ඉන්දියාව

ඉන්දීය මහ මැතිවරණය ඊයේ (2) අවසන් වූ අතර එම මැතිවරණය දින 44 ක් පුරාවට, අදියර 7 ක් යටතේ ඡන්ද මධ්‍යස්ථාන මිලියනයක් ඔස්සේ පැවැත්වූ අතර, මැතිවරණ නිලධාරීහු මිලියන 15 ක් මැතිවරණ රාජකාරිවල නිරතව සිටියහ.

ඉන්දීය මාධ්‍ය විසින් සඳහන් කරනා ආකාරයට එරට මහ මැතිවරණය නිමාවට පත් වෙද්දී, ඡන්ද මධ්‍යස්ථානවල, මැතිවරණ රාජකාරිවල යෙදී සිටි මැතිවරණ නිලධාරීන් තිස් තුන් දෙනකු උෂ්ණත්වය දරාගත නොහැකිව ජීවිතක්ෂයට පත්ව ඇත.

මේ වනවිට, ඉන්දියාවේ උතුරු සහ මධ්‍ය ප්‍රාන්ත‍යේ දැඩි උණුසුම් කාලගුණයක් පවතිනා අතර ඇතැම් නගරවල උෂ්ණත්වය සෙල්සියස් අංශක 49 පසු කර ඇති බව සඳහන්.

ඉන්දීය රජය විසින් එසේ මියගිය සෑම නිලධාරියකු වෙනුවෙන්ම ඉන්දීය රුපියල් මිලියන 1.5 ක වන්දි මුදලක් ලබා දීමට තීරණය කර ඇති බව පැවසේ.

උණුසුම් කාලගුණය හේතුවෙන් මේ වනවිට එරට පුරා මියගිය සමස්ත ඉන්දියානුවන් ගණන 58 ක් බව වාර්තා වේ. එම මරණ වාර්තා වී ඇත්තේ උත්තර ප්‍රදේශ්, බිහාර්, මධ්‍ය ප්‍රදේශ්, ඔඩිස්ෂා යන ප්‍රාන්තවලිනි.

ඉන්දියාවේ නවදිල්ලියේ ආගමික නිදහස උල්ලංඝනය වන බවට ආගමික නිදහස සම්බන්ධ ඇමෙරිකන් කොමිසම වාර්තාවක් නිකුත් කරමින් ඉන්දීය රජය විවේචනය කර ඇති පසුබිමක රුසියානු රජය එම ඇමරිකානු වාර්තාව සම්බන්ධයෙන් තම ස්ථාවරය ප්‍රකාශයට පත් කර තිබේ.

රුසියන් රජය වෙනුවෙන් එරට විදේශ කටයුතු අමාත්‍යාංශ ප්‍රකාශිකා මරීයා සකරෝවා ප්‍රකාශයක් නිකුත් කරමින් කියා සිටින්නේ, ඉන්දීය මහ මැතිවරණය අතරතුරේ, ඉන්දියාව අස්ථාවර කිරීමට ඇමෙරිකාව විසින් මෙවැනි වාර්තාවක් නිකුත් කර ඇති බවයි.

රුසියාව චෝදනා කරන්නේ ඉන්දියාවේ හින්දු වැසියන්ගේ ජාතිකවාදී මානසිනත්වය සහ ඉන්දියාවේ ඉතිහාසය සම්බන්ධයෙන් කිසිදු අවබෝධයක් නැති ඇමෙරිකාව ආගමික නිදහස සම්බන්ධව පදනම් විරහිතව චෝදනා එල්ල කරන බවය.

අග්‍රාමාත්‍ය මෝදි ප්‍රමුඛ භාරතීය ජනතා පක්ෂය හින්දු ජාතිකවාදී පක්ෂයක් වන අතර, ඔවුන් ඔවුන්ගේ මැතිවරණ ව්‍යාපාර කටයුතු සිදු කරන්නේ හන්දු වැසියන්ගේ ජාතිකවාදී හැඟීම් ඉස්මතු කරමින් යැයි විපක්ෂය වන කොංග්‍රස් පක්ෂය ප්‍රමුඛ විපක්ෂ සන්ධානය ද චෝදනා නගා ඇති පසුබිමක  ජාත්‍යන්තර ආගමික නිදහස සම්බන්ධ ඇමෙරිකන් කොමිසම අග්‍රාමාත්‍ය මෝදි ප්‍රමුඛ භාරතීය ජනතා පක්ෂ රජය විවේචනය කිරීම, ඉන්දියාව අස්ථාවර කිරීමට සැලසුමක් බව රුසියාව වැඩිදුරටත් පෙන්වා දෙයි.