Local news (Sinhala)

ජංගම දුරකථන පැකේජයන්වල මිල ගණන් ඉහළ දමා ඇති බවට පළවන වාර්තා අසත්‍ය බව ශ්‍රී ලංකා විදුලි සංදේශ නියාමන කොමිෂන් සභාවේ අධ්‍යක්ෂ ඉන්ද්‍රජිත් හඳපාන්ගොඩ සදහන් කරයි.

කොමිෂන් සභාවේ අධ්‍යක්ෂ ඉන්ද්‍රජිත් හඳපාන්ගොඩ සදහන් කළේ,

“ජංගම දුරකථන පැකේජයන්වල මිළ ගණන් ඉහළ දමා ඇති බවට පළවූ වාර්තා පිළිබඳව පැහැදිලිවම ප්‍රකාශ කර සිටින්නේ 1991 අංක 25 දරණ විදුලි සංදේශ පණතින් ශ්‍රී ලකා විදුලි සංදේශ නියාමන කොමිෂන් සභාවට ලැබී ඇති බලතල අනුව, සේවාදායක සමාගම් වෙනුවෙන් අනුමතකර දී ඇති කිසිදු ජංගම දුරකථන පැකේජයක මිල ගණන් ඉහළ දැමීමකට කිසිම සමාගමකට අපි අවසර දී නොමැති බවයි.

මේ පුවත කොමිෂන් සභාවට දැනගන්න ලැබීමත් සමග කොමිෂන් සභාව විසින් සියලුම ජංගම දුරකථන සමාගම්වලින් ඒ පිළිබඳව විමසීමක් සිදුකරනු ලැබුවා. එම සිදුකිරීමට අනුව ඒ සියලුම ජංගම දුරකථන සමාගම් පවසා සිටියේ කිසිම මිල වැඩි කිරීමක් කර නොමැති බවයි. ඒ පිළිබඳව එම සමාගම් ලිඛතව කොමිෂන් සභාව වෙත දැනුම්දී තිබෙනවා. ඒ අනුව මෙවැනි අසත්‍ය ප්‍රචාරවලට මහජනතාව නොරැවටෙන ලෙස ඉල්ලා සිටිනවා.

කෙසේ වුවත් යම් කිසි පාරිභෝගිකයෙකුට තමා සක්‍රීය කරගෙන ඇති ජංගම දුරකථන පැකේජයක මිල ගණන් ඉහළ යාමකට මුහුණ දී සිටීනම් ඒ පිළිබඳ සත්‍ය තොරතරු සාඳක සහිතව කොමිෂන් සභාවට නොපමාව ඉදිරිපත් කරන ලෙස ඉල්ලා සිටිනවා.”

මාධ්‍ය වෙත අදහස් දක්වමින් ශ්‍රී ලංකා විදුලි සංදේශ නියාමන කොමිෂන් සභාවේ අධ්‍යක්ෂ ඉන්ද්‍රජිත් හඳපාන්ගොඩ මේ බව සදහන් කරයි.

හිටපු පාර්ලිමේන්තු මන්ත්‍රී භාරත ලක්ෂ්මන් ප්‍රේමචන්ද්‍ර ඝාතන නඩුවෙන් වරදකරුවකු වී මරණ දඬුවම ලැබූ හිටපු පාර්ලිමේන්තු මන්ත්‍රී දුමින් ද සිල්වා කොළඹ ජාතික රෝහලේ සිට නැවතත් වැලිකඩ බන්ධනාගාරය වෙත යවා පැය කීපයකට පසු වෛද්‍ය නිර්දේශ මත යළිත් බන්ධනාගාර රෝහලට ඇතුළත් කර ඇත.

වැලිකඩ බන්ධනාගාරයට ඇතුළත් කොට එහි ‘කේ’ වාට්ටුවේ විශේෂ සිරමැදිරියක සවිකරන ලද ශ්වසන යන්ත්‍රයකින් හුස්ම ගැනීමට සලස්වා පැය කීපයකින් රෝගී තත්ත්වය උත්සන්න බවක් පෙන්නුම් කිරීමෙන් පසුව බන්ධනාගාර වෛද්‍යවරයකු වෙත ඉදිරිපත් කර එදින නැවතත් බන්ධනාගාර රෝහල වෙත යවා එහි අංක 03 වාට්ටුවට ඇතුළත් කර ඇත.

මේ අතර බොදුබල සේනා සංවිධානයේ මහ ලේකම් ගලගොඩ අත්තේ ඥානසාර හිමියෝ මාස 09ක ලිහිල් සිරදඬුවමක් නියමව වැලිකඩ බන්ධනාගාරය වෙත ඇතුළත් කර ‘කේ’ වාට්ටුවේ සිටියදී අධි රුධිර පීඩනය හේතුවෙන් වෛද්‍ය නිර්දේශ මත වැලිකඩ බන්ධනාගාර රෝහලේ අංක 04 වාට්ටුවට ඇතුළත් කර ඇති බව වාර්තාවේ.

