Local news (Sinhala)

ජනාධිපති ලේකම් කාර්යාලයට අයත් වාහන 29ක් අස්ථානගත වීම සම්බන්ධව විමර්ශනයක් කෙරෙන බව අපරාධ පරීක්ෂණ දෙපාර්තමේන්තුව කොටුව මහෙස්ත‍්‍රාත් අධිකරණයට බී වාර්තාවක් ඉදිරිපත් කරමින් දැනුම් දී ඇත.

මේ සම්බන්ධයෙන් අතිරේක ලේකම්වරයකුගෙන් ප්‍රකාශ සටහන් කරගෙන ඇති බවත් අදාළ වාහන 29යෙන් 16ක් අවසන් වරට භාවිත කළ පුද්ගලයන්ගේ විස්තර තිබෙන බවත් දැනුම් දුන් අපරාධ පරීක්ෂණ දෙපාර්තමේන්තුව ඉන් වාහන 13ක් සම්බන්ධයෙන් කිසිම තොරතුරක් සොයා ගත නොහැකි බවද දන්වා සිටියේය.

ජනාධිපති ලේකම්වරයා කළ පැමිණිල්ලකට අදාළව විමර්ශන කරන බවත් මෝසමක් ගොනු කරමින් අපරාධ පරීක්ෂණ දෙපාර්තමේන්තුව මේ බව අධිකරණයට දන්වා සිටියේය.

විමර්ශනයට අදාළව පළාත් නමය තුළ ඇති පළාත් පාලන ආයතනවලින් මෙම වාහන සම්බන්ධයෙන් ලිපි ගනුදෙනු සිදුවී තිබේද යන්න පිළිබඳව තොරතුරු විමසා ඇතැයිද අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.

ඒ අනුව විමර්ශන කරන ලෙස අපරාධ පරීක්ෂණ දෙපාර්තමේන්තුවට නියෝග කළ කොටුව මහෙස්ත්‍රාත් නිලුපුලී ලංකාපුර මෙනවිය විමර්ශන වලට අදාළ ප්‍රගතිය දැනුම් දීම සදහා මාර්තු (12) වැනිදා නඩුව යළි කැඳවන ලෙසත් නියෝග කළාය.

තමා අත්අඩංගුවට ගැනීමේ සූදානමක් පවතින බැවින් තමන්ට අපේක්ෂිත ඇපයක් ලබාදෙන ලෙස ඉල්ලා හිටපු කම්කරු හා විදේශ රැකියා අමාත්‍ය මනුෂ නානායක්කාර ඉදිරිපත් කර ඇති ඇප අයැදුම්පතක් සම්බන්ධයෙන් කරුණු දැක්වීම සදහා එළ⁣ඹෙන (20) වැනිදා අධිකරණය හමුවේ පෙනී සිටින ලෙස දන්වා අපරාධ පරීක්ෂණ දෙපාර්තමේන්තුවේ ස්ථානාධිපතිවරයාට හා සමුද්‍රීය අපරාධ විමර්ශන කොට්ඨාසේ ස්ථානාධිපතිවරයාට නොතීසී නිකුත් කරන ලෙස කොළඹ ප්‍රධාන මහෙස්ත්‍රාත් තනුජා ලක්මාලි නියෝග කරයි.

ශ්‍රී ලංකාව සහ දකුණු කොරියාව අතර කෘෂිකාර්මික හා ධීවර සේවක වැඩසටහනකට අදාළව පෙත්සම්කරු අත්සන් කර ඇති අවබෝධතා ගිවිසුමක් හා ඊ8 වීසා ගැටලුවක් සම්බන්ධව අපරාධ පරීක්ෂණ දෙපාර්තමේන්තුව තම සේවාදායකයා අත්අඩංගුවට ගැනීමේ සූදානමක් පවතින බවද නීතිඥවරු ඒ ඇප අයැදුම්පත යොමු කරමින් අධිකරණය හමුවේ සදහන් කරයි.

මෙම පෙත්සම්කරු කර ඇත්තේ ඇමැතිවරයා වශයෙන් රජයන් දෙකක් අතර අවබෝධතා ගිවිසුමක් අත්සන් කිරීම පමණක් බවත් එබැවින් ඔහුට එරෙහිව අපරාධ නඩුවක් පවත්වා ගෙන යාමට හැකියාවක් නොමැති බැවින් පෙත්සම්කරුට අපේක්ෂිත ඇපයක් නියම කරන ලෙසද නීතිඥවරු අධිකරණයෙන් ඉල්ලා ඇත.

එක්සත් ජාතික පක්ෂය සමග ඉදිරි මැතිවරණ වලදී එක්ව වැඩ කිරීම සම්බන්ධයෙන් සාකච්ඡා ආරම්භ කිරීමට වන යෝජනාවකට සමගි ජන බලවේගයේ කෘත්‍යාධිකාර මණ්ඩල අනුමැතිය හිමිව ඇත.

සමගි ජන බලවේගයේ කෘත්‍යාධිකාර මණ්ඩලය විපක්ෂ නායක සජිත් ප්‍රේමදාසගේ ප්‍රධානත්වයෙන් එම පක්ෂ කාර්යාලයේදී රැස් වූ අවස්ථාවේදී මෙම එකඟතාවට පැමිණ ඇත.

