Local news

විශ්වවිද්‍යාල සිසුන්ට අමතර මහපොළ වාරිකයක්.!

විශ්වවිද්‍යාල සිසුන්ට අමතර මහපොළ වාරිකයක්.!

දිවයිනට බලපා ඇති අයහපත් කාළගුණ තත්ත්වය හේතුවෙන් විශ්වවිද්‍යාල ප්‍රතිපාදන කොමිෂන් සභාව විසින් විශ්වවිද්‍යාල සිසුන්ට සඳහා අමතර මහපොළ වාරිකයක් ගෙවීමට තීරණය කර ඇත.

විවිධ දුෂ්කරතාවන්ට මුහුණ දුන් සිසුන්ගේ අධ්‍යයන කටයුතු අපහසුවෙන් තොරව නැවත ආරම්භ කිරීමට පසුගිය (28) වනදා මහපොළ වාරිකයක් ගෙවීමට කටයුතු කළ බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය සඳහන් කරයි.

එම වාරිකයට අමතරව ගෙවීමට තීරණය කළ මහපොළ වාරිකය එළැඹෙන (05) වනදා ගෙවීමට විශ්වවිද්‍යාල ප්‍රතිපාදන කොමිෂන් සභාව කටයුතු කරයි.

පැලවත්තේ බලය පාර්ලිමේන්තුවට දෙන්න.!

පැලවත්තේ බලය පාර්ලිමේන්තුවට දෙන්න.!

ජනාධිපතිවරයා වහාම පැලවත්තෙන් බලය ඉවත් කර නැවත පාර්ලිමේන්තුවට බලය පැවරීම සඳහා ක්‍රියා කළ යුතු බව හිටපු ජනාධිපති රනිල් වික්‍රමසිංහ සඳහන් කරයි.

ජනාධිපතිවරයා පක්ෂ නායකයන් කැඳවා වහා එම තීරණය ගත යුතුව තිබෙන්නේ යැයිද දේශපාලන පක්ෂ නායකයින් සහ නියෝජිතයින් අමතමින් හිටපු ජනාධිපති රනිල් වික්‍රමසිංහ අද (03) සඳහන් කරයි.

ජනාධිපති සහ අගමැති කාර්යාලවල ආපද‍ා මෙහෙයුම් මධ්‍යස්ථාන නැති බවත් පැලවත්තේ ජනතා විමුක්ති පෙරමුණේ මූලස්ථානය ප්‍රධාන ආපද‍ා මෙහෙයුම් කාර්යාලය බවට පත් වී ඇතැයිද හිටපු ජනාධිපතිවරයා සඳහන් කරයි.

පැලවත්තේ ජනතා විමුක්ති පෙරමුණේ දේශපාලන මණ්ඩලය විසින් වර්තමානයේ රාජ්‍ය බලය ක්‍රියාත්මක කරනු ලබන බවද හිටපු ජනාධිපතිවරයා සඳහන් කරයි.

දේවාල කමිටු සභාපතිවරයා ඝාතනයේ වෙඩික්කරු සියල්ල වමාරයි.!

දේවාල කමිටු සභාපතිවරයා ඝාතනයේ වෙඩික්කරු සියල්ල වමාරයි.!

පසුගියදා අම්බලන්ගොඩ, මෝදර දේවාල කමිටු සභාපතිවරයා ඝාතනය කළ වෙඩික්කරු ගාල්ල දිසා අපරාධ විමර්ශන කොට්ඨාසය මගින් අත්අඩංගුවට ගෙන ඇත.

අත්අඩංගුවට ගත් 28 හැවිරිදි සැකකරු අලුත්ගම ප්‍රදේශයේ පදිංචිකරුවෙකු වන අතර ඔහු අත්අඩංගුවට ගන්නා විට අයිස් මත්ද්‍රව්‍ය ග්‍රෑම් 10ක් තිබූ බව පොලීසිය සඳහන් කරයි.