ලක්ෂ 150ක් පමණ වටිනා ප්‍රාඩෝ වර්ගයේ ජිප් රථයකට අට්‍රැක්ටරයක ලියාපදිංචි අංකයක් යොදා භාවිතා කිරීමේ වරදට ගම්පහ දිස්ත්‍රික්කයේ හිටපු ශ්‍රී ලංකා නිදහස් පක්ෂ මන්ත්‍රිවරයකුගේ පියා පානදුර වලාන මධ්‍යම දූෂණ මර්දන ප්‍රහාරක බළකාය විසින් අත්අඩංගුවට ගෙන ඇත.

දෙසැම්බර් (26) වැනිදා මීරිගම පොලිස් බල ප්‍රදේශයේදී එම ජිප් රථය අත්අඩංගුවට ගෙන මීරිගම පොලිස් ස්ථානයට ඉදිරිපත් කිරීමෙන් අනතුරුව ජිප් රථයේ මුල් ලියාපදිංචි අයිතිකරු හා දෙවැනි ලියාපදිංචි අයිතිකරු කොළඹ සහ නාරහේන්පිට ප්‍රදේශවල පදිංචිකරුවන් බවටත් ව්‍යාජ ලිපින හා පුද්ගල නාම භාවිත කර ව්‍යාජ තොරතුරු ඉදිරිපත් කර ජිප් රථය ලියාපදිංචි කර ඇති බවද අනාවරණය වී ඇත.

සැකකාර පුද්ගලයා වාහන අලෙවි ව්‍යාපාරයක් පවත්වාගෙන යන අතර නීති විරෝධී ආකාරයෙන් මෙරටට කොටස් වශයෙන් ආනයනය කරන ලද රථයකට අන්ත්‍රැක්ටරයක ලියාපදිංචි අංකයක් යොදා කූට ලේඛන උපයෝගී කර ගනිමින් මෝටර් රථ ලියාපදිංචි කිරීමේ දෙපාර්තමේන්තුවේ දත්ත වෙනස් කර මෙම වංචාව කර ඇති බව විමර්ශන වලදී අනාවරණය වී ඇත.

පානදුර වලාන මධ්‍යම දූෂණ මර්දන ප්‍රහාරක ඒකකය මීට පෙර විමර්ශනය කර අනාවරණය කරගත් වාහන 404කට අදාළ ලේඛන සන්තකයේ තබා ගැනීම සම්බන්ධයෙන් අත්අඩංගුවට ගත් ප්‍රධාන ජාවාරම්කරු සැකකරුගේ සහෝදරයා වන බව පොලිසිය සදහන් කරයි.

චීනයේ රාජ්‍ය සංචාරයක් සදහා ජනාධිපති අනුර කුමාර දිසානායක දිවයිනෙන් පිටත්ව යාම නිසා අමාත්‍යාංශ 05කට වැඩබලන අමාත්‍යවරු පත් කර ඇත.

ආරක්ෂක වැඩබලන අමාත්‍ය – ආරක්ෂක නියෝජ්‍ය අමාත්‍ය අරුණ ජයසේකර

විදේශ කටයුතු, විදේශ රැකියා සහ සංචාරක වැඩබලන අමාත්‍ය – විදේශ රැකියා නියෝජ්‍ය අමාත්‍ය අරුන් හේමචන්ද්‍ර

මුදල් හා ක්‍රම සම්පාදන සහ ආර්ථික සංවර්ධන වැඩබලන අමාත්‍ය – කම්කරු අමාත්‍ය හා ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු

ප්‍රවාහන හා මහාමාර්ග සහ වරාය හා සිවිල් ගුවන්සේවා වැඩ බලන අමාත්‍ය – ප්‍රවාහන හා මහාමාර්ග නියෝජ්‍ය අමාත්‍ය වෛද්‍ය ප්‍රසන්න කුමාර ගුණසේන

ඩිජිටල් ආර්ථික වැඩබලන අමාත්‍ය – ඩිජිටල් ආර්ථික නියෝජ්‍ය අමාත්‍ය එරංග වීරරත්න

පසුගිය 2023 දෙසැම්බර් (31) වැනිදා වනවිට ලෙජසි පරිගණක පද්ධතියට අනුව දේශීය ආදායම් දෙපාර්තමේන්තුව මගින් හිඟ බදු, දඩ හා පොලිය වශයෙන් අයකරගත යුතු රුපියල් කෝටි 15,964ක් තාවකාලිකව අත්හිටුවා තිබෙන බව විගණකාධිපතිවරයා හෙළි කරයි.

