Local news (Sinhala)

භාවිත කිරීමට නියමිත නව තාක්ෂණික සැකසුම සකස් කර අවසන් කිරීමට මාස 06ක දීර්ඝ කාලයක් ගත වීම ජනතාවට කරන බරපතළ ආසාධාරණයක් වන බැවින් ඒ වෙනුවට වෙනත් ක්‍රමවේදයක් යොදාගෙන අස්වැසුම වැඩසටහනට ප්‍රතිලාභීන් තෝරාගත යුතු බව මහජන ආරක්ෂාව හා පාර්ලිමේන්තු කටයුතු පිළිබඳ අමාත්‍ය ආනන්ද විජේපාල සදහන් කරයි.

අස්වැසුම වැඩසටහන සම්බන්ධයෙන් කුරුණෑගල දිස්ත්‍රික්කයේ තොරතුරු ඉදිරිපත් කළ අවස්ථාවේදී අනාවරණය වූයේ ග්‍රාම නිලධාරීන්ගේ සහභාගිත්වය නොලැබීම සහ ප්‍රතිලාභීන් තෝරා ගැනීම සදහා නව තාක්ෂණික වැඩසටහනක් සැකසීමට මාස 06ක් වැනි දීර්ඝ කාලයක් ගත වීම හේතුවෙන් ප්‍රතිලාභීන් තෝරා ගැනීම ගැටලුවක් වී තිබෙන බවය.

මේ වනවිට කුරුණෑගල දිස්ත්‍රික්කයේ අස්වැසුම නොලැබුණු 98,126 කගේ දුක්ගැනවිලි ලැබී ඇති බවත් රජයේ නිර්ණායක අනුව යොදාගෙන තිබූ දත්තවලට අනුව ප්‍රතිලාභ ලැබිය යුතුම පුද්ගලයන් ඇතුළත් නොවී සුදුසුකම් සපුරා නැති පුද්ගලයන් ප්‍රතිලාභීන් හැටියට අස්වැසුම වැඩසටහනට ඇතුළත්ව සිටීම බරපතළ ගැටලුවක් බවද අමාත්‍ය ආනන්ද විජේපාල සදහන් කරයි.

කුරුණෑගල දිස්ත්‍රික් සම්බන්ධීකරණ කමිටු රැස්වීමේදී අමාත්‍ය ආනන්ද විජේපාල මේ බව සදහන් කරයි.

තිරිඟු පිටි කිලෝවක මිල රුපියල් 25කින් අඩු කිරීමට කටයුතු කරන්නේ නම් පාන් රාත්තලක් රුපියල් 100කට පාරිභෝගික ජනතාවට ලබාදීමට හැකි බව සමස්ත ලංකා බේකරි හිමියන්ගේ සංගමයේ නියෝජිතයෝ සදහන් කරයි.

සමස්ත ලංකා බේකරි හිමියන්ගේ සංගමයේ නියෝජිතයෝ විසින් වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන ඇමැති වසන්ත සමරසිංහ සමඟ එම අමාත්‍යාංශයේදී පැවති සාකච්ඡාවකදී මේ බව දැනුම් දෙයි.

සමස්ත ලංකා බේකරි හිමියන්ගේ සංගමයේ සභාපති එන්.කේ. ජයවර්ධන ඇතුළු බේකරි හිමියෝ පිරිසක් මෙම සාකච්ඡාවට සහභාගි විය.

ඩොලරයේ මිල අඩු වුවත් තවමත් තිරිඟු පිටි කිලෝවක් මිලදී ගැනීමට සිදුවී ඇත්තේ රුපියල් 190කට බවත් ලෝක වෙළෙඳ පොළේ මාගරින් කිලෝවක මිල රුපියල් 400ක් වුවද, මෙරට වෙළෙඳ පොළේ මාගරින් කිලෝවක් රුපියල් 900කට අලෙවි කරන බවද බේකරි හිමියෝ ඇමැතිවරයාට පෙන්වා දුන්හ.

තිරිඟු පිටි ආනයනයේදී කිලෝවකට අය කරන රුපියල් 45ක බද්ද අඩු කර ඕනෑම අයකුට තිරිඟු පිටි ආනයනය කළ හැකි පරිදි අවස්ථාව ලබා දෙන්නේ නම් සමාගම්වල ඒකාධිකාරය බිඳ වැටෙන බවද බේකරි හිමියෝ ඇමැතිවරයා හමුවේ කියා සිටියහ.

