Local news (Sinhala)

ගණේමුල්ල සංජීව නමැති පාතාලකරුගේ ඝාතනය සම්බන්ධයෙන් කොළඹ අධිකරණයේදී චෝදනා ලබා සැඟවී සිටින ඉෂාරා සෙව්වන්දි නම් කාන්තාව පසුගිය මැයි 06 දින කුලියාපිටිය පොලිසිය විසින් අත්අඩංගුවට ගෙන ඇත.

කෙසේ වෙතත්, පරීක්ෂණවලදී ඇත්තේ ඇය ගනේමුල්ල සංජීව ඝාතන සිදිධියට චෝදනා ලත් ඉෂාරා සෙව්වන්දි නොවන බවයි.

ඒ බව තහවුරු වීමෙන් පසු ඇය නිදහස් කර ඇත.

මෙම අත්අඩංගුවට ගැනීම සිදුව ඇත්තේ කුලියාපිටිය ඉඩම් රෙජිස්ට්‍රාර් කාර්යාලය විසින් පොලීසියට සිදුකළ දැනුම්දීමකට අනුවයි.

වයස අවුරුදු 32ක් වන ඉෂාරා නමැති කාන්තාව ඉඩමක් සම්බන්ධයෙන් පත්ඉරු ලබා ගැනීමට පැමිණි අවස්ථාවේදී, කාර්යාලයේ නිලධාරීන් ඇයගේ නම ඉෂාරා සෙව්වන්දි ලෙස සටහන්ව තිබීම හේතුවෙන් සැකයට භාජනය වී ඇත.

නිලධාරීන් ඇයගේ හැඳුනුම්පත ද පරීක්ෂා කර ඇති අතර, ඇය කටාන පොලිස් වසමේ කිඹුලාපිටිය ප්‍රදේශයේ වීම හේතුවෙන් නිලධාරීන්ගේ සැකය තවත් වැඩිවී තිබේ.

ඉන් අනතුරුව නිලධාරීන් පොලිසියට දැනුම් දී ඇති අතර, පොලිසිය වහාම ක්‍රියාත්මක වී ඇය අත්අඩංගුවට ගෙන විමර්ශන ආරම්භ කර ඇත.

කොළඹ පොලිස් අපරාධ කොට්ඨාසය ඇතුළු ආයතන ගණනාවකට තොරතුරු යවා ඇති අතර, ඡායාරූප විවිධ තාක්ෂණික මෘදුකාංග ඔස්සේ විශ්ලේෂණය කිරීමෙන් පසු මෙම ඉෂාරා සෙව්වන්දි නමැති කාන්තාව, ගණේමුල්ල සංජීව ඝාතනයට සම්බන්ධ චෝදනා ලත් ඉෂාරා සෙව්වන්දි නොවන බව තහවුරු කරගෙන ඇත.

ඉන්පසු පොලිසිය ඇයගේ ප්‍රකාශ සටහන් කරගෙන ඇය නිදහස් කර ඇත.
විමර්ශනයට භාජනය වූ ඉෂාරා සෙව්වන්දි මාධ්‍ය වෙත ප්‍රකාශ කරමින් සඳහන් කර ඇත්තේ, තමාගේ නම සහ පෙනුම අපරාධකාරියකගේ නමට සමාන වීම නිසා පොලිසියට කැඳවා විමර්ශනයක් සිදු කළ බවයි.

ප්‍රජාතන්ත්‍රීය ප්‍රතිසංස්කරණ හා මැතිවරණ අධ්‍යන ආයතනයේ විධායක අධ්‍යක්ෂ මංජුල ගජනායක මහතා පවසන්නේ එක් දේශපාලන පක්ෂයකට පළාත් පාලන ආයතනයක 50%ට වඩා බලය හිමි නැති අවස්ථාවලදී සභිකයන්ගේ ඡන්දයකින් නගරාධිපති හෝ සභාපතිවරයා තෝරාපත් කරගත හැකි බවයි.

පළාත් පාලන කොමසාරිස්වරයා විසින් කැඳවනු ලබන පළමු රැස්වීමේදී මෙම පත්කිරීම් සිදුවන්නේ යැයි ද එසේ පළාත් පාලන ඡන්දයෙන් 50%ට වඩා බලය හිමි නොවූ ආයතනවලට බහුතර සභිකයන්ගේ කැමැත්තෙන් වුව නගරාධිපති හෝ සභාපති පත්කරගත හැකි බව ඔහු සඳහන් කළේ ය.

පළාත් පාලන ඡන්දයේදී 50%ට වඩා සභිකයන් හිමි කරගත් දේශපාලන පක්ෂවලට අදාළ පළාත් පාලන ආයතනයේ සභාපති හෝ නගරාධිපති ධුරයට කෙනෙකු පත්කිරීමට එම පක්ෂවල ලේකම්වරයාට අයිතිය ඇතැයි ද ඔහු අවධාරණය කළේ ය.

බහුතර බලය හිමි නැති අවස්ථාවකදී පළාත් පාලන කොමසාරිස්වරයාගේ ප්‍රධානත්වයෙන් කෙරෙන අදාළ ඡන්ද විමසීමේදී ධුරය සඳහා කීප දෙනෙකු ඉදිරිපත් වුවහොත් හා ඡන්ද සම අවස්ථාවක් උද්ගත වුවහොත් කුසපත් ඇදීමේ ක්‍රමය පවා භාවිත කරන්නේ යැයි අධ්‍යක්ෂකවරයා කීවේය.

ඔහු එම කරුණ මෙසේ පැහැදිලි කළේ ය.

