රජයේ වෛද්ය නිලධාරීන්ගේ සංගමය විසින් ආරම්භ කළ වැඩ වර්ජනයට කිසිදු සාධාරණ පදනමක් නොමැති බව සෞඛ්ය අමාත්ය නලින්ද ජයතිස්ස සඳහන් කරයි.
එය හුදෙක් දේශපාලනිකව රජය අපහසුතාවයට පත් කිරීමේ චේතනාවෙන් සිදු කරන්නක් බවද සෞඛ්ය අමාත්ය නලින්ද ජයතිස්ස සඳහන් කරයි.
සීමාවාසික පුහුණුව අවසන් කළ නවක වෛද්යවරුන් 453 දෙනෙකුට රජයේ සේවයට එක්වීමට ඇති අවස්ථාව GMOA විසින් අවහිරකර ඇති බවද අමාත්යවරයා සඳහන් කරයි.
එහෙත් සීමාවාසික වෛද්යවරුන්ට රජයේ සේවයට ඇතුළත් වීම සඳහා අයදුම් කිරීමට ලබාදී ඇති කාලය එළැඹෙන සෙනසුරාදා දහවල් 12.00න් අවසන් වන බවද අමාත්යවරයා සඳහන් කරයි.
එළැඹෙන සෙනසුරාදා දහවල් 12.00න් පසුව දිනය කිසිසේත්ම දීර්ඝ නොකරන බැවින් කාගෙවත් තර්ජනයට හෝ කාගෙවත් විකෘති සහගත ප්රකාශ වලට අහුවෙන්නේ නැතුව ඉල්ලුම් කරන ලෙසද අමාත්යවරයා සඳහන් කරයි.
යම් හෙයකින් වෛද්යවරුන්ට පත්වීම් ලබා ගැනීමට බාධා කරන හෝ තර්ජනය කරන කණ්ඩායම් සිටී නම්, ඒ පිළිබඳව වහාම සෞඛ්ය අමාත්යාංශයට දැනුම් දෙන ලෙසද අමාත්යවරයා සඳහන් කරයි.
අමාත්ය නලින්ද ජයතිස්ස සඳහන් කළේ,
“මේ වැඩ වර්ජනයට කිසිදු පදනමක් නෑ. මොකක්හරි හේතුවක් අල්ලගෙන දේශපාලනිකව ආණ්ඩුව අපහසුතාවයට පත්කිරීමේ වුවමනාව හැර, රජයේ වෛද්ය නිලධාරීන්ගේ සංගමයට මේ වැඩ වර්ජනය කරන්න කිසි සාධාරණ හේතුවක් තිබුණේ නැහැ.”
“මේකට කිසිඳු පදනමකුත් නැහැ. මේකෙන් කාටවත් සුගතියක් වෙන්නෙත් නැහැ. සෙනසුරාදා දවල් 12.00 වෙනකොට රජයේ සේවයට ඇතුළත් කිරීම සඳහා යම්කිසි වෛද්යවරයෙක් නේවාසික පුහුණුවෙන් පසුව ඉල්ලුම් කරේ නැත්නම්, ඔහුට රජයේ සේවයට ඇතුළත් වෙන්න බැහැ.
දැන් ඒ අය ඉන්න රෝහල්වලින් ඒ අයගේ සේවාව අවසන් වෙනවා. ඊළඟට ඒ අයගේ වැටුප් නතර වෙනවා. එතකොට ඒ අයට සිද්ධවෙන්නේ උපාධිය ලබාගෙන සීමාවාසික පුහුණුව අවසන් කරලා, ශ්රී ලංකා වෛද්ය සභාවේ ලියාපදිංචි වෙච්ච වෛද්යවරු හැටියට පුද්ගලික සේවයේ නිරත වෙන්න.
ඉල්ලුම් නොකරපු කිසිම කෙනෙක්ට රාජ්ය සේවයට ගන්න හැකියාවක් නැහැ. ඒ නිසා පශ්චාත් සීමාවාසික වෛද්යවරුන්ට මේ කියන්නේ, ඔබ කිසිවෙකුට බය වෙන්න එපා.
ඔබට කවුරුහරි කණ්ඩායමක් හැටියට හෝ පුද්ගලයෝ හැටියට රජයේ සේවයට ඇතුලත් කිරීම සඳහා අයදුම් කිරීමට එරෙහිව ඔබව බියගන්වන ආකාරයට යම් තර්ජනයක් කරලා තිබෙනවා නම්, වහාම සෞඛ්ය අමාත්යාංශයට ඒ ගැන පැමිණිලි කරන්න.”
