Main news (Sinhala)

ආනයන බහාලුම් 323ක් රේගු පරීක්ෂාවකින් තොරව නිදහස් කිරීම සම්බන්ධයෙන් ආණ්ඩුවට එරෙහිව එල්ලව වන චෝදනා සම්බන්ධයෙන් විශේෂ පැහැදිළි කිරීමේ මාධ්‍ය නිවේදනයක් ශ්‍රී ලංකා රේගුව විසින් අද (29) පස්වරුවේ නිකුත් කළේය.

එම බහාලුම් අතර එස්පෝ ලංකා යන ආයතනය නමින් ආනයනය කර ඇති බහාලුම් කිසිවක් අඩංගු නොවන බවත් විශේෂයෙන් සඳහන් කර ඇත.

එක්ස්පෝ ලංකා හෝල්ඩිංග්ස් සමූහයේ නිර්මාතෘවරයා වනුයේ වත්මන් ආණ්ඩුවේ බස්නාහිර පළාත් ආණ්ඩුකාර හනිස් යුසුෆ් මහතාය.

ඔහු මෙරට මෙන්ම ජාත්‍යන්තර වෙළඳපොල තුලත් කීර්තිමත් ව්‍යාපාරිකයන් අතලොස්ස තුළ ඉහලින්ම සිටිනා පුද්ගලයෙකි.

වත්මන් ආණ්ඩුකාර තනතුරට අදාල කිසිදු වරප්‍රසාදයක් ඔහු ලබාගෙන නොමැත.

කෙසේවෙතත් විවිධ පාර්ශව විසින් හනිස් මහතාගේ ව්‍යාපාරයට අයත් බහාලුම් තොගයක් මෙලෙස නිදහස් කර ඇති බවට චෝදනා එල්ලකරමින් ඇති පසුබිමක රේගුව විසින් මෙම නිවේදනය නිකුත්කිරීම සුවිශේෂී වෙයි.

කරුණු 8කින් යුත් මෙම නිවේදනයේ භාණ්ඩ නිදහස් කිරීම සඳහා ශ්‍රී ලංකා රේගුව අනුගමනය කරන ක්‍රමවේදය, පරික්ෂාව සඳහා තෝරා ගන්නා ලද බහාලුම් නිදහස් කිරීම ප්‍රමාදවීමට හේතු වූ කරුණු ද එහි ඇතුළත් කර තිබේ.

තවද අවි ආයුධ, රත්‍රන් හා මත්ද්‍රව්‍ය වැනි භාණ්ඩ නීති විරෝධිව රට තුළට පැමිණීමේ හා රේගු ආදායම අහිමිවීමේ හැකියාවක් නොපැවති බවත් එම නිවේදනයෙන් ශ්‍රී ලංකා රේතුව වැඩිදුරටත් පවසා සිටියි.

අදාළ සම්පූර්ණ පැහැදිලි කිරීම පහතින්,

අද විදේශ කටයුතු අමාත්‍යාංශ කාර්යාලයේදී මෙරට එක්සත් ජාතීන්ගේ සංවිධානයේ නේවාසික සම්බන්ධීකාරක මාර්ක් ඇන්ඩෘ සහ විදේශ කටයුතු, විදේශ රැකියා හා සංචාරක අමාත්‍ය විජිත හේරත් අතර හමුවක් පැවැත්විය.

ශ්‍රී ලංකාවේ බලයට පත් වූ නව රජය පිළිබඳව එක්සත් ජාතීන්ගේ සංවිධානය දැඩි විශ්වාසයෙන් හා බලාපොරොත්තුසහගතව සිටින බව එහිදී මාර්ක් ඇන්ඩෘ මහතා පැවසීය.

එහිදී මාර්ක් ඇන්ඩෘ මහතා විජිත හේරත් අමාත්‍යවරයාට පැවසූවේ නව රජය විසින් බලාපොරොත්තු වන සැගවුණු වත්කම් සොයාගැනීමේ කාර්යය සඳහා එක්සත් ජාතීන්ගේ සංවිධානයේ ආයතනවල සහය ලබා දීමට සූදානම් බවයි.

