Why is this happening (Sinhala)

ලංකා භාණ්ඩ හා ප්‍රවාහන සංගමය පවසන්නේ රේගුවේ හටගෙන ඇති බහාලුම් ප්‍රමාදය හේතුවෙන් ආනයනික භාණ්ඩවල මිල ඉහළ යන බවත් එහි බර පාරිභෝගිකයන් පිට අනිවාර්යයෙන් ම පැටවෙන බවත් ය.

මෙම ප්‍රමාදය මත ආනයනික භාණ්ඩවල මිල තීරණය කිරීමේ ගැටලුවක් පවතින අතර ලොරි හිඟය හේතුවෙන් ලොරි ගාස්තු ඉහළ යෑමේ අවාසිය ද පාරිභෝගිකයා මත සෘජුව ම පැටවෙන බව ත් ඔහු සඳහන් කළේ ය.

මීට පෙර දිනකට ගෙවූ රුපියල් 15,000 – 20,000ත් අතර මුදල මේ වනවිට රුපියල් 40,000 – 50,000 දක්වා වැඩි කිරීමට රථකරුවන් කටයුතු කර ඇති බවත් එම සංගමයේ සභාපති ඉනාම් කෆූර් මහතා වැඩිදුරටත් පැවසීය.

එමෙන් ම, මේ හේතුවෙන් ආනයනකරුවන්ට භාණ්ඩවල මිල තීරණය කිරීමේදී විශාල ගැටලුවලට මුහුණ දීමට සිදුවන බවත් කෙසේ හෝ භාණ්ඩ විකුණා ගත්තද පාරිභෝගිකයන්ට එහි පිරිවැය ගෙවීමට සිදුවන බව ත් කෆූර් මහතා පෙන්වා දුන්නේය.

හම්බන්තොට චීන පිරිපහදුව ඉදිකිරීම සම්බන්ධයෙන් වූ අතීතය රටට අනාවරණය කිරීමට හිටපු බලශක්ති නියෝජ්‍ය අමාත්‍ය ඩීවී චානක මහතා ඊයේ (17) කටයුතු මාධ්‍ය හමුවක් කැඳවා තිබුනි.

එහිදී චානක මහතා කියා සිටියේ ඊට අදාළ ඉඩම හිටපු ජනාධිපති ගෝඨාභය රාජපක්ෂ මහතා වෙන් කළ බවත්, ඊට අදාළ කටයුතු කංචන විජේසේකර මහතා ඉදිරියට ගෙන ගිය බවත්ය.

හම්බන්තොට ආයෝජන කළාපයක් ඇතිකරනු ලැබුවේ ගෝඨාභය රාජපක්ෂ මහතා බවත් එම ආයෝජන කළාපය ඇතිකිරීමෙන් පසු මෙවැනි තෙල් පිරිපහදුවක් ඇතිකිරීම සඳහා හිටපු අමාත්‍ය කංචන මහතාගේ මූලිකත්වයෙන් ටෙන්ඩර් කැඳවීමෙන් පසු ඒ සඳහා සිනොපැක් සමාගම තෝරාගත් බවත් ඩීවී චානක මහතා පවසයි.

නමුත් එම පිරිපහදු ක්‍රියාවලියට අවශ්‍ය විදුලිය සහ ජලය සපයාව්ගැනීමේ ගැටළුකාරී තත්වයක් මතුවූ බවත් එම ගැටළු සඳහා පිළියම් යෙදුවේ තමා ඇතුළු කණ්ඩායම බවත් මන්ත්‍රීවරයා පවසයි.

එමෙන්ම සිනොපැක් සමාගමට මෙරට පෙට්‍රල් සෙඩ් 150ක් ලබාදීමත් මෙම ව්‍යාපෘතියේ මූලික පියවරක් ලෙස සිදුකළ බවත් මෙවර රජය මෙම ආයෝජනය සඳහා සිනොපැක් සමාගමත් සමඟ ගිවිසුමක් අත්සන් කළ බවට පැවසූවත් එම ගිවිසුම මින් පෙර අත්සන් කර තිබූ බවත් මන්ත්‍රීවරයා වැඩිදුරටත් පැවසීය.

පොලිස් මත්ද්‍රව්‍ය කාර්යාංශය මඟින් සිදු කරන ලද සෝදිසියකදී මත්ද්‍රව්‍ය ජාවාරම්කරුවෙකු සතුව තිබූ රුපියල් කෝටි 28ක් සොයාගැනීමට සමත්ව තිබේ.