මේ වනවිට බූස්ස අධි ආරක්ෂිත බන්ධනාගාරයේ රඳවා සිටින ‘ලොකු පැටී’ නම් අපරාධකරුගේ පාර්ශවයෙන් තමන්ට මෙම ඝාතන කොන්ත්‍රාත්තුව ලැබුණු බව ඔහුගෙන් සිදුකළ ප්‍රශ්න කිරීම්වලදී හෙළිකර ඇත.

තමන් මත්ද්‍රව්‍ය ජාවාරමේ නිරත බවත් ඒ ඔස්සේ ලොකු පැටී හඳුනාගත් බවත් එම ඝාතනය සඳහා රුපියල් 190,000ක මුදලක් ලබාදුන් බවත් එම මුදලින් අයිස් මත්ද්‍රව්‍ය සහ මත්පෙති මිලදී ගත් බවද සැකකරු පොලීසිය හමුවේ හෙළිකර ඇත.

තවද පොලීසිය විසින් අත්අඩංගුවට ගත් ‘මහදුර ඉසුර’ නැමැත්තා විසින් ඝාතනය සිදුකළ දිනයේ තමන් අලුත්ගම, දර්ගා නගරයේදී ඔහු පැමිණි මෝටර් රථයට නංවා ගත් බවද සැකකරු පොලීසිය හමුවේ හෙළිකර ඇත.

අනතුරුව අත්අඩංගුවට ගත් සැකකරු අලුත්ගම මහෙස්ත්‍රාත් අධිකරණයට ඉදිරිපත් කිරීමෙන් පසු දින 7ක් රඳවාගෙන ප්‍රශ්න කිරීමට පොලිසියට අවසර ලබාදී ඇත.

ජනපති හදිසි කැබිනට් රැස්වීමක් කැඳවයි.!

ජනපති හදිසි කැබිනට් රැස්වීමක් කැඳවයි.!

ජනාධිපති අනුර කුමාර දිසානායකගේ ප්‍රධානත්වයෙන් අද (03) දින සවස 5.00ට හදිසි අමාත්‍ය මණ්ඩල රැස්වීමක් කැඳවා ඇත.

මෙම අමාත්‍ය මණ්ඩල රැස්වීම ජනාධිපති ලේකම් කාර්යාලයේදී පැවැත්වේ.

මේ මොහොතේ IMF එකෙන් ඉවත් වෙන්න.. මම ට්‍රම්ප් හමුවී කතා කරන්නම්.!

මේ මොහොතේ IMF එකෙන් ඉවත් වෙන්න.. මම ට්‍රම්ප් හමුවී කතා කරන්නම්.!

රටට බලපා ඇති විපත හමුවේ නව අයවැයක් සම්මත කරගැනීම සහ ජාත්‍යන්තර මූල්‍ය අරමුදලේ (IMF) ජනතා පීඩක කොන්දේසි ඉවත් කරගැනීම සම්බන්ධයෙන් රජය වහාම ක්‍රියාත්මක විය යුතු බව විපක්ෂ නායක සජිත් ප්‍රේමදාස මහතා විසින් අද පාර්ලිමේන්තුවේදී විශේෂ ප්‍රකාශයක් සිදු කරමින් සඳහන් කළේය.

වහාම නව අයවැයක් සම්මත කරගැනීමේ අවශ්‍යතාව විපතට පත් වූ ජනතාවට කඩිනමින් සහන සැලසීම සඳහා කෙටි කාලීන, දින කිහිපයක් තුළ ක්‍රියාත්මක වන නව අයවැයක් වහාම අවශ්‍ය බව ඒ මහතා අවධාරණය කළේය.

ලක්ෂ 15කට අධික ජනතාවක් විපතට පත් වී ඇති තත්ත්වයක් තුළ, හදිසි මහා විපතක් නොසලකා සිකුරාදා සම්මත කරගැනීමට නියමිත අයවැය ඉදිරියට ගෙන යෑම “විහිළුවක්” බව විපක්ෂ නායකවරයා පෙන්වා දුන්නේය.

තවත් දින කිහිපයක් කාලය ගෙන, ලබන සතියේදී හෝ, විපතට පත් ප්‍රදේශ සහ යටිතල පහසුකම් ගොඩනැගීමට යොදාගත හැකි වන පරිදි නව අයවැයක් ඉදිරිපත් කර, ඛේදවාචකයට මුහුණ දුන් ජනතාවට සහන සලසන ලෙස රජයෙන් ඉල්ලා සිටියේය.

