පසුගිය වසරේදී අරුණ විදානගමගේ නොහොත් “කජ්ජා” සහ ඔහුගේ දරු දෙදෙනා වෙඩි තබා ඝාතනය කිරීමේ සිද්ධියට අදාළව අනූෂා ලක්මාලි නොහොත් “අචිනි” නම් කාන්තාව ඩුබායි රාජ්‍යයේ සිට මෙරටට පිටුවහල් කිරීමෙන් අනතුරුව කටුනායක ගුවන්තොටුපොළේදී අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගත්තේය.
එම ඝාතනයෙන් පසුව කජ්ජාගේ දුරකතන දත්ත වාර්තා කිරීමේදී, 34 හැවිරිදි අනූෂා ලක්මාලි නොහොත් “අචිනි” නම් කාන්තාවක් ඔහුට අවසන් වරට දුරකතන ඇමතුම් ලබාදී ඇති බව අනාවරණය වී ඇති අතර පසුව ඇය අත්අඩංගුවට ගැනීමට පොලිසිය විමර්ශන සිදුකළ අතර එහීදී ඇය විදේශගතවී ඇත.
අනතුරුව අපරාධ පරීක්ෂණ දෙපාර්තමේන්තුව ජාත්‍යන්තර පොලිසිය හරහා අදාළ කාන්තාවට රතු වරෙන්තුවක් නිකුත් කරනු ලැබු අතර එහි ප්‍රතිඵලයක් ලෙස අදාළ කාන්තාව ඉකුත් අගෝස්තු (30) වැනිදා ඩුබායි හී සාජා නුවර සිට මෙරටට පැමිණීමට යෑමේදී එරට පොලිසිය මගින් අත්අඩංගුවට ගෙන ඇත.
කජ්ජා ඝාතනය වූ දින උදෑසන තමන් ඔහුව හමුවූ බවත් ඔහු සමග සමීප සබඳතාවක් පැවැත්වූ බවත් ඔහු ඝාතනය කිරීම සඳහා බැකෝ සමන්ගේ උපදෙස් මත තමන් ඔහුව ප්‍රදේශයේ පිහිටි හෝටලයක් අසළට දුරකථන ඇමතුමක් ලබාදී කැඳවූ බවද ඇය විමර්ශන නිලධාරීන් හමුවේ හෙළිකර ඇත.
කජ්ජාගේ ඝාතනයෙන් පසුව තමන් පිළිබඳව හෙළිවීමත් සමග 2025 මාර්තු (02) වැනිදා තමන් ගුවන්ගමන් බලපත්‍රය සකසාගෙන මාර්තු (05) වැනිදා තායිලන්තයේ බැංකොක් නුවරට පලාගිය බවත් අනතුරුව මැලේසියාවට ගොස් ඩුබායි රාජ්‍යයට ගිය බවද ඇය හෙළිකර ඇත.
අත්අඩංගුවට ගත් ඇය වැඩිදුර විමර්ශන සඳහා කොළඹ අපරාධ පරීක්ෂණ දෙපාර්තමේන්තුවේ මූලස්ථානය වෙත රැගෙන එනු ලැබුවේය.
