Main news (Sinhala)

ජාතික ජල සම්පාදනය හා ජලාපවාහන මණ්ඩලය පවසන්නේ විදුලි ගාස්තු අඩු කිරීමට සාපේක්‍ෂව ඉදිරියේදී ජල ගාස්තු ද අඩුවනු ඇති බවයි.

විදුලි ගාස්තු අඩු වීමේ වාසිය ජල පාරිභෝගිකයන්ටද ලබා දීමට ඇති හැකියාව පිළිබඳ මේ වන විටත් අධ්‍යයනය කරමින් සිටින බව එම මණ්ඩලය පවසයි.

සති දෙකක අධ්‍යයනයෙන් පසු එහි අවසන් වාර්තාව අමාත්‍යංශය වෙත යොමු කිරීමට නියමිත බවද ජල සම්පාදනය හා ජලාපවාහන මණ්ඩලය පවසයි.

වත්මන් දත්ත අනුව මෙරට ජල පාරිභෝගිකයන් සංඛ්‍යාව ලක්ෂ 32 ඉක්මවා ඇති අතර පසුගිය අගෝස්තු 21 වැනිදා අවසන් වරට සිදුවූ ජලගාස්තු සංශෝධනය අනුව ජල ගාස්තු 5.94%කින් අඩු කෙරුණි.

සභානායක බිමල් රත්නායක මහතා අද (21) පාර්ලිමේන්තුවේදී පැවසූවේ නව පනතක් සම්මත කරගන්නා තෙක් පවතින ත්‍රස්ත විරෝධී පනත ඉතා පරිස්සමෙන් පවත්වාගෙන යන බවයි.

කෙසේවෙතත් එහිදී අමාත්‍යවරයා අවධාරණය කර සිටියේ ත්‍රස්ත විරෝධී පනත ආණ්ඩුවේ අභිලාශය හෝ ප්‍රතිපත්තිය නොවන බවයි.

නව පනතක් සම්පාදනය කරන තෙක් ආණ්ඩුවක් ලෙස පවතින නීතිය තුළ ප්‍රවේශමෙන් කටයුතු කිරීමට සිදුවන බවද ඔහු සඳහන් කළේය.

“ත්‍රස්ත විරෝධී පනත ගැන කියන්න තියෙන එකම දේ තමයි. ඒක අපේ අභිලාශයවත් ප්‍රතිපත්තියවත් නෙමෙයි. නමුත් අලුත් පනතක් සකස්කරන තෙක් රටේ තිබෙන නීතිය අපට ඉතාම පරිස්මෙන් පාවිච්චි කරන්න ඕනේ. මොකද අපි ආණ්ඩුවක් කරන්න ඕනේ පනත් සම්මත වෙනතුරු.  ඒ නිසා අධිකරණ අමාත්‍යවරයා ඒ සම්බන්ධයෙන්  මේ සභාවට පිළිතුරුදීලා තියෙනවා.”

පාර්ලිමේන්තු සභාවාරයට සහභාගී වීමට කොළඹ බලා පැමිණෙන අතරතුර අනුරාධපුර ප්‍රදේශයේ දී රථවාහන රාජකාරියේ යෙදී සිටි රථවාහන අංශයේ පොලිස් නිලධාරීන්ගේ රාජකාරියට බාධා කිරීම සහ රථ වාහන පොලීසියට අවනත නොවී කටයුතු කිරීම හේතුවෙන් පාර්ලිමේන්තු මන්ත්‍රී රාමනාදන් අර්ච්චුනා මහතාට එරෙහිව පොලීසිය විසින් විමර්ශනයක් ආරම්භ කර තිබේ.

පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග මහතා පැවසූවේ ඒ අනුව අද (21) දිනයේ දී අදාළ සිදුවීම සම්බන්ධයෙන් අධිකරණයට කරුණු ඉදිරිපත් කිරීමට නියමිත බවයි.

ඊට අමතරව අදාළ මන්ත්‍රීවරයා විසින් සිදුකළ ප්‍රකාශයෙන් ජාතීන් අතර අසමගියක් ඇති වී තිබේද යන්න පිළිබඳව ද විමර්ශනයක් ක්‍රියාත්මක බව පොලිස් මාධ්‍ය ප්‍රකාශකවරයා වැඩිදුරටත් පැවසීය.

ඒ අනුව මෝටර් රථ ප්‍රවාහන පනත මෙන්න දණ්ඩ නීති සංග්‍රහය යටතේද පාර්ලිමේන්තු මන්ත්‍රී රාමනාදන් අර්ච්චුනා මහතාට එරෙහිව අධිකරණයට කරුණු ගොනුකරන බව පොලිස් මාධ්‍ය ප්‍රකාශකවරයා සඳහන් කළේය.