ඒ මුදල ලෙජසි පරිගණක පද්ධතියට අනුව එකතු කළ යුතු බදු ආදායමෙන් සියයට 76ක් බව විගණන වාර්තාවේ සදහන් වන අතර දේශීය ආදායම් බදු දෙපාර්තමේන්තුවේ ලෙජසි පරිගණක පද්ධතියට අනුව 2023 වසරේදී රැස් කරගත යුතු හිඟ බදු, දඩ හා පොලී ආදායම රුපියල් 209,936,351,219 කි.

ඉන් රුපියල් 159,645,625,333 ක් තාවකාලිකව අත්හිටුවා ඇති අතර ඒ අනුව එකතු කළ යුතු ආදායමෙන් එකතු කිරීමට හැකියාව ලැබී තිබෙන්නේ කෝටි 5,029 ක් පමණක් බව විගණන වාර්තාවෙන් අනාවරණය වේ.

මේ සම්බන්ධයෙන් දෙපාර්තමේන්තුවේ ගණන් දීමේ නිලධාරි කරුණු පැහැදිලි කරමින් සදහන් කර තිබෙන්නේ හඳුනා ගත් විවිධ වලංගු හේතු මත මෙම බදු අය කිරීම් අත්හිටුවා ඇති අතර ගැටලු නිරාකරණය කර ගැනීමෙන් අනතුරුව ඒවා නැවත අය කර ගන්නා බවය.

සෞඛ්‍ය ක්ෂේත්‍රයේ විශේෂඥ වෛද්‍ය, සාමාන්‍ය වෛද්‍ය, හෙද හෙදි, පරිපූරක වෛද්‍ය හා අතුරු වෛද්‍ය සේවා නිලධාරීන් 1,519ක් ගෙවී ගිය වසර දෙකහමාරක් තුළදී නොදන්වා සේවය හැර ගොස් සිටින බව සෞඛ්‍ය හා ජනමාධ්‍ය අමාත්‍ය නලින්ද ජයතිස්ස සදහන් කරයි.

රට තුළ මතු වූ ආර්ථික අර්බුදයත් සමග ඇති වූ තත්ත්වයන් මත පසුගිය 2022 ජනවාරි සිට 2024 නොවැම්බර් දක්වා කාලය තුළ මෙම පිරිස සේවය හැර ගොස් ඇති බවද අමාත්‍ය නලින්ද ජයතිස්ස සදහන් කරයි.

නොදන්වා සේවය හැර ගිය සෞඛ්‍ය වෘත්තිකයන් අතර විශේෂඥ වෛද්‍යවරුන් 59ක්, සාමාන්‍ය වෛද්‍යවරුන් 628ත්, පරිපූරක වෛද්‍යවරුන් 154ක්, අතුරු වෛද්‍ය නිලධාරීන් 48ක් හා හෙද හෙදියන් 630ක් සිටින බවද අමාත්‍යවරයා සදහන් කරයි.

පසුගිය කාලය තුළ විශේෂඥ වෛද්‍යවරුන් 59 දෙනකු නොදන්වා සේවය හැර ගොස් ඇති අතර තවත් සිව්දෙනෙක් විශ්‍රාම ගෙන හෝ නීත්‍යනුකූලව ඉල්ලා අස්වී ඇති අතර ඒ අනුව විශේෂඥ වෛද්‍යවරුන් 833ක් හිඟයක් රට තුළ පවතින බවද අමාත්‍යවරයා සදහන් කරයි.

අමාත්‍යවරයා සඳහන් කරන පරිදි මෙරට සෞඛ්‍ය සේවය ප්‍රශස්ත ලෙස පවත්වාගෙන යාමට විශේෂඥ වෛද්‍යවරුන් 2,837ක් සිටිය යුතු නමුත් මේ වන විට සිටින්නේ 2,004ක් පමණක් බවත් සාමාන්‍ය වෛද්‍යවරු 22,701ක් සිටිය යුතු අතර දැනට සිටින්නේ 21,496ක් පමණක් බවද අමාත්‍යවරයා සදහන් කරයි.

අමාත්‍යවරයා පවසන පරිදි පසුගිය කාලය තුළ නොදන්වා සේවය හැර ගිය සාමාන්‍ය වෛද්‍යවරුන් 628ට අමතරව තවත් 400ක් නීත්‍යනුකූලව සේවයෙන් ඉවත් වී ගොස් ඇති බවත් ඒ අනුව රට සාමාන්‍ය වෛද්‍යවරුන් 1,205ක හිඟයක් පවතින බවයි.