ජාත්‍යන්තර ආධාරක සමුළුවක් කැඳවීම වහාම ක්‍රියාත්මක වන පරිදි ජාත්‍යන්තර ආධාරක සමුළුවක් (International Donor Conference) කැඳවිය යුතු බව ඒ මහතා අවධාරණය කළේය.

රජයට එය සිදු කිරීමට හැකියාවක් නොමැති නම්, නිසි බලතල සහිතව එය භාර ගැනීමට විපක්ෂය සූදානම් බවට ඒ මහතා රජයට දන්වා සිටියේය.

IMF කොන්දේසි ඉවත් කිරීමමිනිස් ජීවිත අහිමි වී, මහා ඛේදවාචකයක් සිදුව ඇති මොහොතක, “දරදඬු බරපතල ජනතා පීඩක ජනතා හිංසන IMF කොන්දේසි” සමඟ ඉදිරියට යෑමේ හැකියාවක් නොමැති බව ඒ මහතා විමසා සිටියේය.

වහාම එම කොන්දේසි ඉවත් කරගැනීමට කටයුතු කරන ලෙසත්, රජයට IMF සමඟ සාකච්ඡා කිරීමට නොහැකි නම් විපක්ෂය ද ඊට එකතු කරගන්නා ලෙසත් ඔහු ඉල්ලා සිටියේය.

විපක්ෂය සහයෝගය ලබා දීමට සූදානම් බවත්, අවශ්‍ය නම් සර්ව පාක්ෂික කණ්ඩායමක් ලෙස ගොස් ප්‍රතිචාරක බදු ඉවත් කරගැනීම සඳහා ජනාධිපති ඩොනල්ඩ් ට්‍රම්ප් මහතා හමුවීමට හෝ ලිවීමට සූදානම් බවත් ඔහු ප්‍රකාශ කළේය.

අරමුදල් යෙදවීම සහ සහන වැඩපිළිවෙලIMF කොන්දේසි පිළිබඳ කතා කිරීම “විහිළුවක්” බව සඳහන් කරමින්, දැනට ඉතිරි කරගෙන ඇති අමතර අරමුදල් රට ගොඩනැගීමට යොමු කරන ලෙස ඔහු ඉල්ලා සිටියේය.

බෝවන රෝග ව්‍යාප්තිය සම්බන්ධයෙන් රතු එළියක්.!

බෝවන රෝග ව්‍යාප්තිය සම්බන්ධයෙන් රතු එළියක්.!

මහජන සෞඛ්‍ය පරීක්ෂකවරුන්ගේ සංගමය අනතුරු ඇඟවීමක් සිදුක්‍රමින් පවසන්නේ ආපදා තත්වයෙන් පසුව ඉදිරි සති කිහිපය තුළ බෝවන රෝගවල ඉහළ යාමක් සිදුවිය හැකි බවයි.

ඒ අනුව ජනතාව ඩෙංගු, චිකුන්ගුන්යා සහ මී උණ රෝගය සම්බන්ධයෙන් දැඩි අවධානයක් යොමුකළ යුතු බවද එම සංගමයේ ලේකම් චමිල් මුතුකුඩ කියා සිටියේය.

ආපදාව අස්සේ විමල්ට වරෙන්තු.!

ආපදාව අස්සේ විමල්ට වරෙන්තු.!

නඩුවකට අදාළව අධිකරණයේ පෙනී නෙසිටීම හේතුවෙන් හිටපු පාර්ලිමේන්තු මන්ත්‍රී විමල් වීරවංශ මහතාට වරෙන්තු නිතුත් කර තිබේ.

කොටුව මහෙස්ත්‍රාත් අධිකරණය විසින් මෙලෙස වරෙන්තු නිකුත් කර තිබේ.

