By unusuma.lk on (LK time)
සමගි ජන බලවේගයට පැමිණ සිටින සමහරු අවස්ථාවාදීන් බවත් කාලෙකට සැරයක් එන බොරුකාරයන් බවත් එම අවස්ථාවාදීන්ගෙන් පක්ෂය බේරාගත යුතු බව එම පක්ෂයේ ජාතික සංවිධායක තිස්ස අත්තනායක සදහන් කරයි.
එක්සත් ජාතික පක්ෂය හා සමගි ජන බලවේගය එකතු නොවී මේ අයුරින් ඉදිරියට ගියොත් ඉදිරියේදී ජාතික ජන බලවේගය නොව අපේම කණ්ඩායම් අපට අභියෝගයක් වෙන බවද සංවිධායක තිස්ස අත්තනායක සදහන් කරයි.
සංවිධායක තිස්ස අත්තනායක සදහන් කළේ,
“තව දවස් කිහිපයකින් අලුත් අවුරුද්ද එනවා. අපේ අපේක්ෂාව ජනතාවට කරදර නැති වසරක් වෙන එක. අපි ප්‍රාර්ථනා කරනවා ජනතාවට සුබවාදී වසරක් වේවා කියලා. මේ ආර්ථික අර්බුදය හමුවේ ආණ්ඩුව මොන විදිහට උත්තර හොයනවද කියලා තේරෙන්නේ නෑ. හාල්, පොල් ඇතුළු අත්‍යවශ්‍ය භාණඩවල හිඟයක් තියෙනවා.
ආණ්ඩුවට කියනවා අසීමිත ජනවරම පාවිච්චි කරලා ජනතාවගේ ප්‍රශ්න විසඳන්න කියලා. ජනාධිපතිවරයා සහ ආණ්ඩුව මාධ්‍ය සංදර්ශන පවත්වන්න උත්සාහ කරනවා. ආණ්ඩුව පත් කරන්න මැදිහත් වුණු අයගේ ප්‍රතිචාර දැන් අපිට පේනවා. සමහර මැති ඇමැතිවරු මාධ්‍ය මගහරිනවා. අපි ඉතිහාසයට බැනලා වැඩක් නෑ. ජනාධිපතිවරයාගේ චීන සංචාරයක් පිළිබඳ කතා වෙනවා.
ගෑස් සිලින්ඩරය හා දුරකථනය අතර විරසකභාවය නිසයි ජාතික ජන බලවේගය දින්නේ. මෙරට පළවෙනි වතාවට වාමාංශික හා දක්ෂිණාංශික කියලා දෙකක් ආවා. දක්ෂිණාංශික කණ්ඩායම් බෙදීම නිසා වාමාංශික අයට වාසිය ගියා, සිලින්ඩරය නිසා දුරකථනයට වුණු බලපෑම තේරුම්ගෙන දෙක එකට කරලා ව්‍යාපාරයක් හැදුවේ නැත්නම් ගැටලුවක් තියෙනවා.
මේ දෙක අතර එකතු වී අලුත් බලවේගයක් නිර්මාණය කළ යුතුයි. අකැමැති අය පසෙකින් තබා කැමැති අය එකතුවිය යුතුයි. සමගිය හා එක්සත් ජාතික පක්ෂය වෙන පාරවල්වල ගියොත් ඊළඟ මැතිවරණ වල ජයග්‍රහණය ලබා ගැනීම අතිශය අසීරුයි. එහෙම නොවුණොත් තුන්වෙනි පාර්ශ්වයකට බලය යනවා.”
