ජ්‍යෙෂ්ඨ පොලිස් අධිකාරීවරුන් ලෙස සේවය කරමින් සිටි තිදෙනකු වහාම ක්‍රියාත්මක වන පරිදි ප්‍රධාන පොලිස් පරීක්ෂක නිලයට පහළ හෙලීමට පොලිස්පති ප්‍රියන්ත වීරසූරිය නියෝග කර ඇත.
ශ්‍රේෂ්ඨාධිකරණ තීරණයක් ක්‍රියාත්මක කරන ලෙස ජාතික පොලිස් කොමිසම ගත් තීරණයකට අනුව එම තිදෙනා ප්‍රධාන පොලිස් පරීක්ෂක නිලයට පත්කර ඇත.
ප්‍රධාන පොලිස් පරීක්ෂකවරුන් තිදෙනෙකුට පසුගිය 2010 වසරේදී සහකාර පොලිස් අධිකාරි තනතුර දක්වා ලබාදුන් විශේෂ උසස්වීම් ශූන්‍ය සහ අවලංගු කරන ලෙස ශ්‍රේෂ්ඨාධිකරණය මීට මාසයකට පෙර නියෝග කර තිබුණේය.
මෙම නිලධාරීන් තිදෙනාට අදාළ උසස්වීම් ලබාදීම වෙනුවෙන් පසුගිය 2010 ජූලි (28) වැනිදා ගනු ලැබූ කැබිනට් තීරණ නීති විරෝධී බවත් එම තීරණ මගින් ආණ්ඩුක්‍රම ව්‍යවස්ථාවේ 12(1) මූලික අයිතිවාසික කඩවන බවටත් ශ්‍රේෂ්ඨාධිකරණය තීන්දු කළේය.
පොලිස් පරීක්ෂකවරුන් 33 දෙනෙකු විසින් ගොනු කරන ලද මූලික අයිතිවාසිකම් පෙත්සමක් විභාග කිරීමෙන් අනතුරුව මෙම තීන්දුව ලබාදුන්නේය.
පොලිස්පතිවරයා නිකුත් කළ චක්‍රලේඛය අනුව දැනට ජ්‍යෙෂ්ඨ පොලිස් අධිකාරීවරුන් ලෙස කටයුතු කරන නිලධාරීන් තිදෙනා පහත සඳහන් දිනයන්වල සිට ප්‍රධාන පොලිස් නිලධාරීන් ලෙස පත් කර ඇත.
එම උසස්වීම් සඳහා ඉදිරිපත් කළ කැබිනට් පත්‍රිකාවල එවකට ආරක්ෂක අමාත්‍යවරයා වූ මහින්ද රාජපක්ෂ සහ ඔහුගේ පවුලේ සාමාජිකයන්ට ලබාදුන් සේවාවන් පිළිබඳව අවධානය යොමු කර එම උසස්වීම් ලබාදී තිබූ බව ශ්‍රේෂ්ඨාධිකරණය නිරීක්ෂණය කර ඇත.