ජනාධිපති ලේකම් කාර්යාලයෙන් ජාතික නිදහස් පෙරමුණට ලබා දුන් රජයේ වාහන 40ක් අවභාවිතා කරමින් රජයට රුපියල් මිලියන 09ක පාඩුවක් සිදු කළ බව කියන සිද්ධියට අදළ නඩුව සඳහා හිටපු අමාත්‍යවරයාට මෙලෙස වරෙන්තු නිකුත් කර තිබේ.

බොර දියේ මාළු බාන අයට එරෙහිව හදිසි නීතිය.!

බොර දියේ මාළු බාන අයට එරෙහිව හදිසි නීතිය.!

උසස් පොලිස් නිලධාරීන් සමඟ පැවති රැස්වීමකදී සුනිල් වටගල නියෝජ්‍ය අමාත්‍යවරයා පොලීසියට උපදෙස් ලබාදෙමින් පැවසූවේ සමාජ මාධ්‍යවල ජනාධිපතිවරයාට සහ ආණ්ඩුවේ ඇතැම් මැති ඇමතිවරුන්ට එරෙහිව අපහාසාත්මක ප්‍රචාරයන් සිදුකරන පුද්ගලයින්ට එරෙහිව හදිසි නීතිය ක්‍රියාත්මක කරන ලෙසයි.

“සමාජ මධ්‍ය ගත්තාම ඉතාම නරක විදිහට ජනාධිපතිවරයාටත් ඇතැම් දේශපාලන අධිකාරයේ තෝරාගත් කිහිපදෙනෙක්ටත් පදනම් විරහිත මඩ ප්‍රහාරයන් එල්ලකරමින් යනවා. එතකොට මේක තව වර්ධනය වෙන්න පුළුවන්. මේක දැන් විදෙස්ගතව ඉන්න පුද්ගලයෝ සමාජ මාධ්‍යවල මේක විශේෂයෙන් කරන්නේ.

මේක සාමාන්‍යකරණ වෙන්න පුළුවන් තව දවසක් දෙකක් යනකොට රටේ මහජන ආරක්ෂක පනතේ පස්වන වගන්තිය යටතේ ජනාධිපතිවරයා විසින් සාදන ලද නියෝග, හදිසි අවස්ථා රෙගුලාසි එතකොට මේ හදිසි අවස්ථා රෙගුලාසිවල පැහැදිලිවම මේ තත්ත්වය ආවරණය කරලා තියෙනවා. හෞතිකව, online මගින්,   AI තාක්ෂණය මගින් ඒ ආකාරයේ කිසිදු දෙයකින් මේ ව්‍යසනකාරී තත්ත්වය සම්බන්ධයෙන් අසත්‍ය අදහස්, විකෘති කිරීම්, මේ තත්ත්වය අඩාල කිරීමේ අර්ථයෙන් කිසිදු කෙනෙකුට එහෙම ප්‍රචාර කටයුත්තක් කරන්න බැහැ.

එහෙම කරන කෙනෙකුට අවුරුදු 05කට වැඩි සිරඬුවමක් දෙන්න හැකියාව තියෙනවා. ඊට අමතර වැරදිවලට අවුරුදු 10ක් දක්වා සිරඬුවම් දෙන තැනකට ගෙන්න පුළුවන්.”                 

එහිදී වැඩිදුරටත් අදහස් දැක්වූ නියෝජ්‍ය අමාත්‍ය සුනිල් වටගල මහාතා, පවසා සිටියේ, “අද සමාජ මාධ්‍ය බැලුවහම ජනාධිපතිවරයාට එල්ලකරලා තියෙන ප්‍රහාර ඇත්ත වශයෙන්ම මනුෂ්‍යයෙක් හැටියට මේක ධරාගන්නත් බැහැ.

