No use

පසුගිය දිනෙක මෙරට නම ගිය කෝටිපති ව්‍යාපාරිකයකු පසුගියදා විපක්ෂයේ ප්‍රධාන දේශපාලන පක්ෂ කාර්යාලයකට කඩා වැදී එහි කලබල කර ඇතැයි වාර්තා වේ.

ඒ තමාට ජාතික ලැයිස්තු මන්ත්‍රී ධුරයක් දෙන බව පවසා පක්ෂයේ ප්‍රධානියකු කෝටි 50ක මුදලක් ලබාගෙන මන්ත්‍රී ධූරය නොදුන් බැවින් තම මුදල් වහා ආපසු ලබාදෙන ලෙස ඉල්ලමිනි.

ජාතික ලැයිස්තු මන්ත්‍රී ධූරයක් දෙන බව පවසා කෝටි 50ක මුදල මෙලෙස ලබාගෙන ඇතැයි පැවසෙන්නේ පසුගිය වකවානුවේ මහත් කතාබහට ලක්වූ මෙරට ප්‍රධාන පෙළේ කෝටිපති ව්‍යාපාරිකයකුගෙන් බව වාර්තා වේ.

කෙසේවෙතත් මෙම සිද්ධියෙන් එම කාර්යාලයේ දැඩි නොසන්සුන් තත්වයක් ඇතිවී ඇති අතර කාර්‍යමණ්ඩලය දැඩි අපහසුතාවකට පත්වූ බව වාර්තා වේ.

කෙසේවෙතත් අදාල ව්‍යාපාරිකයා එම පක්ෂයේ හිටපු මන්ත්‍රීවරයකු හෝ ආසන සංවිධායකවරයෙකු හෝ නොවන නමුත් එම පක්ෂ ජාතික ලැයිස්තුවේ සිටි පුද්ගලයෙකි.

ව්‍යාපාරිකයා පක්ෂ කාර්යාලයට පැමිණ මේ සම්බන්ධයෙන් දැඩිව චෝදනා කළ අවස්ථාවේදී එහි සිටි නිලධාරීන් ” ඔය ගැන අපි මොකුත් දන්නෙ නෑ. ඕක ඔබතුමා ඒ සල්ලි ගත්තු අයගෙන්ම බේර ගත්තොත් තමයි හොඳ ” යනුවෙන් පවසා ඇතැයි ආරංචි මාර්ග පවසයි.

අනතුරුව ව්‍යාපාරිකයා ” මම ඕක බේරගන්නම්කෝ” යනුවෙන් පවසා එම ස්ථානයෙන් පිටව ගොස් ඇත. ව්‍යාපාරිකයා මෙම චෝදනාව එල්ල කරන්නේ එම පක්ෂයට බොහොම ළඟින් ක්‍රියාකාරීව සම්බන්ධව සිටින තවත් ධනපති ව්‍යාපාරිකයකුට බව සඳහන් කළේය.

ව්‍යාපාරිකයාගේ මෙම කරුණු අනාවරණයත් සමඟ එම පක්ෂය තුළ දැඩි අර්බුදකාරී තත්වයක් මතුව එහි ආරංචි මාර්ග ඇතැයි වාර්තා වේ.

News Source – Lankadeepa

ගලෙන්බිඳුණුවැව අලුත් දිවුල්වැව ජලාශයේ දකුණු සොරොව්ව වෙත ගමන් කිරීමට සකසා ඇති පස් බැම්මේ ජල කාන්දුව ඇති බව ඊයේ පෙරවරුවේ හඳුනාගෙන තිබූ අතර පසුව වාරිමාර්ග දෙපාර්තමේන්තුව යුද හමුදාව, පොලීසිය හා ගම්වාසීන්ගේද සහාය ඇතිව ජල කාන්දුව වසාදැමීමට දැඩි උත්සාහයක නිරත වුණි. 

ඒ අනුව ඊයේ පස්වරුව වන විට වැලි කොට්ට යොදමින් පස් බැම්මේ ජලය කාන්දුවෙන ස්ථානය වසා දැමීමට හැකියාව ලැබුණද එහි අවධානම දෙගුණ කරමින් වැව් බැම්මේ බිඳීගිය ස්ථානයේ ජල කාන්දුව මේ වනවිට යළි ආරම්භ වී ඇති බව වාර්තා වෙයි.

ජලාශයේ සොරොව්ව පිහිටි ස්ථානය අඩි 27ක පමණ ගැඹුරින් යුතු වීම හේතුවෙන් එම ස්ථානයේ ජල පීඩනයද ඉතා ඉහළ මට්ටමක පවතින බවත් එම නිසා වැව් බැම්ම කැඩී යෑමට ඇති අවදානම ද තවදුරටත් ඉහළ ගොස් ඇති බවත් වාරිමාර්ග දෙපාර්තමේන්තුව පවසයි.

