ගලගොඩඅත්තේ ඥානසාර හිමිට සමාව ඉල්ලා භික්ෂූන් වහන්සේලා පිරිසක් විහාර මහාදේවී උද්‍යානයේ බුදු පිළිමය අසල අඛණ්ඩව රැඳීසිටීම වළක්වාලමින් ඊයේ (22) දින නිකුත් කළ නියෝගය වෙනස් නොකරන බව කොළඹ ප්‍රධාන මහේස්ත්‍රාත් අධිකරණය අද (23) දින ප්‍රකාශ කළේය.
භික්ෂූන් වහන්සේලා පිරිසක් වෙනුවෙන් පෙනී සිටි ජනාධිපති නීතිඥ මෛත්‍රී ගුණරත්න ඇතුළු නීතිඥවරු පිරිසක් ඉදිරිපත් කළ කරුණු සලකා බැලීමෙන් අනතුරුව කොළඹ ප්‍රධාන මහේස්ත්‍රාත් අසංග එස් බෝදරගම මෙම නියෝගය නිකුත් කළේය.
එම නියෝගය වෙනස් නොකළ ප්‍රධාන මහේස්ත්‍රාත්වරයා මෙම අධිකරණ නියෝගය කඩ කිරීම සම්බන්ධයෙන් පුද්ගලයින් කිහිප දෙනෙකු අත්අඩංගුවට ගැනීම සඳහා වරෙන්තු නිකුත් කරන ලෙසට පොලිසිය කළ ඉල්ලීමද ඉවත ඉවත දැමුවේය.
එවැනි වරෙන්තුවක් නිකුත් කිරීමට තරම් කරුණු මේ අවස්ථාවේදී අනාවරණ නොවන බවත් පොලිසියට අවශ්‍ය නම් අපරාධ නඩු විධාන සංග්‍රහයේ ප්‍රතිපාදන ප්‍රකාරව කටයුතු කිරීමට හැකියාව තිබෙන බව මහේස්ත්‍රාත්වරයා සඳහන් කරයි.
