Unusuma Writer

තම පත්වීම ලබන පාසලේ වසර පහක් සේවය කර අවසන් වනතුරු ස්ථාන මාරු නොඉල්ලන ලෙස නැගෙනහිර ආණ්ඩුකාර මහාචාර්ය ජයන්තලාල් රත්නසේකර සදහන් කරයි.

ආණ්ඩුකාරවරයා තවදුරටත් සදහන් කළේ,

“ඉගැන්වීම යනු කලාවක්, නිපුණතාවයක් විද්‍යාවක්. අපි ගුරු වෘත්තියට දෙන තැන හොඳටම මදි. අඩු තරමින් වෛද්‍ය වෘත්තියට ලබාදෙන තරමට වැඩි තත්ත්වක් මීට ලබාදිය යුතුයි. අපි කරන ඉගැන්වීම නිසා එකවර ළමයි තිහක් හතළිහක් අමාරුවෙ වැටෙන්න පුළුවන්. එකම පාසලේ අවුරුදු දහය පහළොව ඉන්න අපි ඉඩ දෙන්නේ නැහැ. අවුරුදු අටකට පසුව ඔබට ස්ථාන මාරුවරිය ලබා දෙනවා.”

නැගෙනහිර පළාත් රාජ්‍ය සේවාවේ රාජ්‍ය සේවයට බඳවාගනු ලැබූ උපාධිධාරීන් පිරිසකට ආණ්ඩුකාර කාර්යාලයේදී පත්වීම් ලබා දෙමින් ආණ්ඩුකාරවරයා මේ බව සදහන් කරයි.

ජනාධිපති අනුර කුමාර දිසානායකගේ සංකල්පයක් මත ක්‍රියාත්මකවන “ක්ලීන් ශ්‍රී ලංකා” ජාතික ව්‍යාපෘතිය සරල ලෙසින් අර්ථකථනය කළත් එය ඉතා ගැඹුරු අදහසක් තිබෙන ක්‍රියාවලියක් බව ශ්‍රී ලංකා හිටපු ක්‍රිකට් නායක කුමාර් සංගක්කාර සදහන් කරයි.

තවද මානසිකත්වය වෙනස්කිරීම තුළින් යහපත් වටිනාකම්, හරයන් එදිනෙදා ජීවිතයටත් පරිපාලනයටත් එක්කිරීම තුළින් රටේ දියුණුවට මෙන්ම ජනතාවගේ දියුණුවට ද විශාල රැකුළක් බවද කුමාර් සංගක්කාර සදහන් කරයි.

සමාරම්භක උත්සව අවස්ථාවට ශ්‍රී ලංකා ක්‍රිකට් කණ්ඩායමේ හිටපු නායකයින් දෙපළක් වන කුමාර් සංගක්කාර සහ මහේල ජයවර්ධන සහභාගි විය.

හිටපු නායක කුමාර් සංගක්කාර සදහන් කළේ,

“ඉතාමත් වැදගත් ක්‍රියාවලියක් අද මේ දියත් කරන්න ගරු ජනාධිපතිතුමා අපෙන් ඉල්ලා සිටියේ. ඉතාමත් හොඳ දෙයක් අලුත් අවුරුද්දේ පළවෙනි දවසේ මෙවැනි ක්‍රියාවලියක් දියත් කිරීම. සරළ විදියට අර්ථකථනය කළාට ඉතාමත් ගැඹුරු අදහසක් එක්ක තමයි මේ ක්‍රියාවලිය දියත්කරලා තියෙන්නේ”.

හිටපු නායක මහේල ජයවර්ධන සදහන් කළේ,

“මම හිතන්නේ ඉතාමත් වැදගත් කර්තව්‍යක් අලුත් අවුරුද්දේ. ජනාධිපතිතුමත් අනෙක් හැමෝගෙම සහයෝගයත් එක්ක අපට පුරවැසියන් විදිහට ලොක වගකීමක් තියෙනවා “ක්ලීන් ශ්‍රී ලංකා” ව්‍යාපෘතිය ඉදිරියට ගෙනියන්න. හොඳ පටන් ගැන්මක්. බොහෝ දේ කරන්න තියෙනවා ඉදිරියට”.

කොළඹ අපරාධ කොට්ඨාසය විසින් සමාජ ක්‍රියාකාරියෙකු වන නාමල් කුමාර අත්අඩංගුවට ගෙන ඇත.

කාදිනල් හිමිපාණන්ගේ ප්‍රතිරූපයට හානිවන අන්දමේ හඬපටයක් පිළිබඳව නාමල් කුමාර නැමැත්තා පසුගියදා ජනාධිපති ලේකම් කාර්යාලය හා අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කළේය.

