By unusuma.lk on (LK time)
මාලිගාකන්ද මහෙස්ත්‍රාත් ලෝචනී අබේවික්‍රම කොළඹ අපරාධ කොට්ඨාසයට නියෝග කර ඇත්තේ වාහන ලෙඩ කරන ව්‍යාජ ‘ස්පාර්ක් ප්ලග්’ වහාම පොලිස් භාරයට ගන්නා ලෙසයි.
මහෙස්ත්‍රාත්වරිය කොළඹ අපරාධ කොට්ඨාසයට එලෙස නියෝග කර ඇත්තේ බුද්ධිමය දේපළ පනත යටතේ කොළඹ, පංචිකාවත්තේ පිහිටි වාහන අමතර කොටස් අලෙවි කරන වෙළෙඳසල් 4කට එරෙහිව පැවැරූ පැමිණිලි 4ක් සලකා බැලූ අවස්ථාවේදීය.
ප්‍රකට වෙළෙඳ නාමය යටතේ ස්පාර්ක් ප්ලග් බෙදාහරින සමාගමක් විසින් පවරන ලද පැමිණිලිවලට අදාළ මහෙස්ත්‍රාත්වරිය එම නියෝගය නිකුත්කර තිබේ.
පැමිණිකාර සමාගම් විසින් එහිදී පෙන්වා දී ඇත්තේ සිය කීර්ති නාමය භාවිත කරමින් විත්තිකාර සමාගම් අයුතු ලෙස ලාභ ලබමින් සිටින බවත්, එමගින් පාරිභෝගිකයන්ගේ වාහනවල දෝෂ හට ගැනීමට හැකි බවත්ය.
මෙහිදී කොළඹ අපරාධ කොට්ඨාසයේ නිලධාරීන් කරුණු ඉදිරිපත් කරමින්, ප්‍රසිද්ධ වෙළෙඳ නාමයක් අනුකරණය කරමින් ව්‍යාජ ස්පාර්ක් ප්ලග් අලෙවි කරන විත්තිකාර ආයතනවල භාණ්ඩ බුද්ධිමය දේපළ පනත යටතේ අත්අඩංගුවට ගැනීමට නියෝග නිකුත් කරන ලෙස ඉල්ලා සිටියේය.
ඒ අනුව පංචිකාවත්තේ වාහන අමතර කොටස් අලෙවි කරන ආයතනවල ව්‍යාජ ස්පාර්ක් ප්ලග් පොලිස් භාරයට ගන්නා ලෙස මහෙස්ත්‍රාත්වරිය නියෝග කළාය.