නිව්යෝක්හි එක්සත් ජාතීන්ගේ සංවිධානයේ සාමය ගොඩනැගීමේ කොමිසම සමග ශ්‍රී ලංකාව සමීපව කටයුතු කිරීම වැදගත් බව ත් ජාතික ඒකාබද්ධතාවය ඇති කිරීමෙහිලා රජය ගෙනයන වැඩසටහන්වලට සම්පූර්ණ සහාය දීමට සූදානම් අතර ඒ සඳහා මූල්‍ය ආධාර ලබා දීමට මැදිහත් වන බව ද ඔවුන් අවධාරණය කර ඇත.

මෙරට සමුද්‍ර තීරයේදී බේරාගත් රෝහින්‍යා සරණාගතයින්ට මානුෂික අයුරින් සලකන ලද ආකාරය මාර්ක් ඇන්ඩෘගේ ප්‍රශංසාවට ලක් වී තිබේ.

ඔහු තවදුරට ත් සඳහන් කර ඇත්තේ, එක්සත් ජාතීන්ගේ සංවිධානයේ මහ ලේකම්වරයා වසර අවසානයේ ශ්‍රී ලංකාවට පැමිණීමට බලාපොරොත්තු වන බව ය.

මෙහිදී පසුගිය මැතිවරණවලදී ශ්‍රී ලාංකික ජනතාව ජාති භේද හෝ පළාත් භේදවලින් තොරව නව රජය විශාල ආසන සංඛ්‍යාවකින් බලයට පත්කිරීම ඓතිහාසික සිදුවීමක් බව විජිත අමාත්‍යවරයා නේවාසික නියෝජිතයන්ට පවසා ඇත.

එමෙන් ම, උතුරු නැගෙනහිර පළාත්වල පවරාගෙන ඇති ඉඩම් අයිතිකරුවන්ට ආපසු දීම ඉදිරි කාලයේ තවදුරට ත් කටයුතු කරන බව ත් ශ්‍රී ලංකා පොලීසියට බඳවාගැනීමේ දී සියලු ජාතීන් නියෝජනය වන පරිදි බඳවා ගැනීමට රජය පියවර ගෙන ඇති බව ත් අමාත්‍යවරයා සඳහන් කර තිබේ.

ඉදිරියේදී එක්සත් ජාතීන්ගේ සාම හමුදා සඳහා ශ්‍රී ලාංකික ත්‍රිවිධ හමුදා සාමාජිකයන් බඳවා ගැනීම වැඩි කිරීමට කටයුතු කරන මෙන් නේවාසික නියෝජිතගෙන් අමාත්‍යවරයා ඉල්ලා සිටි අතර ඒ සම්බන්ධව ඉතා ඕනෑකමින් සොයා බලන බව ඔවුන් පොරොන්දු වී ඇත.

අද (29) පස්වරුවේදී පාර්ලිමේන්තු විශේෂ පොලිස් කණ්ඩායමක් විසින් මන්ත්‍රී වෛද්‍ය අර්ච්චුනා රාමනාදන් අත්අඩංගුවට ගත් බව පොලීසිය පවසයි.

පාර්ලිමේන්තු මන්ත්‍රී අර්ච්චුනා රාමනාදන්ව අත්අඩංගුවට ගෙන ඇත්තේ යාපනය ප්‍රදේශයේදී බවත් සැකකාර මන්ත්‍රීවරයාව අනුරාධපුර මහෙස්ත්‍රාත් අධිකරණය වෙත ඉදිරිපත් කිරීමට නියමිත බවත් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග මහතා සඳහන් කළේය.

සැකකාර මන්ත්‍රීවරයා විසින් 2025 ජනවාරි 20 වනදා රාත්‍රී කාලයේ අනුරාධපුර තලාව ප්‍රදේශයේදී රථවාහන රාජකාරිවල නිරතව සිටි පොලිස් නිලධාරීන්ට සාපරාධී බලහත්කාරය පා රාජකාරියට බාධා කිරීමේ සිදුවීමකට අදාලව මෙලෙස අත්අඩංගුවට ගෙන ඇත.

පාර්ලිමේන්තු මන්ත්‍රී නාමල් රාජපක්ෂ සිය X ගිණුමේ සටහනක් තබමින් පවසන්නේ ක්‍රිෂ් ගනුදෙනුව සම්බන්ධ නඩුව හරහා පෙනෙන්නේ වත්මන් ආණ්ඩුවේ අසාර්ථකත්වය බවත් සත්‍ය ඉක්මණින් ජයගනු ඇති බවත්ය.

