පසුගියදා ශ්රී ලංකාව මුහුන දුන් දිට්වා සුළි කුණාටුවෙන් සිදු වූ ආපදා අවම කිරීමට අපොහොසත් වීම තුළින් මහජනතාවගේ මූලික අයිතිවාසිකම් උල්ලංඝනය වී ඇති බවට චෝදනා කරමින් ගොනුකළ පෙත්සමක් සලකා බැලූ ශ්රේෂ්ඨාධිකරණය, ඒ පිළිබඳ කරුණු දක්වන ලෙස අමාත්ය මණ්ඩලයට සහ ආපදා කළමනාකරණ කමිටුවට නියෝග කර තිබේ.
මහනුවර ප්රදේශයේ පදිංචි නීතිඥවරයකු වන කීර්ති බණ්ඩාර කිරිදෙන මහතා විසින් මෙම පෙත්සම ඉදිරිපත් කර ඇති අතර අගවිනිසුරු ප්රීති පද්මන් සූරසේන සහ ශ්රේෂ්ඨාධිකරණ විනිසුරු අචල වෙන්ගප්පුලි යන මහත්වරුන් හමුවේ මෙම පෙත්සම විභාගයට ගැණුනි.
එහිදී ජනාධිපති නීතිඥ උපුල් ජයසූරිය මහතා පෙත්සම්කරු වෙනුවෙන් පෙනී සිටි අතර, රජය වෙනුවෙන් ජ්යෙෂ්ඨ රජයේ නීතිඥ බ්රිතා අහමඩ් මහත්මිය කරුණු ඉදිරිපත් කළාය.
ඒ අනුව අදාළ පෙත්සම සම්බන්ධයෙන් කරුණු තහවුරු කිරීම සඳහා එළඹෙන ජූලි මස 15 වැනිදා අධිකරණය හමුවේ පෙනී සිටින ලෙස වගඋත්තරකරුවන්ට නියම විය.
ජනාධිපතිවරයා (නීතිපතිවරයා මගින්), අග්රාමාත්ය හරිනි අමරසූරිය මෙනවිය ඇතුළු අමාත්ය මණ්ඩලය සහ ජාතික ආපදා කළමනාකරණ කමිටුව මෙහි වගඋත්තරකරුවෝ වෙති.
කොත්මලේ ජලාශයේ ජලය මුදාහැරීමට ප්රථම බලධාරීන් විසින් නිසි පරිදි ජනතාව දැනුවත් නොකිරීම හේතුවෙන් මහනුවර, පේරාදෙණිය, ගලහ සහ ගම්පොළ යන ප්රදේශවලට දැඩි හානි සිදු වූ බව පෙත්සම්කරු පෙන්වා දෙයි.
සුළි කුණාටුව හා ගංවතුර හේතුවෙන් මහනුවර අධිකරණ සංකීර්ණය අසල පිහිටි සිය නීතිඥ කාර්යාලය සහ එහි තිබූ වටිනා දත්ත පද්ධති විනාශ වීමෙන් තමන්ට දැඩි වෘත්තීයමය පාඩුවක් සිදු වූ බව ඔහු සඳහන් කරයි.
පෙත්සම්කරු අවධාරණය කරන්නේ වගඋත්තරකරුවන්ගේ අතපසුවීම් සහ නොසැලකිලිමත් භාවය හේතුවෙන් ආපදා තත්ත්වය තවදුරටත් උග්ර වූ බවයි.
එබැවින්, මෙම ක්රියාකලාපය මගින් තමන්ගේ සහ රටේ ජනතාවගේ මූලික මිනිස් අයිතිවාසිකම් කඩවී ඇති බවට තීන්දුවක් ලබාදෙන ලෙස ඔහු අධිකරණයෙන් වැඩිදුරටත් ඉල්ලා ඇත.
