Unusuma Writer

පසුගිය 2024 වසරේදී ලාංකිකයන් දන් දුන් ඇස් වලින් දෙස් විදෙස් අන්ධ පුද්ගලයන් 4,638කට ලෝකය දකින්නට වරම් හිමි වූ බව ශ්‍රී ලංකා අක්ෂිදාන සංගමය සදහන් කරයි.

ලෝකයේ රටවල් 57ක නගර 115ක අන්ධ පුද්ගලයන් 3,163කට සහ මෙරට පුද්ගලයන් 1,475කට දන් දුන් ඇස් වලින් පෙනීම ලබාදී තිබෙන බව එම සංගමයේ ජ්‍යෙෂ්ඨ කළමනාකරු ජගත් එස්. මාතර ආරච්චි සදහන් කරයි.

කෙන්යාව, පාකිස්තානය, යේමනය සහ ඊජිප්තුවට වැඩි වශයෙන් ඇස් ලබාදී තිබෙන බවත් ලාංකිකයන් 7144ක් පසුගිය වසරේදී ඇස් දන් දුන් බවද කළමනාකරු ජගත් එස්. මාතර ආරච්චි සදහන් කරයි.

ඇස් 1,025ක් අක්ෂි වෛද්‍යවරුන්ගේ පුහුණු වීම් සදහා ලබාදී තිබෙන බවත් ඇස් දන්දීම සදහා මෙරට පරිත්‍යාගශීලීන් 2,23,000ක් ලියාපදිංචිය ලබාගෙන සිටින බවද ජ්‍යෙෂ්ඨ කළමනාකරු සදහන් කරයි.

එලෙස පරිත්‍යාග කෙරෙන එක් ඇසක් සංරක්ෂණය සදහා රුපියල් 25,000ක් පමණ වැය කෙරෙන බවත් 2024 වසරේදී ඇසේ සුද ඉවත් කිරීමේ ශල්‍ය කර්ම 2300ක් සිදු කළ බවද ජ්‍යෙෂ්ඨ කළමනාකරු සදහන් කරයි.

රෝහල්ගතව ප්‍රතිකාර ලබමින් සිටියදී හිටපු පාර්ලිමේන්තු මන්ත්‍රී ජේ.ආර්.පී. සූරියප්පෙරුම අභාවප්‍රාප්ත වී ඇත.

දේශපාලන විචාරකයෙකු, ලේඛකයෙකු, හිටපු විශ්ව විද්‍යාල ආචාර්යවරයකු වන ජේ.ආර්.පී. සූරියප්පෙරුම මිය යන විට 96 හැවිරිදි වියේ පසුවිය.

රූපවාහිනි වැඩසටහන්වලට, සංවාදවලට, පුවත්පත්, ගුවන්විදුලි සහ රූපවාහිනී මාධ්‍යයන්හි දේශපාලන, ආර්ථික හා ශාස්ත්‍රීය සංවාදවලට සහභාගී වෙමින් ශ්‍රී ලාංකිකයන් දැනුමෙන් පෝෂණය කිරීමට කටයුතු කළේය.

ජාතික ව්‍යවසාය සංවර්ධන අධිකාරියේ (NEDA) නව සභාපතිවරයා ලෙස, පුද්ගලික අංශය හා රාජ්‍ය අංශය යන දෙකෙහිම වසර 35කට අධික කළමණාකරන අත්දැකීම් සහිත ජ්‍යෙෂ්ඨ නිලධාරියෙක් වන ලක්ෂ්මන් අබේසේකර පත්කර ඇත.

ඔහු වරලත් ගණකාධිකාරීවරයෙකු ලෙස ශ්‍රී ජයවර්ධනපුර විශ්වවිද්‍යාලයේ පශ්චාත් කළමනාකරණය ආයතනයෙන් කළමනාකරණය පිළිබඳ පශ්චාත් උපාධිය හිමි කරගෙන ඇත.

ජාතික ව්‍යවසාය සංවර්ධන අධිකාරිය කර්මාන්ත සහ ව්‍යවසායකත්ව සංවර්ධන අමාත්‍යාංශය යටතේ ක්‍රියාත්මක වේ.

රටේ ජනතාව ඉදිරිපත් කරන ඉල්ලීම් වලට කඩිනමින් ප්‍රතිචාර දැක්වීම සදහා කම්කරු අමාත්‍යාංශයෙන් නව “WhatsApp” අංකයක් හඳුන්වා දී ඇත.

වැඩ කරන ජනතාවගේ වෘත්තීය අයිතිවාසිකම් ආරක්ෂා කිරීම සහ සේවා සුරක්ෂිතතාව තහවුරු කිරීම වෙනුවෙනුත්, තෘප්තිමත් ශ්‍රම බලකායක් නිර්මාණය කිරීම සදහාත් මෙම අංකය හඳුන්වා දුන් බව කම්කරු අමාත්‍යංශය සදහන් කරයි.

තම සේවාවන් කාර්යක්ෂම කිරීමේ අරමුණින් සහ මහජනතාවට ඔවුන්ගේ ඉල්ලීම් ඉදිරිපත් කිරීම සදහා “0707 22 78 77” යන නව whatsApp අංකය හඳුන්වා දුන් බව කම්කරු අමාත්‍යාංශය සදහන් කරයි.