“නිදසුනකට ජාතික ජන බලවේගයට බහුතරය තියෙනවා නම් කිසි අවුලක් නෑ. ජාජබ ලේකම්ගෙන් අහලා සභාපතිගේ නම ගැසට් කරනවා. බහුතරය දිනුවාට මේ මැතිවරණ ක්‍රමය අනුව සභාපති ධූරය තියෙන්නේ වැට උඩ. පළාත් පාලන ආයතනයේ පළමු රැස්වීම පවත්වන්නේ පළාත් පාලන කොමසාරිස්ගේ ප්‍රධානත්වයෙන්.

ඔහුගේ බලය අභිනියෝජනය කරන්න බෑ. එනිසා ඔහු ඊට සහභාගී විය යුතුමයි. එතැනදී සභාපති සඳහා නාමයෝජනා දෙනවා. යෝජනා ස්ථිර කරනවා. එක්කෙනෙක් නම් පැහැදිලියි. දෙන්නෙක් ඉල්ලලා ඡන්ද සම වුණොත් කුසපත් අදිනවා. ඊට පස්සේ 3ක් ඉල්ලනවා කියල හිතමු. එක්කෙනෙක්ට ඡන්ද 10ක් තව කෙනෙක්ට ඡන්ද 5ක් හා තව කෙනෙක්ට 5ක්. එතැනදි 10 ගත්ත කෙනා පැත්තකින් තියලා පහ පහ ගත්ත අය අතරේ කුසපත් අදිනවා.

එයින් තේරෙන කෙනා හා 10 ගත්ත කෙනා අතර නැවත වරක් ඡන්දයක් විමසනවා. එතැනදිත් සමාන වුණොත් කුසපත් අදිනවා. හැම වෙලේ ම කෙනෙක් හලමින් ඉදිරියට ගිහින් තමයි බහුතරය ගත්ත කෙනා හොයන්නේ. මේ ඡන්ද ප්‍රතිඵලයේ ප්‍රක්ෂේපණය අනුව පළාත් පාලන කොමසාරිස්වරු වඩාත් කාර්යබහුල වෙන්නත් ඉඩ තියෙනවා. පළමු රැස්වීමේදී කරන්නේ සභාපති හා උප සභාපති තෝරන එක විතරයි.”

අද (07) පෙරවරුවේ ප්‍රවෘත්ති සාකච්ඡාවක් පවත්වමින් සමගි ජන බලවේගයේ මහ ලේකම් රංජිත් මද්දුමබණ්ඩාර මහතා පවසන්නේ විපක්ෂයේ සියලු කණ්ඩායම් සමඟ එක්ව කොළඹ මහ නගර සභාව සඳහා සමගි ජන බලවේගයෙන් නගරාධිපතිවරයෙක් පත්කර ගන්නා බවයි.

එහිදී වැඩිදුරටත් අදහස් දැක්වූ සජබ මහ ලේකම්වරයා,

“මේ මැතිවරණයේදී විපක්ෂයේ සියලු පක්ෂ තමන්ගේ ඡන්ද ප්‍රතිශතය වැඩිකරගෙන තියෙනවා. ඒ කියන්නේ ආණ්ඩුවට මහ මැතිවරණයේ තිබුණු ජනවරම මේකෙදි අහෝසි කරලා තියෙනවා. ඒ කියන්නේ විපක්ෂය ලැබූ ජයග්‍රහණයක්. මාස 05කින් මේ රටට එපා වුණ ආණ්ඩුවක් විදිහට තමයි මේ ජනතා විමුක්ති පෙරමුණේ ආණ්ඩුව අපි දකින්නේ. අපි පැහැදිලිව ආණ්ඩුවට පෙන්නවා ඉදිරියේදී මේ පළාත් පාලන ආයතන පිහිටුවද්දි විපක්ෂයේ කාණ්ඩයන් සියල්ල එක්තුකරලා පළාත් පාලන ආයතන විශාල ප්‍රමාණයක් අපි පිහිටුවන්න යනවා”

මේ අතර සජබ කොළඹ මහ නගර සභාවේ පුරපති අපේක්ෂකයා ආචාර්ය, රුවේස් හනීෆා මහතා බව දේශපාලන ආරංචි මාර්ග සඳහන් කරයි.

පුරපති ධුරය සඳහා ආචාර්ය, රුවේස් හනීෆා මහතා තෝරා ගැනීමට විපක්ෂයේ අනෙකුත් පක්ෂවල සහාය ලබාගැනීමට සජබ සාකච්ඡා කරමින් පවතින බවද වාර්තා වෙයි.

මේ අතර කොළඹ දිස්ත්‍රික්කයේ පළාත් පාලන ආයතන 13ම ජය ගැනීමට ජාතික ජන බලවේගය සමත් වුවද, කොළඹ මහනගර සභාව, කොළොන්නාව සහ සීතාවකපුර නගර සභා මෙන්ම සීතාවක ප්‍රාදේශීය සභාවේ බහුතර බලය හිමිකර ගැනීමට ඔවුන්ට නොහැකි විය.

කොළඹ මහනගර සභාව සඳහා ජාතික ජන බලවේගය නියෝජනය කරමින් මන්ත්‍රී ධුර 48ක් තේරී පත්විය.

නමුත් සමගි ජන බලවේගය, එක්සත් ජාතික පක්ෂය, ශ්‍රී ලංකා පොදුජන පෙරමුණ, ශ්‍රී ලංකා මුස්ලිම් කොංග්‍රසය, ස්වාධීන කණ්ඩායම් 3 සහ සර්වජන බලය යන පක්ෂ අතර බෙදී ගිය මන්ත්‍රී ධුර සංඛ්‍යාව 69කි.