By unusuma.lk on (LK time)
කෝප් කමිටුවේ සභාපති ජාතික ජනබලවේගයේ පාර්ලිමේන්තු මන්ත්‍රී නිශාන්ත සමරවීර මහතා පවසන්නේ අභිනවයෙන් පත් වූ පොදු ව්‍යාපාර කාරක සභාවට (කෝප්) පළමු වටයේදී රාජ්‍ය ආයතන තුනක ප්‍රධානීන් කැඳවීමට නියමිත බවයි.
ඒ අනුව ජාතික තරුණ සේවා සභාවේ, ඖෂධ නියාමන අධිකාරියේ හා මැණික් හා ස්වර්ණාභරණ අධිකාරියේ නිලධාරීන් මෙම සතියේදී කැඳවීමට නියමිත බවත් මේ වනවිට එම රාජ්‍ය ආයතන තුනේ ක්‍රියාකාරිත්වය මෙන්ම ආසන්න ප්‍රගතිය ගැන නිරීක්ෂණය කරමින් සිටින බවත් මන්ත්‍රීවරයා පවසයි.
රාජ්‍ය සංස්ථාවල සහ යම් ලිඛිත නීතියක් යටතේ ආණ්ඩුවට පැවරී ඇති වෙනත් ව්‍යාපාරවල ගිණුම් සහ ඒ ගිණුම් පිළිබඳ විගණකාධිපතිවරයාගේ වාර්තා පරීක්ෂා කිරීම පොදු ව්‍යාපාර පිළිබඳ කාරක සභාවෙන් සිදුවේ.
කෙසේවෙතත් පොදු ව්‍යාපාර පිළිබඳ කාරක සභාවේ (කෝප්) සාධාරණ නියෝජනයක් ලබා දෙන තෙක් එහි නියෝජනය සඳහා විපක්ෂයෙන් මන්ත්‍රිවරුන්ගේ නම් ඉදිරිපත් නොකිරීමට තීරණයක් ගෙන ඇති බව සමගි ජනබලවේගය පසුගිය දා ප්‍රකාශ කළේය.
සාමාජිකයන් 31 දෙනෙකුගේ සංයුතියෙන් යුත් පොදු ව්‍යාපාර කාරක සභාවේ විපක්ෂයට සාමාජිකයන් 12 දෙනකුගේ නියෝජනයක් ඉල්ලා සිටියත් එය හත් දෙනෙකුට සීමා කිරීම නිසා නාම ලේඛනයක් නොයැවූ බව සජබ පාර්ලිමේන්තු මන්ත්‍රි නලින් බණ්ඩාර පැවසීය.
විපක්ෂයට පොදු ව්‍යාපාර කාරක සභාවේ සාධාරණ නියෝජනයක්දී තිබියදීත් ඔවුන් ඊට සහභාගි නොවන්නේ නම් ආණ්ඩු පක්ෂ මන්ත්‍රිවරුන්ගේ සහභාගීත්වයෙන් එම කටයුතු කරගෙන යෑමට සභාපතිවරයා හැටියට තමා සූදානම් බවද පාර්ලිමේන්තු මන්ත්‍රි නිශාන්ත සමරවීර මහතා පැවසීය.
