හිටපු ජනාධිපති මහින්ද රාජපක්ෂගේ බිරිඳ වන ශිරන්ති රාජපක්ෂ සභාපති ධුරය දැරූ “සිරිලිය සවිය” සංවිධානයේ සිදුව ඇතැයි කියන දූෂිත ගනුදෙනු වලට අදාළව පොලිස් මුල්ය අපරාධ කොට්ඨාශය (FCID) විමර්ශනය සිදු කරයි.
පසුගිය 2015 වසරේ සිට මෙම විමර්ශනය ක්රියාත්මක වුවද පසුගිය කාලයේ එහි ලිපිගොනු විවිධ ස්ථානවල සිරවී තිබුණේය. කෙසේ වෙතත් යළිත් මෙම විමර්ශන ආරම්භ කර ඇත.
එම විමර්ශනයේදී අවධානයට ලක්ව ඇති ප්රධාන ගනුදෙනු කිහිපයක් පහතින් දැක්වෙයි.
*රාජ්ය ආයතන විසින් “සිරිලිය සවිය” සංවිධානයට මුදල් බැර කිරීම.
*බදු මුදල් නිදහස්ව “සිරිලිය සවිය” සංවිධානයට වාහන ආනයනය කිරීම.
*”සිරිලිය සවිය” වාහන සී.එස්.එන් (CSN) ආයතනය භාවිත කිරීම.
*රිජ්වේ ආර්යා ළමා රෝහලට සීටී ස්කෑන් යන්ත්රයක් ලබාදීම සඳහා ආධාර ලබාගැනිම සහ එම මුදල් වැය කිරීම.
*මෙම සීටී ස්කෑන් යන්ත්රය පරිත්යාගයක් ලෙස විදේශ රටකින් මෙරටට ලැබී ඇති බව පසුගිය කාලසීමාවේදී සිදුකළ විමර්ශන හෙළිවී ඇත.
*ඒඩ්ස් මර්දන වැඩසටහන සඳහා ආධාර ලබාගැනිම සහ එම මුදල් වැය කිරීම.
*”සිරිලිය සවිය” සංවිධානයේ භාණ්ඩාගාරිකගේ ලිපිනය ලෙස ශිරන්ති රාජපක්ෂට අයත් බව කියන කොළඹ නිවසක් සම්බන්ධයෙන් පසුගිය විමර්ශන වලදී අනාවරණය වී ඇත.
මේ අතර ශිරන්ති රාජපක්ෂගේ ජාතික හැදුනුම්පත් අංකය ලෙස 222222222V යනුවෙන් අංකයක් සඳහන් කරමින් ආරම්භ කළ බැංකු ගිණුමක් සම්බන්ධයෙන් විමර්ශන වලදී අවධානය යොමුවී ඇත.
මේ අතර රගර් ක්රීඩක වසීම් තාජූඩීන් ඝාතන විමර්ශනයට අදාළවත් “සිරිලිය සවියට” බරපතල චෝදනාවක් එල්ල වී ඇත.
රගර් ක්රීඩක වසීම් තාජුඩීන් ඝාතන විමර්ශනයේදී “සිරිලිය සවිය” සංවිධානයේ තිබු ජීප් රථයක් සම්බන්ධයෙන් විමර්ශන කණ්ඩායම් පසුගිය කාලයේ කරුණු අනාවරණය කර තිබුණේය.
ඒ අනුව “සිරිලිය සවිය” නමින් පවත්වාගෙන ගිය ගිණුමක සිදුවූ බව කියන මූල්ය අක්රමිකතා සම්බන්ධව කෙරෙන විමර්ශනයට අනුව ශිරන්ති රාජපක්ෂ ඊයේ (03) දින මූල්ය අපරාධ කොට්ඨාශය (FCID) හමුවට කැඳවා තිබුණේය.
අනතුරුව පොලිස් මූල්ය අපරාධ කොට්ඨාශය (FCID) හමුවට පැමිණි ශිරන්ති රාජපක්ෂ පැය 4කට වැඩි කාලයක් ප්රකාශයක් ලබාදීමෙන් පසුව පිටව ගියේය.
