Local news (Sinhala)

රටේ මහත් ආන්දෝලනයට තුඩුදුන් අපරාධ සිද්ධීන් සම්බන්ධයෙන් වැඩබලන පොලිස්පති නීතිඥ ප්‍රියන්ත වීරසූරියගේ නියෝග මත අපරාධ පරීක්ෂණ දෙපාර්තමේන්තුව මේ වනවිට විමර්ශන ආරම්භ කර ඇත.

පොලිස් මූලස්ථානයේදී මහජන ආරක්ෂක අමාත්‍යාංශ ලේකම් විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්නගේ ප්‍රධානත්වයෙන් දේශපාලන බලපෑම් මත යට ගැසූ එම අපරාධ සම්බන්ධයෙන් විශේෂ සාකච්ඡාවක් පවත්වා ඇත.

මරාගෙන මැරෙන පාස්කු ප්‍රහාරය සම්බන්ධයෙන් විමර්ශන කටයුතු අවසන් කර ඊට සම්බන්ධ සැකකරුවන් සියලුම දෙනා තරාතිරම නොබලා අත්අඩංගුවට ගන්නා ලෙස මෙහිදී අපරාධ පරීක්ෂණ දෙපාර්තමේන්තුව වෙත උපදෙස් ලබාදී ඇත.

තවද මහින්ද රාජපක්ෂ පාලන සමයේ මහත් ආන්දෝලනයට තුඩුදුන් ලසන්ත වික්‍රමතුංග, වසීම් තාජුඩීන් ඝාතන සිද්ධීන්, එක්නැලිගොඩ අතුරුදන් කිරීම සම්බන්ධව නතර වී තිබෙන විමර්ශන නැවත ආරම්භ කිරීමට උපදෙස් ලබාදී ඇත.

එක්සත් ජනතා නිදහස් සන්ධානයට ඉදිරි මහ මැතිවරණයට තරග කිරීමට අවස්ථාව නොදී අක්‍රීය කිරීමට මැතිවරණ කොමිසම තීරණය කර ඇත.

පක්ෂයේ ලේකම් ධූර සම්බන්ධයෙන් මතුව ඇති ගැටලු නිරාකරණය කර ගැනීමට අපොහොසත් වීම හේතුවෙන් මෙම තීරණයට එළැඹි බව මැතිවරණ කොමිසම සදහන් කරයි.

මේ අතර ඊලවර් ප්‍රජාතන්ත්‍රවාදී පෙරමුණ, එක්සත් ලංකා පොදුජන පක්ෂය, එක්සත් ලංකා මහා සභා පක්ෂය, ලංකා ජනතා පක්ෂය, ශ්‍රී ලංකා ප්‍රගතිශීලි පෙරමුණට ද මැතිවරණයට තරග කිරීමට අවස්ථාව නොලැබෙනු ඇත.

පාර්ලිමේන්තුවේ සිටි ප්‍රබල මන්ත්‍රීවරුන් රැසක් පැවැත්වීමට නියමිත මහ මැතිවරණයට තරඟ නොකර දේශපාලනයෙන් ඉවත් වීමට තීරණය කර ඇති බව වාර්තා වේ.

ඒ අනුව හිටපු ජනාධිපති මෛත්‍රීපාල සිරිසේන, හිටපු අමාත්‍ය චමල් රාජපක්ෂ, හිටපු අමාත්‍ය අලි සබ්රි, හිටපු අමාත්‍ය බන්දුල ගුණවර්ධන, හිටපු කතානායක මහින්ද යාපා අබේවර්ධන, ගාමිණී ලොකුගේ, තිස්ස විතාරණ, ජෝන් සෙනෙවිරත්න මහ මැතිවරණයට තරඟ නොකර සිටීමට තීරණය කර ඇති බව වාර්තා වේ.

කොළඹ අපරාධ කොට්ටාසයේ සේවය කළ නිලධාරින් පිරිසක් මේ වනවිට රට හැරයෑමට සූදානම්‍ වන බව වාර්තා වේ.

සංවිධානාත්මකව කර ඇති විවිධ අපරාධ සහ විවිධ පාර්ශවල කොන්ත්‍රාත් පිළිබඳව විමර්ශන ආරම්භ කිරීමට වැඩ පොලිස්පතිවරයා කටයුතු සැලසුම් කිරීමත් සමග එම නිලධාරින් රට හැරයෑමට සූදානම්‍ වන බව වාර්තා වේ.