දින කිහිපයක් පුරා අවධානමට ලක්ව තිබූ ගල් ඔයෙහි බැම්ම නේනකාඩු ප්‍රදේශයෙන් බිඳවැටී ඇත.

ඉන් ඇති වූ ගංවතුර තත්ත්වය හේතුවෙන් දීඝවාපිය ජනපදය සතු කුඹුරු අක්කර 600ක් පමණ ජලයෙන් යට වී ඇති බව වාර්තා වේ.

නේනකාඩු ප්‍රදේශයේ ගල්ඔ යයි ඉවුරු වනසා වගා කටයුතු සිදු කිරීම හේතුවෙන් තමන්ට මෙම ඛේදවාචකයට මුහුණ පෑමට සිදු වූ බව ගම්වාසීන් චෝදනා කරයි.

කෙසේ වෙතත් ඉවුර කැඩීයාමෙන් ජීවිත හානි කිසිවක් නොමැත. 

ඊයේ (ජන. 19) කළුතර පැවැති ජනරැලියකට එක්වෙමින් ජනාධිපති අනුර කුමාර දිසානායක මහතා පැවසූවේ ත්‍රිකුණාමලයේ තෙල් ටැංකි සංකීර්ණය හා සම්බන්ධව තෙල් පිරිපහදුවක් ඉදිකිරීම ඇතුළු තෙල් අපනයන කටයුතු සඳහා ඉන්දියාව සමග ඒකාබද්ධ සමාගමක් නිර්මාණය කිරීමට ශ්‍රී ලංකාව යෝජනා කර ඇති බවයි.

ඔහු තවදුරටත් සඳහන් කළේ මෙමඟින් ලෝක වෙළෙඳපොළට ඛනිජ තෙල් අලෙවි කරන රාජ්‍යයක් බවට ශ්‍රී ලංකාව පත්කළ හැකි බව ය.

ත්‍රිකුණාමලයේ ඇති තෙල් ටැංකි 99න් 61ක් මෙම ඒකාබද්ධ ව්‍යාපාරය සඳහා භාවිත කළ හැකි බවද ජනපතිවරයා පෙන්වා දුන්නේය.

“අපිට ත්‍රිකුණාමලයේ තෙල් ටැංකි 99ක් තිබෙනවා. එක තෙල් ටැංකියක මෙට්‍රික් ටොන් දහදාහක් ගබඩා කරන්න පුළුවන්. ආසන්න වශයෙන් ගත්තොත් මෙට්‍රික් ටොන් ලක්ෂ දහයක් ඔය තෙල් ටැංකිවල ගබඩා කරන්න පුළුවන්. එම තෙල් ටැංකි දැන් දශක ගණනාවක් තිස්සේ දිරාපත් වෙමින් තිබෙනවා.

එය ආරම්භයේදී බ්‍රිතාන්‍ය සමාගමකට අයත්ව තිබුණා. සිරිමා බණ්ඩාරනායක සමයේ පවුම් ලක්‍ෂ දෙකහමාරක්දී මෙය ආණ්ඩුවට ගත්තා. ඇත්තෙන් ම මේ තෙල් ටැංකි 99 ලංකාවට තෙල් බෙදන්න වැඩියි. තෙල් බෙදන්න මෙච්චර ගබඩා ඕන නැහැ. මුතුරාජවෙල, කොළොන්නාවේ තෙල් ගබඩා තිබෙනවා. ත්‍රිකුණාමලයේ තවත් තෙල් ටැංකි 99ක් අවශ්‍ය නැහැ. ඒ පළාතේ තෙල් බෙදන්න අපට තෙල් ටැංකි විසිහතරක් ප්‍රමාණවත්.

අප එය ගණනය කර බැලුවා. අප එම තෙල් ටැංකි 24 අපේ සංස්ථාවට ගත්තා. අයි.ඕ.සී. සමාගමට තවත් ටැංකි 9ක් 10ක් පමණ දෙන්න එකඟ වුණා. තවත් තෙල් ටැංකි හැට එකක් ඉතිරි වුණා. ඒ කියන්නේ මෙට්‍රික් ටොන් හයලක්ෂ දසදහසක් ගබඩා කරන්න පුළුවන්. හැබැයි අප රටට එතරම් තෙල් අවශ්‍ය නැහැ. ඒ නිසා අපගේ තෙල් සංස්ථාව සහ ඉන්දියාව එක්ව ඒකාබද්ධ සමාගමක් නිර්මාණය කරන්නට අප ඉන්දියාවට යෝජනා කළා. අනතුරුව පිරිපහදුවක් දාන්නත් යෝජනා කළා.