Foreign news (Sinhala)

ඔත්තු බැලීමේ චන්ද්‍රිකාවක් රැගත් උතුරු කොරියානු රොකට්ටුවක් පසුගිය සඳුදා ගුවන්ගත කළ අතර, ගුවන්ගත වී ටික වේලාවකට පසු එය පුපුරා ගිය බව විදේශ මාධ්‍ය වාර්තා කර ඇත.

එය උතුරු කොරියාවේ දෙවන ඔත්තු චන්ද්‍රිකාව වන අතර එම ව්‍යාතිය හරහා එක්සත් ජනපදය සහ දකුණු කොරියාව වඩාත් හොඳින් නිරීක්ෂණය කිරීමට චන්ද්‍රිකා කිහිපයක් අභ්‍යවකාශ ගත කිරීමට සැලසුම් කර ඇති බව සඳහන්.

කෙසේ වෙතත්, ඔත්තු බැලීමේ චන්ද්‍රිකාව ගුවන් ගතවී සුළු වේලාවකින් විනාශ වීම උතුරු කොරියානු නායක කිම් ජොන් උන්ගේ බලාපොරොත්තු බිඳවැටීමක් ලෙස විදේශ මාධ්‍ය වාර්තා කර ඇත.

වසර හතරකට වැඩි කාලයකට පසු පළමු ත්‍රෛපාර්ශ්වික රැස්වීම සඳහා දකුණු කොරියාව, චීනය සහ ජපානය යන රටවල නායකයින් සෝල් නුවරදී හමුවී පැය කිහිපයකට පසුව මෙම අසාර්ථක ගුවන්ගත කිරීම සිදුව ඇති බව පැවසේ.

උතුරු කොරියානු අභ්‍යවකාශ මධ්‍යස්ථානයට අනුව චන්ද්‍රිකාව රැගත් රොකට්ටුව පියාසර කිරීමේදී එන්ජිමේ හටගත් දෝෂයක් නිසා ගුවන්ගත වී සුළු වේලාවකින් පුපුරා ගිය බව උතුරු කොරියානු රාජ්‍ය මාධ්‍ය වාර්තා කර ඇත.

ඉතාලිය රජය විසින් මංගල උත්සවවලදී නිරුවත් වීමේ අයිතිය නීත්‍යානුකූල කර ඇති බව වාර්තා වේ.

ඉතාලියේ සොඩීනියාවේ නිරිතදිග වෙරළ තීරයේ නම් කරන ලද ප්‍රදේශයක නිරුවත් විවාහ සඳහා මෙසේ අවසර හිමිවී ඇත.

සැතපුම් හතරක් දිග වෙරළ තීරය වසර ගණනාවක් තිස්සේ ජනප්‍රිය නිරුවත් ස්ථානයක් බව සැන් වෙරෝ මිල්ස් නගරාධිපති ලුයිගි ටෙඩෙස්චි විදෙස් මාධ්‍ය වෙත පැවසීය.

එම අවසරය තුලින් නිරුවතින් විවාහ වීමට ලොව ප්‍රිය කරනා ලොව නන් දෙසින් පැමිණෙන සංචාරකයින්ගේ ආකර්ෂණීය ස්ථානයක් ලෙස වෙරළ තීරය යොදා ගැනීමට ඉතාලි රජය බලාපොරොත්තු වන බව නගරාධිපතිවරයා මාධ්‍ය වෙත අදහස් දක්වමින් වැඩිදුරටත් පැවසීය.

පැපුවා නිව්ගිනියාවේ සිදුවූ දැවැන්ත නායායෑමෙන් පුද්ගලයන් 670 දෙනෙකු මිය ගොස් ඇති බවට එක්සත් ජාතීන්ගේ සංවිධානය අනුමාන කර ඇති බව සඳහන්.

පසුගියදා මෙම නායායෑම සිදුවීමෙන් අනතුරුව එරට රජය නිවේදනය කළේ ඉන් මරණ 300ක් පමණ සිදුව ඇති බවට වූවත් මේ වනවිට අනාවරණය වී ඇති දත්තයන්ට අනුව මියගිය පිරිස 670ක් පමණ වෙතැයි පැවසේ.

පසුගිය සිකුරාදා සිදුවූ එම මහා ඛේදජනක සිදුවීමෙන් විශාල පිරිසක් සහ නිවාස දේපොල රැසක් පස් වලින් යටව ගොස් ඇති අතර විදෙස් වාර්තා වැඩිදුරටත් සඳහන් කළේ නිවාස 150කට අධික ප්‍රමාණයක් සම්පූර්ණයෙන්ම පස් තට්ටුවකින් යටවී ඇති බවයි.

එම ස්ථානයේ තවදුරටත් විශේෂ සහන මෙහෙයුම් ක්‍රියාත්මක බව විදෙස් මාධ්‍ය වාර්තා කර ඇත.

කෙසේ වෙතත්, අදාළ ස්ථානය විමර්ශනය කිරීමට ගොස් ඇති එක්සත් ජාතීන්ගේ නියෝජිත කණ්ඩායමක් පවසා ඇත්තේ පුද්ගලයන් 670 දෙනෙකු පමණ මියගොස් ඇති බවට මේ වනවිට ගණන් බලා ඇති බවයි.

ඉන්දියාවේ නවදිල්ලි අගනුවර ළමා රෝහලක ඊයේ ඇති වූ ගින්නකින් අවම වශයෙන් අලුත උපන් බිළිඳුන් හය දෙනෙකු මිය ගොස් ඇති බව ඉන්දීය බලධාරීහු පවසති.

අලුත උපන් බිළිඳුන් දොළොස් දෙනෙකු ගින්න අතරතුර මුදාගෙන ඇති නමුත් ගින්නෙන් බිලිඳුන් හය දෙනෙකු මිය ගිය බව දිල්ලි ගිනි නිවීමේ සේවා ප්‍රධානී අතුල් ගාර්ග් මාධ්‍ය වෙත පැවසීය.

බේරාගත් එක් බිළිඳෙකුගේ තත්ත්වය බරපතල වන අතර අනෙක් පස් දෙනා වෛද්‍ය ප්‍රතිකාර ලබමින් සිටින බව වාර්තා වේ. බේරාගත් ළදරුවන් හඳුනාගෙන නොමැති අතර ඔවුන්ගේ උප්පැන්න වාර්තා ගින්නෙන් විනාශ වී ඇති බව පැවසේ.

දිල්ලි ගිනි නිවන සේවා පැවසුවේ ඊයේ රාත්‍රී 11:32 ට ලැබුනු ඇමතුමක් අනුව ගිනි නිවන රථ 9ක් එම ස්ථානයට කඩිනමින් පිටත්කල බවයි.

තවදුරටත් ගලවා ගැනීමේ මෙහෙයුම් ක්‍රියාත්මක වෙමින් පවතින බවත්, ගින්න ඒ අසල තවත් ගොඩනැගිල්ලකට පැතිර ඇති බවත් මේ වනවිට එය පාලනය කර ඇති බවත් පැවසේ.

ගින්නට නිශ්චිත හේතුව මෙතෙක් අනාවරණය වී නොමැති බවත් ගාර්ග් මහතා පැවසීය.

මෙවැනිම 2021වසරේ බටහිර ඉන්දියාවේ මහාරාෂ්ට ප්‍රාන්තයේ රෝහලක ඇතිවූ ගින්නකින් අලුත උපන් බිළිඳුන් 10 දෙනෙකු මිය ගොස් ඇති බව සඳහන්.