අපරාධ කොට්ඨාසය නව අධ්‍යක්ෂවරයෙක් යටතට පත්කර එළඹෙන සතිය තුළම විවිධ අපරාධ සහ විවිධ පාර්ශවල කොන්ත්‍රාත් පිළිබඳව විමර්ශන ආරම්භ කිරීමට වැඩ බලන පොලිස්පතිවරයා සැලසුම් කර ඇත.

එළඹෙන සතියේ විමර්ශන ආරම්භ කිරීමට සූදානම් හෙයින් එම නිලධාරීන් මේ වනවිට දැඩි ලෙස නොසන්සුන් වී ඇති බවත් ඇතැම් විමර්ශන පිළිබඳ ඉතාම සංවේදී ලේඛන විනාශ කිරීමට උත්සාහ කරන බවද වාර්තා වේ.

පැවැත්වීමට නියමිත මහ මැතිවරණයේදී තමාව පාර්ලිමේන්තුවට යෑම වැළැක්වීමේ වැඩපිළිවෙලක් ක්‍රියාත්මක වන බව සමගි ජන බලවේග හිටපු මන්ත්‍රී හර්ෂද සිල්වා සදහන් කරයි.

තමන්ව කොළඹ දිස්ත්‍රික්කයෙන් පරාජයට පත් කිරීම ඔවුන්ගේ අරමුණ වී ඇති බවත් මේ වනවිට තමාට හතර වටෙන්ම පහර දෙමින් සිටින බවද හිටපු මන්ත්‍රී හර්ෂද සිල්වා සදහන් කරයි.

කොළඹ පැවති මාධ්‍ය හමුවක් අවසානයේදී හිටපු මන්ත්‍රී හර්ෂද සිල්වා මේ බව සදහන් කරයි.

තනතුර අතහැර පළාගිය හිටපු ජනාධිපති ගෝඨාභය රාජපක්ෂගේ පසුගිය රජය සමයේ හිටපු අමාත්‍ය ජොන්ස්ටන් ප්‍රනාන්දුට ගිනි අවි 8ක් ලබාදී ඇත.

ඒ අනුව හිටපු අමාත්‍ය ජොන්ස්ටන් ප්‍රනාන්දු මිලිමීටර් 9 වර්ගයේ පිස්තෝල තුනක් සහ බෝර රිපීටර් පහක් ඇතුළුව ගිනි අවි 8ක් පසුගිය රජයෙන් ලබාගෙන ඇත.

පසුගිය රජය රට පුරා පුද්ගලයින් 1,500කට ගිනි අවි 1,690ක් නිකුත් කළ අතර එම සියලුම පුද්ගලයින්ට නොවැම්බර් (07) වනදා වනවිට සියලු ආයුධ ආපසු ලබාදෙන ලෙස දන්වා ඇත.

එම ගිනි අවි නැවතත් ලබානොදීමට කටයුතු කරන සියලුම පුද්ගලයින්ට එරෙහිව නීතිමය ක්‍රියාමාර්ග ගන්නා බවට ආරක්ෂක අමාත්‍යාංශය අනතුරු අඟවා ඇත.

මේ වනවිට වෙළඳපොලේ රුපියල් 100කට අලෙවි කරන 500ml ජල බෝතලයක් රුපියල් 70කට ලබාදිය හැකි බව මධ්‍යම පළාත් ස්වභාවික ඛනිජ ජලය නිෂ්පාදකයින්ගේ සංගමය සදහන් කරයි.

රට පුරා සිටින ජාවාරම්කරුවන් හේතුවෙන් ජල බෝතල් විවිධ මිල ගණන් වලට අලෙවි වන බවද මධ්‍යම පළාත් ස්වභාවික ඛනිජ ජලය නිෂ්පාදකයින්ගේ සංගමය සදහන් කරයි.

එනිසා වහාම පානීය ජල බෝතල් සදහා පාලන මිලක් පැනවිය යුතු බව මධ්‍යම පළාත් ස්වභාවික ඛනිජ ජලය නිෂ්පාදකයින්ගේ සංගමයේ කැඳවුම්කරු සපුමල් කුමාර සදහන් කරයි.

මහනුවර පැවති මාධ්‍ය හමුවකට එක්වෙමින් එම සංගමයේ කැඳවුම්කරු සපුමල් කුමාර මේ බව සදහන් කරයි.