එහෙත් නාමල් කුමාර සිදුකළ එම පැමිණිල්ල පිළිබඳ විමර්ශනයක් සිදුකර සාධාරණය ඉටුකරන ලෙස කතෝලික සභාව පොලිස්පතිවරයාගෙන් ඉල්ලා සිටියේය.

රාජ්‍ය නිලධාරීන් රාජකාරි ඉටුකිරීමේදී රජයට සිදුවන පාඩු අයකර ගැනීමට හැකිවන පරිදි සුදුසු ඇපකරයක් පවත්වා ගෙන යාමට අදාළ ඇප ආඥාපනත සංශෝධනය කිරීමට කමිටුවක් පත් කිරීමට කැබිනට් මණ්ඩලය තීරණය කර ඇත.

මෙම ඇප අයකරගැනීමේ ක්‍රියාවලිය සරල හා කාලෝචිත අයුරින් කිරීමට හැකි වන පරිදි ඇප ආඥාපනත පූර්ණ ප්‍රතිශෝධනයකට ලක් කිරීමට අවශ්‍ය සංශෝධන හඳුනාගැනීම මෙම කමිටුවේ වගකීම බව අමාත්‍ය වෛද්‍ය නලින්ද ජයතිස්ස සදහන් කරයි.

එම කමිටුවේ නිර්දේශ අනුව නව පනත් කෙටුම්පතක් සකස් කරන ලෙස නීති කෙටුම්පත් සම්පාදකට උපදෙස් දීමටද අධිකරණ සහ ජාතික ඒකාබද්ධතා අමාත්‍යවරයා ඉදිරිපත් කළ යෝජනාවට කැබිනට් අනුමැතිය හිමිව ඇත.

රජය මේ දක්වා රුපියල් කෝටියකට වැඩි අමතර වැය බරක් දරා විශ‍්‍රාම ලැබූ උසස් නිලධාරියෙකු පාර්ලිමේන්තුවේ එක්තරා සභාවක ලේකම් ධූරයකට පත් කර වැටුප් හා වෙනත් පහසුකම් වසර දෙකකට ආසන්න කාලයක් තිස්සේ ලබාදී තිබෙන බව වාර්තා වේ.

එම නිලධාරියා පාර්ලිමේන්තුවේ එක්තරා සභාවක ලේකම් ධූරයකට පත් කර වැටුප් හා වෙනත් පහසුකම් වසර දෙකකට ආසන්න කාලයක් තිස්සේ ලබාදීමෙන් රජය රුපියල් කෝටියකට වැඩි අමතර වැය බරක් මේ දක්වා දරා ඇති බවද වාර්තා වේ.

මෙම නිලධාරියා වසර විසි නවයක සේවයෙන් පසුව පසුගිය වසරේ මැයි මාසයේදී විශ්‍රාම ලැබු බවත් එම විශ්‍රාම ලැබු නිලධාරියා වෙනුවෙන් මාසිකව රුපියල් ලක්ෂ 6කට ආසන්න දීමනාවක් මෙන්ම වෙනත් පහසුකම් ලබාදෙන බවද වාර්තා වේ.

විශ්‍රාම ගොස් දින කිහිපයකින් පසුව ලේකම් ධූරයට ඔහු පත් කෙරුණේ පසුගිය රජයේ ප්‍රධානියකුගේ ආශිර්වාදයෙන් වන අතර එම ධූරය දැනට පාර්ලිමේන්තුවේ මහලේකම්වරියට කරගෙන යෑමට හැකියාව තිබියදී විශ්‍රාමික නිලධාරියෙකු පත් කිරීම විහිළු සහගත කාරණයකි.

ශ්‍රී ලාංකික අප 2025 නව වසරට පා තබන්නේ රටත්, ජනතාවත් දශක ගණනාවක් පුරා දුටු සුබ සිහින මල්ඵල ගැන්වෙන නව යුගයක උදාවත් සමගිනි.

දිවයිනේ උතුර, නැගෙනහිර, බටහිර හා දකුණ යන සතර දිසාවන් යා කරමින්, සියලු ජනතාවගේ විශ්වාසය දිනා ගෙන පාර්ලිමේන්තුවේ බහුතර බලයක් සහිත ආණ්ඩුවක් ගොඩනැගීමට 2024 පාර්ලිමේන්තු මැතිවරණයේදී අපට හැකි විය.

ඒ අනුව ජනතාව අපේක්ෂා කරන යහපත් රාජ්‍යය ගොඩනැගිම වෙනුවෙන් පැවති දේශපාලන සංස්කෘතියේ විසල් පරිවර්තනයක් සිදු කරමින් ජනවරමේ වගවීම හා වගකීම ඉටු කිරීමට මේ වන විට අපි යුහුසුළුව කටයුතු කරමින් සිටිමු.

