Local news (Sinhala)

දේශපාලන අවශ්‍යතා මත වෛද්‍යවරුන් පත් කිරීම සහ වෛද්‍ය පුරප්පාඩු පිරවීම හිතුමතේ සිදු වන්නේ නම් ඊට එරෙහිව වෘත්තීය ක්‍රියා මාර්ගයකට යාමට සිදු වන බවට රජයේ වෛද්‍ය නිලධාරීන්ගේ සංගමය ආණ්ඩුවට අනතුරු අඟවයි.

ශ්‍රී ජයවර්ධනපුර රෝහලට හා බොරැල්ල කාසල් රෝහලට එකම විශේෂඥ වෛද්‍යවරයකු පත් කිරීමද මුලතිව් සිට කොළඹට මාරුකර ඇති විශේෂඥ වෛද්‍යවරයා දේශපාලන බලපෑම් මත මාරුකර ඇති බවත් වෛද්‍ය ක්ෂේත්‍රයට කරන මෙවැනි මැදිහත්වීම්වලට එකඟ විය නොහැකි බවද එම සංගමයේ මාධ්‍ය ලේකම් වෛද්‍ය චමිල් විජේසිංහ සදහන් කරයි.

වෛද්‍ය ක්ෂේත්‍රයේ පුරප්පාඩු පිරවීම, පත්කිරීම් හා ස්ථාන මාරුකිරීම් යනාදී කරුණු 8ක් පිළිබඳ යෝජනා ඇතුළත් සංදේශයක් පැවැති රජයට සේම වත්මන් රජයටද භාරදී ඇතත් මෙතෙක් ඒවාට පිළිගත හැකි විසඳුමක් ලැබී නැතැයි ද වෛද්‍ය සංගමයේ මාධ්‍ය ලේකම්වරයා සදහන් කරයි.

රටේ දිළිඳුකම පිටුදැකීම සදහා පිහිටුවන ලද ග්‍රාම ශක්ති සමිතිවල රුපියල් කෝටි 63.57ක තැන්පතු ගිණුම් සහිත සමිති 2,067ක් අක්‍රිය වී ඇතැයි විගණන වාර්තාවකින් අනාවරණය වේ.

එම ගණන සමස්ත සමිති ප්‍රමාණයෙන් 57%ක් බවත් සමස්ත ග්‍රාම ශක්ති සමිති සංඛ්‍යාව 3,618ක් බවත් පසුගිය 2017 මාර්තු මාසයේදී ගත් කැබිනට් තීරණයක් අනුව ග්‍රාමීය දිළිඳු බව පිටුදැකීම සදහා මෙම සමිති ස්ථාපිත කර තිබෙන බවද විගණන වාර්තාවේ සදහන් වේ.

එහෙත් එලෙස පිහිටුවන ලද සමිතිවලින් අඩකට වඩා අක්‍රිය වීමෙන් ඒවායේ තැන්පතු මුදල් නිෂ්කාර්ය වී ඇති බව කාන්තා හා ළමා කටයුතු සහ සමාජ සවිබල ගැන්වීමේ අමාත්‍යංශයේ 2023 වසර පිළිබඳ විගණන වාර්තාවේ සදහන් වේ.

කාන්තාවන් නගා සිටුවීම සදහා ඔවුන්ගේ ආර්ථිකය ශක්තිමත් කිරීමට පිහිටුවන ලද වනිතා ශක්ති සුළු මූල්‍ය ශාඛා 59න් 29ක්ම අක්‍රිය වී ඇති බවත් ඒවායේ රුපියල් කෝටි පහකට ආසන්න මුදලක් එනම්, රුපියල් 4,90,71,128ක් පවතින බවද විගණන වාර්තාවේ සදහන් වේ.

තවත් ශාඛා හතක ගිණුම් ශේෂ තොරතුරු සොයාගත නොහැකි බවද විගණන වාර්තාවේ සදහන් වේ.

පැවැත්වීමට නියමිත පළාත් පාලන මැතිවරණය එළ⁣ඹෙන අප්‍රේල් මස මුලදී පැවැත්වෙනු ඇතැයි අමාත්‍ය කේ.ඩී. ලාල්කාන්ත සදහන් කරයි.

රටේ ආර්ථිකය, බදු ප්‍රතිපත්තිය මත සමහර තීරණ අකමැත්තෙන් වුවත් ක්‍රියාත්මක කිරීමට සිදුව ඇති බවත් මෙම කඩා වැටුණු ආර්ථිකය ගොඩ නැගීමේ අභියෝගය ජයගන්නා බවද අමාත්‍ය කේ.ඩී. ලාල්කාන්ත සදහන් කරයි.

මැතිවරණ පැවැත්වීමට මුදල් නොමැති බව කියමින් හිටපු ජනාධිපති රනිල් වික්‍රමසිංහ ඉකුත් 2023 මාර්තු (09) වැනිදා පැවැත්වීමට නියමිතව තිබූ පළාත් පාලන මැතිවරණය නොපවත්වා කල් දැමීය.

මීට අදාළව ශ්‍රේෂ්ඨාධිකරණයේ ගොනු කළ මූලික මිනිස් අයිතිවාසිකම් පෙත්සමක් විභාග කළ ශ්‍රේෂ්ඨාධිකරණය මැතිවරණ කොමිසමට නියෝග කළේ කල් දමා ඇති පළාත් පාලන මැතිවරණය හැකි ඉක්මනින්ම පවත්වා අවසන් කරන ලෙසයි.

කෙසේ වෙතත් මැතිවරණ කොමිසම පවසන්නේ ලබන මාර්තු මස අ.පො.ස සාමාන්‍ය පෙළ අවසන් වනතුරු මැතිවරණය පැවැත්විය නොහැකි බවත් අනතුරුව අප්‍රේල් මුල පළාත් පාලන මැතිවරණය පැවැත්වෙනු ඇති බවයි.

බන්ධනාගාරයේ තාප්පයට ඉහළින් වීසිකරන ලද පාර්සලයක තිබී ජංගම දුරකතන 3ක්, දුම්කොළ 17ක් හා දුරකථන බැටරියක් වව්නියාව බන්ධනාගාර නිලධාරීන් විසින් අත්අඩංගුවට ගෙන ඇත.

රාජකාරියේ නියුතු නිලධාරීන් එම පාර්සලය ලිහා බැලීමේදී තහනම් ද්‍රව්‍ය හා උපකරණ තොගය හමු වී ඇතැයි බන්ධනාගාර මාධ්‍ය ප්‍රකාශක ගාමිණී දිසානායක සදහන් කරයි.

බන්ධනාගාරය තුළ සීමිත නිලධාරීන් පිරිසක් රාජකාරි කටයුතු වල යෙදෙන වේලාවන් බලා තාප්පයට පිටතින් මෙම පාර්සලය විසි කරන්නට ඇතැයි සැක කරන බවද ඔහු සදහන් කරයි.

අත්අඩංගුවට ගනු ලැබූ පාර්සලයේ තිබී පිටතට ගත් ද්‍රව්‍ය හා උපකරණ බන්ධනාගාර හදිසි ප්‍රතිචාර හා උපක්‍රමික බළකාය වෙත භාරදුන් බවද ඔහු සදහන් කරයි.

පාර්සලය විසිකර ඇත්තේ කවුරුන්ද යන්න හා ඒවා ඇත්තේ කාටද යන්න මෙතෙක් හෙළි වී නැති අතර වවුනියාව බන්ධනාගාරය වැඩිදුර පරීක්ෂණ පවත්වයි.