No use

හිටපු ජනාධිපති මහින්ද රාජපක්ෂගේ වීරකැටිය කාල්ටන් වත්තට විදුලිය සපයා තිබූ තෙකලා විදුලි රැහැන් කිහිපයක් අද (05) දින දහවල් විදුලි බල මණ්ඩලයේ සේවකයින් විසින් ඉවත් කර ඇත.

මන්ත්‍රී ප්‍රතිපාදන යටතේ ලබාදී තිබූ පහසුකම් ඉවත් කිරීමට නව ආණ්ඩුව ගත් තීරණය යටතේ වීරකැටිය කාල්ටන් වත්තට විදුලිය සපයා තිබූ විදුලි රැහැන් දෙකක් ඉවත් කිරීමට කටයුතු කර ඇත.

හිටපු ජනාධිපතිවරයාගේ කාල්ටන් වත්තට තෙකලා විදුලි රැහැන් 03ක් ඇද තිබූ අතර ඉන් දෙකක් ඉවත් කිරීමට විදුලි බල මණ්ඩලයේ සේවකයින් කටයුතු කර ඇත.

රජයේ සංස්ථා මණ්ඩල රැසක සභාපතිවරුන් සහ අධ්‍යක්ෂවරුන් පිරිසක් ඉවත්ව ‌ගොස් ඇතත් තවත් සමහර ආයතනවල සභාපතිවරුන් සහ අධ්‍යක්ෂවරුන් රැඳී සිටින බව වාර්තා වේ.

ඒ අනුව සංස්ථා මණ්ඩලවල සභාපතිවරුන් සහ අධ්‍යක්ෂවරුන්ට එම තනතුරුවලින් වහාම ඉවත් වන ‌ලෙසට රජය දැනුම්දී ඇති බව වාර්තා වේ.

තවද අමාත්‍යංශ යටතේ පවතින ආයතනවල අධ්‍යක්ෂ මණ්ඩල රැස්වීම් තාවකාලිකව අත්හිටුවන ‌ලෙසට අග්‍රාමාත්‍ය ලේකම් ප්‍රදීප් සපුතන්ත්‍රි විසින් එම අමාත්‍යාංශ ලේකම්වරුන්ට දැනුම් දී ඇත.

රට විරුවන්ට විද්‍යුත් වාහන බලපත්‍ර ගෙන්වීමට අවසර ලබාදීමේදී රුපියල් කෝටි ගණනක දූෂණ වංචා සහ ආක්‍රමිකතා රැසක් සිදුව ඇති බවට ජාතික විගණන කාර්යාලය පැවැත්වූ අලුත්ම වෝහාරික විගණනයේදි තොරතුරු අනාවරණය වී ඇත.

මේ සම්බන්ධයෙන් විශේෂ වාර්තාවක් විගණකාධිපති ඩබ්ලිව්. පී.සී වික්‍රමරත්න විසින් පාර්ලිමේන්තු ප්‍රධානීන්ට පසුගියදා බාරදුන් අතර පාර්ලිමේන්තු ප්‍රධානීන් සදහන් කළේ, නව පාර්ලිමේන්තුව ස්ථාපනය කළ පසු එම වාර්තාව සභාවට ඉදිරිපත් කිරීමට බලාපොරොත්තු වන බවයි.

විදේශගත ශ්‍රමිකයින්ට විද්‍යුත් වාහන ගෙන්වීමට අවසර දුන් අවස්ථාව අවභාවිත කරමින් රුපියල් කෝටි 120කට ආසන්න ‌වටිනාකමකින් විදුලි මෝටර් රථ 119ක් ගෙන්වා ඇති බව පාර්ලිමේන්තුවේ ක්‍රම සහ විධි පිළිබඳ කාරක සභාවේදී පසුගියදා අනාවරණය විය.

නාමයෝජනා භාර ගැනීමේ දිනවලදී මහමග රතිඤ්ඤා දල්වා ජනතාවට පීඩාවන ආකාරයෙන් කටයුතු කරන පුද්ගලයින් අත්අඩංගුවට ගන්නා බව පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව සදහන් කරයි.

තවද ශබ්ද විකාශන යන්ත්‍ර භාවිතා කරන්නේ නම් ඒ සදහා බලපත්‍ර ලබා ගැනීම අනිවාර්ය බවද පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව සදහන් කරයි.

කොළඹ පැවති ප්‍රවෘත්ති සාකච්ඡාවකට එක්වෙමින් පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව මේ බව සදහන් කරයි.