ග්‍රාමීය දිළිදු බව අවසන් කිරීම, ක්ලීන් ශ්‍රී ලංකා වැඩසටහන, ඩිජිටල් ආර්ථිකයක් ගොඩනැගීම රටෙහි ප්‍රමුඛ සංවර්ධන අවශ්‍යතා ලෙස අපි හඳුනාගෙන සිටිමු.

සමාජීය, පාරිසරික හා ආචාර ධාර්මික පිබිදීමක් ඔස්සේ සමාජය වඩා දියුණු තලයකට ඔසවා තැබීම අරමුණු කර ගත් “ක්ලීන් ශ්‍රී ලංකා” වැඩසටහන නව වසරේ උදාවත් සමඟ ක්‍රියාවට නැංවෙන්නේ ඒ පසුබිම අනුවයි.

මෙකී පරිවර්තනාත්මක සංවර්ධන ව්‍යායාමය සමඟ රටක් ලෙස අප 2024 වසරේදී ලබා ගත් ආර්ථික ස්ථාවරත්වය තවදුරටත් තහවුරු කර ගනිමින් “පොහොසත් රටක් – ලස්සන ජීවිතයක්” සැමට උරුම කර දීම වෙනුවෙන් නව ආකල්ප පුබුදුවා, නව අධිෂ්ඨානයක් සිත් දරා සහෘදත්වයත් සමඟ පෙරට පැමිණීමට 2025 නව වසර උදාව මහඟු අවස්ථාවක් ජනිත කර ඇති බව මම තරයේ විශ්වාස කරමි.

නිදහසින් පසු ලංකා ඉතිහාසයේ පළමු වතාවට ජනතාහිතෛෂී පාලනයක් ඇති කරමින් සියලු ජනතාව එකාවන්ව දුටු සංවර්ධිත ශ්‍රී ලංකාවක් පිළිබඳ සිහිනය යථාර්ථයක් කිරීමේ අවස්ථාව දැන් ඔබට, අපට හිමිව ඇත. අත්හළ නොහැකි මෙම භාරදූර වගකීම අප සියලුදෙනාගේ දෙවුර මත පැටවි තිබේ. ඒ වගකීම පිළිබඳ මනා අවබෝධයක් අපට ඇත.

මේ සියවසේ මඟහැරුණු ජයග්‍රහණ යළි රටට අත්කර දීමටත්, එකී ජනතා සිහින යථාවක් කිරීමටත් 2025 නව වසරේදී තවත් වීර්යයෙන් සහ සද්- අධිෂ්ඨානයෙන් යුතුව අපි කැප වී ක්‍රියා කරන්නෙමු.

සෞභාග්‍යය, එකමුතුබව සහ නව අපේක්ෂා සපිරි සුබ නව වසරක් වේවා.!’යි, සාමය සහ ප්‍රගමනය උදෙසා අප හා එක්ව ප්‍රයත්න දරන ඔබ සැමට මම ප්‍රාර්ථනා කරමි.

නීති විරෝධීව මෙරටට ආනයනය කරන ලද රුපියල් කෝටි එකහමාරක් පමණ වටිනා toyota land cruiser prado වර්ගයේ අධි සුඛෝපභෝගී ජිප් රථයක් සමඟ පුද්ගලයකු මිරිගම ප්‍රදේශයේදී අත්අඩංගුවට ගත් බව වලාන මධ්‍යම දුෂණ මර්දන ප්‍රහාරක බළකාය සදහන් කරයි.

මෙම ජිප් රථය ආදායම් බලපත්‍ර නොමැතිව වසර විස්සකට වැඩි කාලයක් මීරිගම ප්‍රදේශයේ ධාවනය කර ඇති අතර ඒ පිළිබඳ ස්ථානාධිපති ප්‍රධාන පොලිස් පරීක්ෂකවරයාට ලද තොරතුරකට අනුව අධ්‍යක්ෂ සහකාර පොලිස් අධිකාරීවරයාගේ සැලසුමකට අනුව නිලධාරීන් කණ්ඩායමක් විසින් සිදු කළ විමර්ශනයේදී මෙම අත්අඩංගුවට ගැනීම සිදු කර ඇත.

මිරිගම ප්‍රදේශයේ 46 හැවිරිදි ව්‍යාපාරිකයෙක් එලෙස අත්අඩංගුවට ගෙන ඇති අතර මෙම වාහනය 2023 වර්ෂයේදී කූට ලේඛන හා ව්‍යාජ වාහන ජාවාරම සිදු කිරීම සම්බන්ධයෙන් අත්අඩංගුවට ගත් සැකකරුවකු විසින් නීති විරෝධී අයුරින් මෙරටට ආනයනය කර ඇති බව අනාවරණය වී ඇත.