හෝමාගම පොලිස් අත්අඩංගුවේ සිටියදී සැකකරුවෙකු මියයාමේ සිද්ධිය සම්බන්ධයෙන් අත්අඩංගුවට ගත් හෝමාගම පොලිසියේ අපරාධ අංශයේ ස්ථානාධිපතිවරයා අද (29) දින අධිකරණයට ඉදිරිපත් කළේය.
අධිකරණයට ඉදිරිපත් කිරීමෙන් අනතුරුව හෝමාගම පොලිසියේ අපරාධ අංශයේ ස්ථානාධිපතිවරයා ලබන නොවැම්බර් මස (12) වැනිදා දක්වා රක්ෂිත බන්ධනාගාරගත කර ඇත.
බස්නාහිර පළාත දකුණ දිසා අපරාධ කොට්ඨාසයේ නිලධාරීන් විසින් ඔහු ඊයේ (28) පස්වරුවේ අත්අඩංගුවට ගත් අතර ඔහු හොරණ, බැල්ලපිටිය ප්‍රදේශයේ පදිංචි අයෙකු වේ.
මෙම සිද්ධිය සම්බන්ධයෙන් අදාළ අපරාධ අංශ ස්ථානාධිපතිවරයාගේ සේවය පසුගිය (26) වැනිදා සිට අත්හිටුවීමට පියවර ගත් අතර තවද එම පොලිස් ස්ථානයේ උප පොලිස් පරීක්ෂකවරයෙකුගේ සහ පොලිස් සැරයන්වරයෙකුගේ සේවය අත්හිටුවා ඇත.