ඒ තරම් මේ සමාජය විකෘති කිරීමේ අර්ථියෙන්, විකෘත්ති මානසිකත්වයෙන් කටයුතු කරන පිරිසක් ඉන්නවා. අපි ආණ්ඩුවක් ලෙස ඉහළම, හොඳම ආදර්ශය සපයලා තියෙනවා රටේ මහජන ආරක්ෂාව වෙනුවෙන්. එහෙම තියෙන වටපිටාවක් ඇතුළේ තමයි මේ මහජන මතය විකෘති කිරීමේ අරමුණෙන් මේක කරන්නේ. ඒ නිසා අපි කියනවා රටේ නීතියක් තියෙනවා. ඒ නීතියට අනුව කටයුතු කිරීමට සියලුම පුරවැසියන් බැඳිලා ඉන්නවා. එසේ නොකරන පුරවැසියන් සම්බන්ධයෙන් අපට ඉහළම නීතිමය ක්‍රියාමාර්ග ගන්න සිදුවෙනවා” යනුවෙනි.

අඩුම තරමේ ජාතික ශෝක දිනයක් ප්‍රකාශ කරන්න – සජිත් ඉල්ලයි.!

අඩුම තරමේ ජාතික ශෝක දිනයක් ප්‍රකාශ කරන්න – සජිත් ඉල්ලයි.!

විපක්ෂ නායක සජිත් ප්‍රේමදාස මහතා අද (3) පාර්ලිමේන්තුව අමතමින් පැවසූවේ විපතට පත් වූ ජනතාව වෙනුවෙන් අඩුම තරමේ ජාතික ශෝක දිනයක් වත් ප්‍රකාශයට පත් කරන ලෙසයි.

“අද සාකච්ඡා කරන්න තිබුණේ ආපදාව ගැන. නමුත් ඒකට අවස්ථාව නොලැබී අයවැය විවාදය කරන්නට ලැබීම ගැන අප කණගාටු වෙනවා. ආපදාවෙන් විපතට පත් ලක්ෂ ගණන් ජනතාව ගැන මේ තරමින් වත් නොතැකීම ගැන අප කණගාටුවට පත්වෙනවා. මේ වසර හතරක් තුළ අපේ රටට සිදුවූ හතරවෙනි ඛේදවාචකයයි. පාස්කු ප්‍රහාරය, කොරෝනා අර්බුදය,රට බංකොලොත් වීම වගේම සුළි කුණාටුව මේ අර්බුදයි.

විපතට පත්වුණු අය ගැන විවාදයක් ලබාදෙන්න රජය අපොහොසත් වුනා. මේ විපතට පත් වූ අය වෙනුවෙන් අඩුම ගණනේ ජාතික ශෝක දිනයක් වත් ප්‍රකාශයට පත් කරන ලෙස අප ඉල්ලා සිටිනවා.අප සැමගේ වගකීම වන්නේ විපතට පත් වූ අය රැක බලා ගැනීමයි යනුවෙන්ද විපක්ෂ නායකවරයා කීය.

ආපදා මරණ සංඛ්‍යාව තවදුරටත් ඉහළට.!

ආපදා මරණ සංඛ්‍යාව තවදුරටත් ඉහළට.!

දිවයින පුරා පැවති අයහපත් කාලගුණික තත්ත්වය හේතුවෙන් ඇති වූ ආපදා තත්ත්වය පිළිබඳව ආපදා කළමනාකරණ මධ්‍යස්ථානය නිකුත් කළ නවතම වාර්තාව අනුව අද (3) උදෑසන 10.00, ජීවිතක්ෂයට පත් වූ පුද්ගලයින්ගේ සංඛ්‍යාව 474ක් දක්වා ඉහළ ගොස් තිබෙනවා.

එමෙන්ම, අතුරුදහන් වූ පුද්ගලයින් සංඛ්‍යාව 356ක් බවයි එම වාර්තාවේ සඳහන් වන්නේ.

අවතැන්ව සුරක්ෂිත මධ්‍යස්ථානවල රැඳී සිටින පවුල් සංඛ්‍යාව 53,758ක් වන බවත්, අවතැන්ව සුරක්ෂිත මධ්‍යස්ථානවල රැඳී සිටින පුද්ගලයින් සංඛ්‍යාව 201,875ක් බවයි ආපදා කළමනාකරණ මධ්‍යස්ථානය නිකුත් කළ වාර්තාවේ සඳහන්.

ඔවුන් දිවයින පුරා සුරක්ෂිත මධ්‍යස්ථාන 1,385ක රැදී සිටිනවා.

Follow WhatsApp Channel