තමාට එරෙහිව නීතිපතිවරයා විසින් අධිචෝදනා පත්‍රයක් ගොනු කර ඇති බව මාධ්‍යවලින් කියවූ බවත් යහපාලන ආණ්ඩුව සමයේ මේ සම්බන්ධයෙන් විමර්ශනය කර නීතිපතිවරයා වෙත යොමුකරන ලද්දේ වසර 8 කට පෙර බවත් එම සටහනේ ඔහු වැඩිදුරටත් දක්වා ඇත.

මාලිමා ආණ්ඩුව රාජපක්ෂ පවුලට එරෙහිව දේශපාලන දඩයමක් දියත්කර ඇති නමුත් තමා අධිකරණය කෙරෙහි විශ්වාසයෙන් සිටින අතර යුක්තිය ජය ගනු ඇතැයි විශ්වාස කරන බවත් මන්ත්‍රීවරයා එහි දක්වා ඇත.

ජාතික ජනබලවේග ආණ්ඩුව තම පවුලට එරෙහිව චෝදනා ගොතන බවත් එමගින් රට පාලනය කිරීමේදී ඔවුන්ගේ අසාර්ථකත්වය පිළිබඳ අවධානය වෙනතකට යොමු කරන බවත් ඔහු පවසයි.

හබරණ – මින්නේරිය මාර්ගයේ 07 කණුව ප්‍රදේශයේ දී බස් රථ දෙකක් මුහුණට මුහුණ ගැටී සිදුවූ අනතුරකින් පුද්ගලයින් 16 දෙනෙකු තුවාල ලබා රෝහල් ගත කර ඇති බව වාර්තා වෙයි.

පුද්ගලික් බස් රථයක් හා ලංකා ගමනාගමන මණ්ඩලයට අයත් බස් රථයක් මෙලෙස අනතුරට ලක්ව ඇති අතර අනතුරින් ලංගම බස් රථයේ ගමන්කළ 12 දෙනෙකු සහ පුද්ගලික බස් රථයේ ගමන් කළ පුද්ගලයින් සිව්දෙනෙකු තුවාල ලබා පොළොන්නරුව මහ රෝහලට සහ හබරණ ප්‍රාදේශීය රෝහලට ඇතුළත් කර තිබේ. 

බස් රථ දෙකෙහි රියදුරන්ද අනතුරින් තුවාල ලබා ඇත.

පුද්ගලික බස් රථය කටුනායක සිට සිරිපුර ප්‍රදේශයේ අවමංගල්‍ය උත්සවයකට යමින් සිටිය දී මෙලෙස අනතුරට ලක්ව ඇති අතර, එහි රියදුරගේ අපරික්ෂාකාරී රිය ධාවන අනතුරට හේතුවන්ට ඇති බවට පොලීසිය සැක පළ කරයි.

වත්මන් ආණ්ඩුව බලයට පත්වීමෙන් අනතුරුව ලංකා ගමනාගමන මණ්ඩලයේ සභාපති ලෙස පත්කළ රමාල් සිරිවර්ධන මහතා සිය ධූරයෙන් ඉල්ලා අස් වී තිබේ.

මහාමාර්ග නියෝජ්‍ය අමාත්‍ය ප්‍රසන්න කුමාර ගුණසේන මහතා පවසා සිටියේ, රමාල් සිරිවර්ධන මහතාගේ ඉල්ලා අස්වීමේ ලිපිය අමාත්‍යංශය වෙත ලැබී ඇති බවය. 

ඔහි තම පුද්ගලික හේතුවක් මත මෙලෙස සිය ධූරයෙන් ඉල්ලා අස්වී ඇති බව පැවසේ.

ඊයේ (28) රැස්වූ ශ්‍රී ලංකා මහ බැංකුවේ මුදල් ප්‍රතිපත්ති මණ්ඩලය මුදල් ප්‍රතිපත්ති ස්ථාවරය සම්බන්ධයෙන් තීරණයක් ගෙන තිබේ.

දැනට පවතින එක්දින ප්‍රතිපත්ති පොලී අනුපාතිකය තවදුරටත් පවත්වාගෙන යෑමට තීරණය කර ඇති බව වාර්තා වේ.

ඒ අනුව ශ්‍රී ලංකා මහ බැංකුවේ එක්දින ප්‍රතිපත්ති පොලී අනුපාතිකය (OPR) සියයට 8.00 මට්ටමේ ඉදිරියටත් පවතිනු ඇත.