වාරිමාර්ග දෙපාර්තමේන්තුව පවසන්නේ යම් හෙයකින් වැව් බැම්ම කැඩී ගියහොත් ගම්මාන රැසකටම බලපෑම් එල්ලවිය හැකි බැවින් මේ වනවිටත් ගම්මානයේ පවුල් 30ක් සිය නිවාසවලින් ඉවත්කර ආරක්ෂිත ස්ථාන වෙත යොමුකර ඇති බවයි.

ජාතික ඔලිම්පික් කමිටුවේ මහලේකම් මැක්ස්වෙල් ද සිල්වා මහතාට එරෙහිව ලැබී ඇති චෝදනා කිහිපයක් මූලික කරගනිමින්, සිය ධුරය අත්හිටුවීමට පියවර ගෙන තිබේ.

ක්‍රීඩා අමාත්‍ය සුනිල් කුමාර ගමගේ මහතාගේ නියෝගයට අනුව ඔහු සම්බන්ධයෙන් වන පරීක්ෂණ අවසන් වන තෙක් ඔහුගේ ධුරය අත්හිටුවීමට මෙලෙස කටයුතු කර තිබේ.

ජාතික ඔලිම්පික් කමිටුවේ මහලේකම් මැක්ස්වෙල් ද සිල්වා ඇතුළු නිලධාරීන්ට දිගින් දිගටම එල්ල වූ චෝදනා වූයේ, කාලයක සිට මානව සහ භෞතික සම්පත් අවභාවිත කරමින් ඔලිම්පික් කමිටුවේ අරමුදල් අනිසි ලෙස වැයකරන බවයි.

ඒ අනුව මැක්ස්වෙල් ද සිල්වාගේ ධුරය වහාම ක්‍රියාත්මක වන පරිදි අත්හිටුවන ලෙස ජාත්‍යන්තර ඔලිම්පික් කමිටුව ජාතික ඔලිම්පික් කමිටුවට දන්වා තිබූ අතර එසේ නොකළහොත් ශ්‍රී ලංකාවට එරෙහිව දැඩි ක්‍රියාමාර්ග ගැනීමට සිදුවන බවත් ඔවුන් අදාළ ලිපිය මගින් අවවාද කර තිබුණි. 

ඒ අනුව ක්‍රීඩා අමාත්‍යාංශය කළ විමර්ශන වාර්තාවක් පදනම් කරගනිමින්, ජාතික ඔලිම්පික් කමිටු ලේකම් තහනමකට ලක්කර අභ්‍යන්තර විමර්ශනයක් සිදුකළ යුතු බවට ජාතික ඔලිම්පික් කමිටුවේ ආචාරධර්ම කමිටුව ද නිර්දේශ කළ නමුත් ඊට නිසි ප්‍රතිචාරයක් දැක්වීමට ජාතික ඔලිම්පික් කමිටුව අපොහොසත් වීමෙන් පසුගිය නොවැම්බර් 5 වැනිදා ජාත්‍යන්තර මෙරට ඔලිම්පික් කමිටුවට ලබාදෙන සියලු මූල්‍ය ප්‍රතිපාදන අත්හිටුවීමට පියවර ගත්තේය.

ඊයේ (10) රාත්‍රියේ බොරැල්ලේ පිහිටි මහල් 24කින් යුත් මහල් නිවාස සංකීර්ණයක 12වන මහලෙන් ඇද වැටී සිදුවූ අනතුරකින් වයස අවුරුදු 16ක දැරියක් මියගොස් ඇති බව පොලීසිය පවසයි.

මෙම අනතුරෙන් බරපතළ තත්ත්වයෙන් පසුවූ ඇය කොළඹ ජාතික රෝහලට ඇතුළත් කිරීමේදී මියගොස් ඇති බව වාර්තා වේ.

එලෙස මියගිය දැරිය බොරැල්ල ප්‍රදේශයේ පදිංචිකාරියක් වන අතර, කලක සිට මානසික ආතතිය මත වෛද්‍ය ප්‍රතිකාර ලබමින් සිට ඇතිබව ඇගේ මව විසින් ප්‍රකාශ කර ඇත.

කෙසේවෙතත් පොලිසිය විසින් දැරිය එම මහලේ බැල්කනියෙන් බිමට පැන ඇතිද, නැතහොත් වැටී ඇතිද යන්න පිළිබඳව විමර්ශන සිදුකරමින් සිටින අතර, මෙම සිදුවීම පිළිබඳව වැඩිදුර විමර්ශණ ක්‍රියාත්මක කර ඇත.