සමගි ජන බලවේගය මහලේකම් රංජිත් මද්දුම බණ්ඩාර ඇතුළු පක්ෂයේ නියෝජිතයන් රැසක් එම අවස්ථාවට සහභාගි විය.

එළඹෙන මහකන්නයේ වී මිලදී ගැනීම සදහා අවශ්‍ය යටිතල පහසුකම් සංර්වර්ධනය කිරීමට මෙන්ම වී අලෙවි මණ්ඩලය හා ස.තො.ස සතු අඩුපාඩුකම් පවතින ගබඩා අලුත්වැඩියා කිරීමට ත්‍රිවිධ හමුදා තාක්ෂණික සහය හා ශ්‍රම දායකත්වය ලබාදීමට කටයුතු සිදු කරන ලෙස අතිගරු ජනාධිපති අනුර කුමාර දිසානායකගෙන් ආරක්ෂක අමාත්‍යාංශය වෙත උපදෙස් ලබාදී ඇත.

ඒ අනුව මේ සම්බන්ධයෙන් සම්බන්ධීකරණ සාකච්ඡාවක් වාරි මාර්ග හා පශු සම්පත් නියෝජ්‍ය අමාත්‍ය වෛද්‍ය සුසිල් රණසිංහගේ ප්‍රධානත්වයෙන් අද (16) කොළඹ පිහිටි හෙක්ටර් කොබ්බෑකඩුව ගොවි පර්යේෂණ ආයතනයේදී පැවැත්විණ.

මෙම සාකච්ඡාවේදී ගබඩාවල පවතින අලුත්වැඩියා කටයුතු සිදුකිරීම සදහා ත්‍රිවිධ හමුදා සාමාජිකයින්ගේ ශ්‍රම දායකත්වයත් තාක්ෂණික දැනුමත් යන්ත්‍ර සූත්‍ර යොදා ගැනීම සදහාත් අවධානය යොමු විය.

එමෙන්ම අස්වනු නෙලන කාලය වන විට ගබඩාවන් හි පවතින අලුත්වැඩියා කටයුතු මේ මස අවසන් වීමට පෙර නිමකර මහකන්නයේ අස්වනු මිලදී ගැනීම සදහා සුදානම් කිරීමටත්, වී මිලදී ගැනීමෙන් අනතුරුව එම ගබඩා පරිශ්‍රයන් සඳහා ආරක්ෂාව සැපයීමටත්, ආරක්ෂක අමාත්‍යාංශය සිය එකඟතාවය පළකල අතර Clean Sri Lanka හි තවත් එක් පියවරක් ලෙස මෙම වැඩසටහන ක්‍රියාවට නන්වනු ලබයි.

දිවයින පුරා වී අලෙවි මණ්ඩලය සතු ගබඩා 209 පවතින අතර ස.තො.ස සතුව ගබඩා 12 ක ප්‍රමාණයක් පවතී. එම ගබඩාවන් හී පවතින අඩුපාඩුකම් හා ගත යුතු පියවර මෙන්ම ඉදිරි සැලසුම් පිළිබඳව පැමිණි සිටි පාර්ශ්වයන් මෙම සාකච්ඡාවෙදී අදහස් හුවමාරු කර ගන්නා ලදි.

මෙම අවස්ථාවට වී අලෙවි මණ්ඩලයේ සභාපති මංජුල පින්නලන්ද, වී අලෙවි මණ්ඩලයේ ප්‍රධාන විධායක නිලධාරී මහාචාර්ය එ එල් රාජගුරු, කලාප කළමණාකරුවන් සහ ශ්‍රී ලංකා යුද හමුදාවේ අධ්‍යක්ෂ ජනරාල් – ප්‍රධාන මාණ්ඩලික, මේජර් ජෙනරල් දිනේෂ් උඩුගම ඇතුළු ත්‍රිවිධ හමුදා ජ්‍යෙෂ්ඨ නිලධාරීන් පිරිසක් සහ ආරක්ෂක අමාත්‍යාංශයේ නිලධාරීන් පිරිසක් ද සහභාගී විය.

ජාත්‍යන්තර පොලීසිය මගින් මහා පරිමාණ මත්ද්‍රව්‍ය ජාවාරම්කරුවෙකු සහ සංවිධානාත්මක අපරාධකරුවෙකු වන ජනිත් මධුසංඛ හෙවත් “පොඩි ලැසී” ඉන්දියාවේ මුම්බායි හිදී අත්අඩංගුවට ගෙන ඇත.

ජනිත් මධුසංඛ හෙවත් “පොඩි ලැසී” ඉන්දියාවේ මුම්බායි හිදී අත්අඩංගුවට ගැනීම සම්බන්ධයෙන් මෙරටට දැනුම්දී ඇති බව පොලිස් මූලස්ථාන ආරංචි මාර්ග සදහන් කරයි.

අධිකරණය මගින් ඇප ලබා සිටි ජනිත් මධුසංඛ හෙවත් පොඩි ලැසී මෙරටින් පලාගොස් ඇති බවට පසුගියදා සමාජ මාධ්‍ය වාර්තා කර තිබුණ අතර පොලීසිය කළ සොයාබැලීම්වලදී අනාවරණය වී තිබුණේ පොඩි ලැසී ඉන්දියාවේ රැඳීසිටින බවය.