By unusuma.lk on (LK time)
කෘෂිකර්ම අමාත්‍යාංශය විසින් පසුගියදා කරන ලද සංගණනයේ දත්තවලට අනුව කෘෂි භෝගවලට හානි කරන ප්‍රධානම සත්ව කොට්ඨාශය වන රිලවුන් ලක්ෂ 80 කට වැඩි සංඛ්‍යාවක් සිටින බවට තොරතුරු අනාවරණය වී තිබෙනවා.
මීට අමතරව වඳුරන්ද ලක්ෂ 40 ක් පමණ සිටින බවට හෙළිදරව් වී ඇතැයි අමාත්‍යාංශයේ ආරංචි මාර්ග පවසයි.
ඒ අනුව අනුපාතයක් ලෙස ගත් කළ සෑම මිනිසුන් දෙදෙනෙකුගෙන් එක් අයෙකුට රිලෙවෙකු හෝ වඳුරෙකු වෙන් කළ හැකියි.
කෘෂි භෝග වලට හානි කරන රිළවා, වඳුරා, මොනරා සහ දඬු ලේනා යන සතුන් සම්බන්ධ සංගණනයක් කෘෂිකර්ම අමාත්‍යාංශය ඉකුත් මාර්තු මස 15 වැනිදා පෙරවරු 8 සිට 8.05 දක්වා විනාඩි පහක කාලයක් තුළදී සිදු කෙරුණා.
කැලෑ සහ වනාන්තර ප්‍රදේශ හැර දිවයිනේ ග්‍රාමීය හා නාගරික ප්‍රදේශ සහ වගා බිම් ආශ්‍රිතව මෙම සංගණනය සිදු කළා.
කෙසේ නමුත්, මෙම සංගණනයේ දත්තසම්බන්ධයෙන් ගැටලුකාරී තත්ත්වයක් පවතින බවට තහවුරු වී තිබෙනවා.
ඊට හේතු වී ඇත්තේ ඇතැමුන් රිළවුන් සහ වඳුරන් ගහනය වැඩි අගයකින් සංගණන පත්‍රිකාවේ සඳහන් කර තිබීමයි.
මේ නිසා ගැටලුදායක දත්ත සහිත තොරතුරු යළි නිවැරදි කර ගැනීම සඳහා අදාළ ප්‍රදේශ වලට කෘෂිකර්ම අමාත්‍යාංශයේ නිලධාරීන් යවා නැවතසමීක්ෂණයක් සිදු කිරීම අමාත්‍යාංශය විසින් ආරම්භ කර තිබෙනවා.
ඒ අනුව, මිහින්තලේ, කැකිරාව ආදී ප්‍රදේශ ආශ්‍රිතව එම සමීක්ෂණ කටයුතු පසුගියදා නැවතත් සිදු කෙරුණා.
මේ අනුව, ගැටලුකාරී දත්ත සහිතප්‍රදේශ වල නැවත සමීක්ෂණ කටයුතු ඉදිරි දිනවලදී ද සිදු කිරීමට නියමිතයි.
ගොවීන් විසින් රිළවා සහ වඳුරාගේ ගහනය සම්බන්ධ දත්තනියමිත සංඛ්‍යාවට වඩා කීප ගුණයකින් සඳහන් කර තිබුණද, මොනරා සහ දඬුලේනා යන සතුන්ගේ දත්ත නිවැරදි ලෙස සටහන් කර ඇතැයිද පැවැසෙනවා.