නිවේදනයක් නිකුත් කරමින් පාර්ලිමේන්තු සන්නිවේදන දෙපාර්තමේන්තුව පවසන්නේ පාර්ලිමේන්තු සේවිකාවන්ට ලිංගික හිංසනයන් සිදුකිරීම සම්බන්ධයෙන් වැරදිකරුවන් වූ පාර්ලිමේන්තු සේවකයින් තිදෙනෙකු සේවයෙන් පහකර ඇති බවයි.

අදියර කිහිපයක් යටතේ සිදුකළ විමර්ශනවලින් අනතුරුව මෙම සේවකයින් තිදෙනා වැරදිකරුවන් ලෙස තහවුරු වූ බව එම නිවේදනයෙ වැඩිදුරටත් සඳහන් වේ.

එම විමර්ශනවලින් අනතුරුව පාර්ලිමේන්තු මහලේකම් කුෂානි රෝහණදීර මහත්මියගේ නිර්දේශ මත එම සේවකයින් තිදෙන‍ා සේවයෙන් පහ කිරීම සඳහා කථානායක වෛද්‍ය ජගත් වික්‍රමරත්න මහතා අනුමැතිය ‍ලබාදී තිබේ.

දේශීය සංචාරකයන් සහ ප්‍රදේශ වාසීන් හැටන් – නුවරඑළිය ප්‍රධාන මාර්ගයට කැළි කසළ බැහැර කළහොත් අත්අඩංගුවට ගෙන අධිකරණය වෙත ඉදිරිපත් කරන බව හැටන් මූලස්ථාන ප්‍රධාන පොලිස් පරීක්ෂක රංජිත් ජයසේන සදහන් කරයි.

“ක්ලීන් ශ්‍රී ලංකා” වැඩසටහනට සමගාමීව හැටන් පොලිසිය, හැටන් දික්ඔය නගර සභාව, හැටන් වැවිලි සමාගමට අයත් ෂැනන් වතුයායේ වතුපාලන අධිකාරි සහ කාර්ය මණ්ඩලය එක්ව එම මාර්ගය දෙපස සංචාරකයන්, ප්‍රදේශ වාසීන් සහ මගීන් විසින් බැහැර කර තිබූ කැළි කසළ ඉවත් කිරීමේ වැඩසටහනක් ආරම්භ කළේය.

මෙම වැඩසටහනට සමගාමීව එම මාර්ගයේ ගමන් ගත් සංචාරකයන් සහ මගීන් දැනුවත් කිරීමට පොලිස් නිලධාරින් කටයුතු කර ඇත.

මාර්ගයේ ගමන් කරන සංචාරකයන්ට කැළිකසළ බැහැර කිරීම සදහා හැටන් වැවිලි සමාගමේ ෂැනන් වතුයායේ වතු අධිකාරි විහඟ පැතුම් කැළි කසළ බැහැර කිරිමේ බඳුන් කිහිපයක්ද මාර්ගය අසල ස්ථාපනය කිරීමට පියවර ගෙන ඇත.

අද (17) සිට විදුලි ගාස්තුව සියයට 11.8 කට වැඩි ප්‍රතිශතයකින් පහළ යනු ඇතැයි ලංවීම ඉංජිනේරුවෝ විශ්වාසය පළ කරයි.

පසුගිය 2024 වසරට අදාළව සිදුකළ යුතු දෙවන ගාස්තු සංශෝධනය මැතිවරණ නිසා මෙම වසරට කල් ගිය බවද ලංවීම ඉංජිනේරුවෝ විශ්වාසය පළ කරයි.

මහජන උපයෝගීතා කොමිසම ඉල්ලූ දත්ත වාර්තාව ඉකුත් දෙසැම්බර් (06) වැනිදා කොමිසම වෙත භාරදුන් බවත් එම දත්ත පදනම් කරගෙන කොමිසම ලංවීමට දැනුම් දුන්නේ සියයට 11.8කින් විදුලිඛිල පහළ දැමිය හැකි බව ඉංජිනේරුවෝ සදහන් කරයි.

පසුගිය දෙසැම්බර් (17) සිට ජනවාරි (10) තෙක් මහජන අදහස් ලබාගැනීමෙන් පසුව කොමිසමේ තීරණය අද (17) දින නිල වශයෙන් දැනුම් දීමට නියමිතය.