වැඩිහිටියන්ගේ ආරක්ෂාව තහවුරු කර ගැනීමට අවශ්ය ක්රියාමාර්ග ගන්නා ලෙස පොලිසිය මහජනතාවගෙන් ඉල්ලීමක් කර ඇත.
දරුවන් රැකියා සඳහා පිටත්ව යාම, විදේශගත වීම හෝ වෙනත් පළාත්වල පදිංචි වීම හේතුවෙන් වැඩිහිටියන් නිවෙස්වල තනිව සිටීමේ අවස්ථා ඉහළ ගොස් ඇති බව පොලීසිය සඳහන් කරයි.
මත්ද්රව්ය වලට ඇබ්බැහි වූ පුද්ගලයන් මුදල් සහ රන් භාණ්ඩ කොල්ලකෑමේ අරමුණින් මෙවැනි නිවාස ඉලක්ක කර ගන්නා බවත් ඇතැම් අවස්ථාවල එවැනි අපරාධ ඝාතන දක්වා වර්ධනය වන බවද පොලීසිය සඳහන් කරයි.
එනිසා වැඩිහිටියන් රැකබලා ගැනීමට බාහිර පුද්ගලයන් හෝ ගෘහ සේවකයන් යොදා ගැනීමේදී ඔවුන්ගේ පසුබිම පරීක්ෂා කර පොලිස් වාර්තාවක් ලබාගැනීම වැදගත් බවද පොලීසිය අවධාරණය කරයි.
හදිසි අවස්ථාවකදී ඇමතීම සඳහා 119 පොලිස් හදිසි ඇමතුම් අංකය, 1990 සුවසැරිය ගිලන් රථ සේවාව ඇතුළු අත්යවශ්ය දුරකථන අංක නිවසේ පහසුවෙන් දැකගත හැකි ස්ථානයක ප්රදර්ශනය කරන ලෙසද පොලීසිය දැනුම් දී ඇත.
නාඳුනන පුද්ගලයන් නිවසට කැඳවා ගැනීමෙන් වළකින ලෙසත්, දෙමාපියන් සහ වැඩිහිටියන් හුදෙකලා කිරීම අවම කර ඔවුන්ගේ ආරක්ෂාව සම්බන්ධයෙන් නිරන්තර අවධානයෙන් පසුවන ලෙසද පොලීසිය මහජනතාවට දැනුම් දෙයි.
වැඩිහිටියන් පිළිබඳව ග්රාම නිලධාරීවරයා සහ ප්රජා පොලිස් කමිටුව දැනුවත් කිරීම, අසල්වැසියන් සමඟ සුහද සබඳතා පවත්වා ගැනීම, පහසුවෙන් භාවිත කළ හැකි ජංගම දුරකථනයක් ලබාදීම සහ නිවස අවට රාත්රී කාලයේ ප්රමාණවත් ආලෝකයක් පවත්වා ගැනීම ඇතුළු ආරක්ෂක ක්රියාමාර්ග අනුගමනය කරන ලෙසද පොලිසිය දැනුම් දෙයි.