එය මෙතෙක් ඉතිහාසයේ මත්ද්‍රව්‍ය ජාවාරම්කරුවෙකු සතුව තිබූ වැඩිම මුදල බව සඳහන්.

මත්ද්‍රව්‍ය ජාවාරම්කරු බන්ධනාගාරගතව සිටින අතර එහි හිඳිමින් ජාවාරම මෙහෙයවා ඇති බව පොලීසිය පවසයි.

කෝටි 28ක් වූ එම මුදල සොයාගෙන ඇත්තේ කුරුණෑගල ප්‍රදේශයේ නිවසකිනි.

අයිස් මත්ද්‍රව්‍ය ග්‍රෑම් 18ක්, කැබ් රථයක් සහ වෑන් රථයක් ද එම සෝදිසියේදී පොලිසිය විසින් සොයාගෙන ඇති අතර එම මත්ද්‍රව්‍ය තොගය, කැබ් රථය සහ වෑන් රථය සිය භාරයට ගත් බව පොලීසිය සඳහන් කරයි.

බන්ධනාගාරගතව සිටින ජාවාරම්කරු මෙම සිද්ධියට අදාළව කුරුණෑගල මහෙස්ත්‍රාත් අධිකරණය වෙත ඉදිරිපත් කර ඇති අතර ඔහු රඳවාගෙන ප්‍රශ්න කිරීම සඳහා මහෙස්ත්‍රාත්වරයා අවසර ලබාදී ඇති බවද සඳහන් වේ.

මහජන ආරක්ෂක නියෝජ්‍ය අමාත්‍ය නීතිඥ සුනිල් වටගල මහතා පවසන්නේ, අභියාචනාධිකරණයේ වත්මන් සභාපති විනිසුරු නිශ්ශංක බන්දුල කරුණාරත්න මහතාට එරෙහිව රජය විසින් ගෙන ඒමට නියමිත දෝෂාභියෝග සඳහා මේ වන විට මන්ත්‍රීවරුන් 118ක් අත්සන් තබා ඇති බවයි.

එමෙන්ම එම දෝෂාභියෝග සඳහා සමඟි ජන බලවේගයද සහ දැක්වීමට තීරණය කර ඇති බවද වාර්තා වේ.

විනිසුරු නිශ්ශංක බන්දුල කරුණාරත්න සම්බන්ධයෙන් ඉකුත් දෙසැම්බර් මස 12 වන දා ශ්‍රේෂ්ඨාධිකරණය විසින් නිකුත් කරනු ලැබූ මූලික අයිතිවාසිකම් නඩුවක තීන්දුවක් හේතුවෙන් ඔහුට එරෙහිව දෝෂාභියෝගයක් ගෙන ඒම සඳහා රජයේ අවධානය යොමු විය.

රනිල් වික්‍රමසිංහ පාලන සමයේ අභියාචනාධිකරණයේ සභාපති විනිසුරු නිශ්ශංක බන්ධුල කරුණාරත්න ශ්‍රේෂ්ඨාධිකරණ විනිසුරු ධූරය සඳහා නම් කරමින් ඔහුගේ නම ආණ්ඩුක්‍රම ව්‍යවස්ථාදායක සභාව වෙත යෝජනාවක් ඉදිරිපත් කරනු ලැබූ නමුත් බහුතර සමාජිකයින්ගේ තීරණය මත එම නාම යෝජනාව ප්‍රතික්ෂේප කිරීමට තීන්දු කළේය.

පුවත්පතකට පිලිතුරු දෙමින් හිටපු ඇමැති, මනූෂ නානායක්කාර මහතා පවසන්නේ, සිය සහෝදරයාගේ මූල්‍ය වංචා සිද්ධි නිසා වසර දෙකකින් තමන්ට නිවෙසට යෑමට නොහැකි වී ඇති බවයි.

තමා සිය මැතිවරණ ව්‍යාපාරය කරගෙන ගියේද වෙනත් ස්ථානයක සිට බවත් සහෝදරයාගේ මූල්‍ය වංචා පිළිබඳව මුල්වරට හෙළි කළේ තමා බවත් හිටපු අමාත්‍යවරයා පවසයි.

තමන් එම වංචා සම්බන්ධයෙන් පැමිණිලි කළ දා සිට ඔහු සමඟ පැවැති හිතවත්කම් ද අත්හැරි බවත් එක කුස ඉපදුණත් පුද්ගලයන් එකිනෙකාට වෙනස් බවත් නානායක්කාර මහතා වැඩිදුරටත් පවසයි.