පෞද්ගලික සහ අර්ධ රාජ්‍ය සේවකයන්ගේ සේවා ගැටලු සදහා කඩිනමින් ප්‍රතිචාර දැක්වීමත් මෙම නව whatsApp අංකය හඳුන්වා දීමේ තවත් එක් අරමුණක් බව කම්කරු අමාත්‍යාංශය සදහන් කරයි.

වාහන ධාවනය කරන රියැදුරන්ට රාත්‍රී කාලයේ තේ පැන් සංග්‍රහයක් ලබාදීමට තඹුත්තේගම පොලිසිය කටයුතු කර ඇත.

රාත්‍රී කාලයේ රථවාහන අනතුරුවලට හේතු වී ඇත්තේ රියැදුරන්ට නින්ද යෑම බව අවබෝධ කරගත් තඹුත්තේගම පොලිසියේ රථවාහන අංශය මෙම සත් ක්‍රියාවට දායක වූ බව එම අංශය සදහන් කරයි.

තඹුත්තේගම වැඩ බලන මූලස්ථාන පොලිස් පරීක්ෂකවරයාගේ උපදෙස් මත රථවාහන අංශයේ ස්ථානාධිපතිගේ සංකල්පයක් අනුව මෙම වැඩසටහන රථවාහන අංශයේ නිලධාරීහු ක්‍රියාත්මක කර ඇත.

විශේෂයෙන්ම මධ්‍යම රාත්‍රී 12.00 පසුවන විට නින්ද යෑම සිදුවන නිසා තඹුත්තේගම බස් නැවතුම්පොළ ආසන්නයේ වාහන නවත්වා රියැදුරන්ට තේ පැන් සංග්‍රහයක් ලබාදී ගිමන් හැරීමට අවස්ථාවක් උදාකර දී ඇත.

උතුරු මැද පළාතේ 2024 තුන්වැනි වාර විභාග ප්‍රශ්න පත්‍ර පිට වී ඇතැයි අනුරාධපුර දිස්ත්‍රික් ලංකා ගුරු සේවා සංගමයේ ලේකම් අසේල විජේසිංහ සදහන් කරයි.

අද (02) දිනයේ සිට පාසල් නව වාරය ආරම්භ කිරීමෙන් පසු තුන්වැනි වාර විභාගය පැවැත්වීමට නියමිත බවත් මේ වනවිටත් හයවැනි ශ්‍රේණියේ භූගෝල විද්‍යාව ඇතුළු ප්‍රශ්න පත්‍ර සහ පිළිතුරු පත්‍ර වට්ස් ඇප් (Whatsapp) සමූහ තුළ හුවමාරු වන බවද ලේකම් අසේල විජේසිංහ සදහන් කරයි.

උතුරු මැද පළාතේ විභාගයක තිබෙන රහස්‍යභාවය, විභාගයක තිබෙන ගුණාත්මක භාවය, පළාත් සභාව දරා ඇති අධික වියදම ආදිය මේ අයථා ක්‍රියා තුළින් දැඩි ලෙස පිරිහී ඇති බවත් පසුගිය වසර වල වෙනත් පළාත්වල ප්‍රශ්න පත්‍ර මේ පළාතට ලබාගෙන පළාත් අධ්‍යාපන බලධාරීන් විසින් ඒවා මුද්‍රණය කර ලබාදීම වැනි බරපතළ සිද්ධීන් සිදු වූ බවද අසේල විජේසිංහ සදහන් කරයි.

එහෙත් බලධාරීන් ඒ පිළිබඳව තැකීමක් නොකළ අතර එහි ඵලය විදිහට දිගින් දිගටම විභාග සම්බන්ධයෙන් තිබෙන තත්ත්වය ඛේදනීය වූ බවත් මෙම බරපතළ අර්බුදයට පළාත් අධ්‍යාපන දෙපාර්තමේන්තුවේ බලධාරින් සම්පූර්ණයෙන් වගකිව යුතු බවත් මේ සම්බන්ධයෙන් වහාම පරීක්ෂණයක් කළ යුතු බවද අසේල විජේසිංහ සදහන් කරයි.

හිටපු අමාත්‍ය බැසිල් රාජපක්ෂ නීතිවිරෝධීව වත්කම් උපයාගෙන අමෙරිකාවෙන් ගෙයක් අරන් තිබෙන බව හිටපු පාර්ලිමේන්තු මන්ත්‍රී විමල් වීරවංශ පසුගිය 2022 වසරේදී ප්‍රසිද්ධියේ ප්‍රකාශ කළේය.

මෙම ප්‍රකාශය කළේ කොහොමද.? මොන දත්ත පදනම් කරගෙනද.? කවුද තොරතුරු ලබාදුන්නේ.? කවුද එම තොරතුරු තහවුරු කලේ.? ඒ සම්බන්ධයෙන් ඡායාරූප තියෙනවද.? තවත් රහසිගත සාක්ෂි තියනවද.? යන්න මුල සිට අගට ⁣සියලු තොරතුරු හොයන්න CIDයට සුදානම් වේ.

ඒ අනුව අපරාධ පරීක්ෂණ දෙපාර්තමේන්තුවට ජනවාරි මස (03) වනදා පැමිණෙන ලෙස හිටපු පාර්ලිමේන්තු මන්ත්‍රී විමල් වීරවංශට දැනුම් දී ඇති බව වාර්තා වේ.