හෙද නිලධාරින් 44,665ක් සිටිය යුතු අතර දැනට සිටින්නේ 41,876ක් පමණක් වන අතර හෙද නිලධාරීන් 630ක් නොදන්වා සේවය හැර ගොස් ඇති අතර තවත් 184 ක් නීත්‍යනුකූලව සේවයෙන් ඉවත් වී ඇති අතර මේ වනවිට 2,789ක් හෙද කාර්ය මණ්ඩල හිඟයක් මතුව ඇති බවද අමාත්‍යවරයා සදහන් කරයි.

අතුරු වෛද්‍ය වෘත්තිකයන් 3,911ක හිඟයක් පවතින අතර පසුගිය කාලය තුළ 48 දෙනෙකු නොදන්වා සේවය හැරගොස් ඇති බවත් පරිපූරක වෛද්‍ය නිලධාරීන් 1,290ක් හිඟයක් පවතින අතර රට තුළ මතු වූ ආර්ථික අර්බුදය තුළ 154 දෙනකු නොදන්වා සේවය හැර ගොස් ඇති බවද අමාත්‍යවරයා සදහන් කරයි.

රුපියල් කෝටි 350ක වැට බදු නොගෙවීමේ චෝදනාව මත සිර දඬුවම් විඳින ඩබ්ලිව්.එම්. මෙන්ඩිස් සමාගමේ අධ්‍යක්ෂවරයකු වන අර්ජුන් ඇලෝසියස් නමැත්තා රෝගී තත්ත්වය මත වැලිකඩ චැපල් ශාලාවෙන් ‘එම්’ සිර වාට්ටුවට මාරුකර යවා ඇතැයි එම බන්ධනාගාරය සදහන් කරයි.

වෛද්‍ය නිර්දේශ මත මෙම මාරුකිරීම සිදුකර ඇති අතර ඇදුම රෝගය වැලඳී දැඩි අපහසුවෙන් එම් සිර වාට්ටුවේ සිටින මෙම සිරකරු තවත් සිරකරුවන් 69 දෙනෙකු සමග රඳවා ඇතැයි ද එහි ප්‍රකාශකයෙක් සදහන් කරයි.

මේ වනවිට එම සිරකරු දිවා කාලයේදී කර්මාන්ත අංශයේ මැහුම් පාටියේ යොදවා ඇති බවත් 2024 ඔක්තෝබර් මස (14) වන දින මොහු සමග තවත් දෙදෙනකු සිරගත කර සිටින බවද බන්ධනාගාරය සදහන් කරයි.

මෙම සිරකරු බැලීමට අමුත්තන් කිසිවකුත් නොපැමිණෙන බවත් ඔහු බන්ධනාගාර ආහාර පාන ලබාගන්නා බවද වාර්තා වේ.

ඉකුත් වසර දෙකක පමණ කාලයේදී එක්තරා දේශපාලනඥයන් පිරිසක් විසින් ඊශ්‍රායල් රැකියා ලබාදෙන බව පවසමින් පුද්ගලයන් 5,000කට අධික පිරිසකගෙන් මුදල් එකතු කරගෙන මහා පරිමාණ ජාවාරමක් කර ඇතැයි ශ්‍රී ලංකා විදේශ සේවා නියුක්ති කාර්යාංශයේ සභාපති කෝශල වික්‍රමසිංහ හෙළි කරයි.

එම පුද්ගලයින් එක්තරා දේශපාලනඥයන් පිරිසකට මුදල් ලබාදී වසර දෙකක් තිස්සේ රැකියා ලැබෙන තුරු මඟ බලා සිටින බවද එහි සභාපති කෝශල වික්‍රමසිංහ සදහන් කරයි.

ඊශ්‍රායල් රජය මගින් මෙරටට ලබාදී තිබූ කෘෂිකර්ම ක්ෂේත්‍රයේ රැකියා 10,000ක කෝටාව යටතේ දේශපාලන වුවමනා මත නුසුදුසු පුද්ගලයන් කෘෂිකර්ම ක්ෂේත්‍රයේ රැකියා සදහා යවා ඇතැයිද, ඒ අය අදාළ රැකියා ස්ථාන වලින් ඉවත් වී වෙනත් රැකියා ස්ථාන වෙත යොමුවීම නිසා එම රැකියා කෝටාව රටට අහිමි වී ඇතැයිද සභාපතිවරයා සදහන් කරයි.

එම රැකියා සදහා 2,000ක පමණ පිරිසක් යොමු කළත් පෙර කී හේතුව මත ඉතිරි රැකියා 8,000 අහිමි වූ බවත් ඒ අනුව ඊශ්‍රායල් රැකියා ලබාදීම විනිවිදව සිදු කර එරට රැකියා අවස්ථා මෙරටට වැඩි වශයෙන් ලබා ගැනීමට වැඩ පිළිවෙළක් යොදා ඇතැයි ද සභාපතිවරයා සදහන් කරයි.