Out of the box (Sinhala)

පිවිතුරු හෙළ උරුමයේ නායක උදය ගම්මන්පිල මහතා පවසන්නේ තමා සිදුකළ බරපතල ගනයේ වැරදි 2ක් යටතේ ඕනෑම මොහොතක තමන් අත්අඩංගුවට ගැනීමේ අවදානමක් පවතින බවයි.

තමන් සිදුකල ප්‍රකාශ දෙකකට එරෙහිව එලෙස අත්අඩංගුවට ගනු ඇතැයි මාධ්‍ය හමුවකට එක්වෙමින් ඔහු පැවසීය.

“බල්ලන් බත් කෑම සහල් හිඟයට හේතුවක් විදියට අතිගරු ජනාධිපතිතුමා දැවැන්ත පරීක්ෂණයකින් පස්සේ සොයාගෙන තියෙනවා. මොකද මෑත කාලේ බල්ලෝ පුරුදුවෙලා තියෙනවා කඩේ ගිහින් හාල් ගෙනල්ලා උයාගෙන කන්න.

මෙතෙක් කල් අපේ ඉතිහාසය පුරාවට ගෙදර ඉන්න බල්ලට පූසට බත් ටිකක් දාන එක අපේ කෑම වේලේ කොටසක් විදියටයි සලකලා තියෙන්නේ.

ඒක කොහොමත් අපේ ඒක පුද්ගල සහල් පරිභෝජනය ඇතුලේ තියෙනවා. බල්ලොන්ට බත් දෙන එක ප්‍රචලිත කිරීම සහ පොල් සම්බෝල කෑම කියන ජාතික අපරාධ දෙකට මම වගකිව යුත්තෙක් ඒ නිසා ඕනෑම මොහොතක මාව අත්අඩංගුවට ගැනීමේ අවදානමක් තියෙනවා”

අධිකරණ අමාත්‍ය හර්ෂණ නානායක්කාර මහතා අද යෝෂිත රාජපක්ෂට ඇප ලබාදීම සම්බන්ධයෙන් (27) අදහස් දැක්වීය. 

“යෝෂිත රාජපක්ෂ සම්බන්ධ වූ මුදල් විශුද්ධිකරණ සිද්ධිය දැනට අවුරුදු 8කට පමණ කලින් තමයි සිදුවෙන්නේ. මේ දක්වා යෝෂිතව නඩුවේ සැකකරුවෙක් ලෙස නම් කෙරුණේ නැහැ. එතකොට යම් පුද්ගලයෙක්ට අධිචෝදනා පත්‍රයක් මහාධිකරණයේදී ඉදිරිපත් කරන්න කලින් ඔහු සැකකරුවෙකු වශයෙන් ඔහුගෙන් කටඋත්තර ගැනීම අත්‍යවශ්‍ය කාරණාවක්.

නීතිපතිවරයා විසින් උපදෙසක් දීලා තිබෙනවා පොලීසියට මෙම තැනැත්තාව සැකකරුවෙකු වශයෙන් කටඋත්තරයක් ගන්න අධිකරණයට ඉදිරිපත් කරන්න කියලා. ඒක තමයි සාමාන්‍ය ක්‍රියා පටිපාටිය.

ඇප පනතේ ප්‍රතිපාදන අනුව විමර්ශනවලට බාධාවක් වෙන්නේ නැත්නම් ඔහු රටින් පළා යන්නේ නැත්නම් ඇපදීම තමයි සාමාන්‍ය ස්භාවය. යෝෂිත සම්බන්ධයෙන් වූ මුදල් විශුද්ධිකරණ නඩුව පවරන නිසා තමයි ඒකට අවශ්‍ය ක්‍රියාපටිපාටියේ කොටසක් වශයෙන් තමයි අත්අඩංගුවට ගත්තේ ඇප දෙනවා කියන්නේ නඩුයෙන් නිදහස් වෙනවා කියන එක නෙමයි.”

වැල්ලවාය පොලිස් බලප්‍රදේශයට අයත් වීරසේකරගම ප්‍රදේශයේ දී වයස අවුරුදු 19ක තරුණියක් සිදුකළ පිහි ප්‍රහාරයකින් වයස අවුරුදු 31ක විවාහක තරුණයෙක් ජීවිතක්ෂයට පත් වී තිබේ.

මොවුන් දෙදෙනා අඹුසැමියන් ලෙස වීරසේකරගම ප්‍රදේශයේ නිවසක් කුලි පදනම මත ලබා ගෙන එහි ජීවත්ව සිට ඇති නමුත් නීත්‍යානුකූලව විවාහ වී නොමැති බව වාර්තා වේ.

ඊයේ රාත්‍රියේ දෙදෙනා අතර සිදු වූ බහින් බස් වීමක් දුරදිග ගොස් තරුණිය විසින් මෙම පිහි ඇනුම සිදුකර ඇති අතර මියගිය විවාහකයා නාවලපිටිය ප්‍රදේශයේ පදිංචි පුද්ගලයෙකි.

පිහි ප්‍රහාරයෙන් පසු එම පුද්ගලයා වැල්ලවාය මූලික රෝහලට ඇතුළත් කර ඇති අතර එහිදී ඔවු මියගොස් ඇත.

සැකකාර තරුණිය හල්දුමුල්ල සොරගුනේ ප්‍රදේශයේ පදිංචි තැනැත්තියක වන අතර වැල්ලවාය පොලිසිය විසින් ඇයව අත්අඩංගුවට ගෙන තිබේ.

අත්අඩංගුවට ගත් තරුණිය වැල්ලවාය මහෙස්ත්‍රාත් අධිකරණයට ඉදිරිපත් කිරීමට නියමිත බව වාර්තා වේ.

පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිවේදී බුද්ධික මනතුංග මහතා ඊයේ (26) පැවසූවේ රටේ සිදුවන අපරාධ සහ මත්ද්‍රව්‍ය මැඬලීම සඳහා පොලිස් දෙපාර්තමේන්තුව ක්‍රියාත්මක කළ විශේෂ මෙහෙයුම්වලදී ටී 56 ගිනි අවි 03 ක්, පිස්තෝල ගිනි අවි 03 ක් සමග අපරාධවලට ඍජුවම සම්බන්ධ සැකකරුවන් 167 දෙනකු අත්අඩංගුවට ගෙන ඇති බවයි.

වැඩබලන පොලිස්පතිවරයාගේ උපදෙස් මත සිදුකළ මෙම මෙහෙයුම්, දින 10ක් තුළ සිදු කළ වාර්තා සැලකිල්ලට ගැනීමේදී පුද්ගලයන් එක්ලක්ෂ හැත්තෑ දෙදහස් අටසිය හැත්තෑහත් දෙනකු (1,72,877) සහ රථවාහන හැටහතර දහස් දෙසිය පනස්අටක් (64,258) පරීක්ෂා කළ බවත් මාධ්‍ය ප්‍රකාශකවරයා සඳහන් කළේය.

මෙම වාහන පරීක්ෂා කිරීම සිදු කළේ රථවාහන නිලධාරීන් සිදුකරන සාමාන්‍ය රාජකාරිවලට අමතරව බවත් ඒ මහතා සිහිපත් කළේය.

එමෙන්ම අධිකරණ වරෙන්තු මත සිටි 256 දෙනක් කේරළ ගංජා කිලෝ 462ක්, හෂීස් කිලෝ 15ක්, අයිස් කිලෝ 8 ක්ද මෙම මෙහෙයුම් අතරතුරදී අත්අඩංගුවට ගෙන තිබේ.

මොරගහහේන පොලිසිය පවසන්නේ, අත්ලේ සඟවාගෙන රැගෙන යා හැකි ආකාරයේ අඟල් 4 – 1/2 ක් පමණ දිගැති ඉතාලියේ නිෂ්පාදිත ස්වයංක්‍රීය ගිනි අවියක් සහ 2.2 ජීව උණ්ඩ පහක් සහ 9mm වර්ගයේ ජීව උණ්ඩ 2 ක් කහතුඩුව මාගම්මන ඉදි කරමින් පවතින නිවසක කුෂන් මෙට්ටයක් තුල සඟවා තිබියදී සොයා ගත් බවයි.

පොලිසිය පවසන්නේ, එම ගිනි අවියේ හිමිකරු වන මැගසින් බන්ධනාගාරයේ රඳවා සිටින මත්ද්‍රව්‍ය ජාවාරම්කරුවෙකුගේ මස්සිනා ආධාර අනුබලදීම යටතේ හෝමාගම් දොලේ කඩේ ප්‍රදේශයේදී අත්අඩංගුවට ගත් බවයි.

මීට සිව් දිනකට ඉහතදී ඉතාලියේදී මිය ගිය පුද්ගලයෙකුට අයත් හෝමාගම් මාගම්මන ඉඳි කරමින් පවතින නිවසක මත්ද්‍රව්‍ය චෝදනාවකට මැගසින් බන්ධනාගාරයේ රඳවා සිටින පුද්ගලයෙකු විසින් ගිනි අවියක් සඟවා ඇති බවත් එය ඔහුගේ මස්සිනාට රැගෙන යාම සඳහා දුරකථන ඇමතුම් මඟින් උපදෙස් ලබා දී ඇති බවත් බස්නාහිර පළාතේ බුද්ධි කොට්ඨාසයේ මොරගහහේන පොලිසියට අනුයුක්ත පොලිස් සැරයන් (9294) රෝහණ නිලධාරියාට ලද තොරතුරක් ලැබී තිබූ බව පොලිසිය පවසයි.

ඒ අනුව පානදුර කොට්ඨාස භාර ජ්‍යෙෂ්ඨ පොලිස් අධිකාරි චමිල් රත්නායක මහතාගේ උපදෙස් මත අපරාධ විමර්ශන අංශයේ ස්ථානාධිපති උප පොලිස් පරීක්ෂක ඩබ්ලිව්. එම්. සි. මදුශංක මහතා ඇතුළු නිලධාරීන් කණ්ඩායමක් පොලිස් විශේෂ කාර්ය බළකා හොරණ කඳවුරේ නිලධාරීන් සමඟ එම නිවස වටලා පුරා පැය 4 කට අසන්න කාලයක් සෝදිසියට ලක්කර මෙට්ටිය තුළ තුළ ඉතා සූක්ෂම ලෙස සඟවා තිබූ ගිණි අවිය සහ ජීව උණ්ඩ සොයා ගැනීමට සමත් වී ඇත.

පොලිස් නිලධාරීන් එම නිවස වැටලීමට පැය දෙකකට පමණ ඉහතදී අත්අඩංගුවට ගත් සැකකරු. එම නිවස වෙත ගොස් ගිනි අවිය සොයා ගැනීමට උත්සාහ දරා ඇතත් එය නිශ්ඵල වී ඇතැයි සැකකරුගේ ප්‍රකාශයකින් අනාවරණය වී යැයි පොලිසිය කියයි

මෙම ගිනි අවිය බන්ධනාගාර ගතව සිටින පුද්ගලයාට ලද ආකාරය සහ එමගින් මනුෂ්‍ය ඝාතන සිදුකර තිබේද යන්න පැති කීපයක් ඔස්සේ විමර්ශන සිදු කිරීමට නියමිතය.

අත්අඩංගුවට ගත් සැකකරු සහ ගිනි අවිය කහතුඩුව පොලිසිය වෙත භාරදී ඇත.