුමන එම සන්ධානයට අත්සන් තැබූහ.

ජනාධිපතිවරණයක් පවත්වා තවත් වසර පහකට ජනාධිපති රනිල් වික්‍රමසිංහ මහතාට ජනාධිපති ධුරය ලබාදීම සුදුසු බව එක්සත් ජාතික පක්ෂයේ මහලේකම් පාලිත රංගබණ්ඩාර මහතා පවසයි.

රට යම්කිසි ආර්ථික තත්ත්වයකට ගෙන ඒම තුළින් ජනාධිපතිතුමා ගෙන යන වැඩපිළිවෙළ ශක්තිමත් කිරීම සුදුසු බවද හෙතෙම කීය.

පාර්ලිමේන්තුව නියෝජනය කරනා සියලුම මන්ත්‍රීවරුන් එකතු වී ජනමත විචාරණයක් පවත්වා වික්‍රමසිංහ මහතාට තවත් වසර පහක බලයක් ලබා දිය යුතු බවද ඔහු පවසයි.

ඔහු මෙම අදහස් පළ කළේ සිරිකොත මූලස්ථානයේ පැවති මාධ්‍ය හමුවකට එක්වෙමිනි.

ජනාධිපති රනිල් වික්‍රමසිංහ මහතා මෙම වසරේ අදාළ කාලසීමාව තුළ ප්‍රථමයෙන් ජනාධිපතිවරණය පැවැත්වෙන බව පවසා ඇත.

අද පැවති කැබිනට් රැස්වීමේදී මේ බව ජනාධිපතිවරයා සඳහන් කළ බව වාර්තා වේ.

එහිදී වැඩිදුරටත් අදහස් දක්වමින් ජනාධිපතිවරයා සඳහන් කර ඇත්තේ ඒ සඳහා මුදල් ප්‍රතිපාදන වෙන්කර අවසන් බවයි.