Local news (Sinhala)

එළඹෙන මහ මැතිවරණයේදී ශ්‍රී ලංකා පොදුජන පෙරමුණ පක්ෂයේ ප්‍රතිපත්ති ඉදිරියට ගෙනයාමට පමණක් නව සන්ධාන බිහිකරන බව ශ්‍රී ලංකා පොදුජන පෙරමුණ සදහන් කරයි.

එළඹෙන මහ මැතිවරණයට පොහොට්ටුව ලකුණින් ඉදිරිපත් වීමට බලාපොරොත්තු වන බවත් අවශ්‍ය වුවහොත් ජයග්‍රහණය වෙනුවෙන් ලකුණේ වෙනසක් කළ හැකි බවද ශ්‍රී ලංකා පොදුජන පෙරමුණ මහලේකම් නීතිඥ සාගර කාරියවසම් සදහන් කරයි.

පරණ කණ්ඩායම සහ අලුත් පිරිසක් ශ්‍රී ලංකා පොදුජන පෙරමුණ සමග සිටින බවත් මහ මැතිවරණ අපේක්ෂකයින් කැපවී වැඩ කළහොත් ඉදිරියේදී කිසිදු ප්‍රශ්නයක් නොවන බවත් ඔවුන් මහන්සි විය යුතු බවද හිටපු ජනාධිපති මහින්ද රාජපක්ෂ සදහන් කරයි.

මහ මැතිවරණයට ශ්‍රී ලංකා පොදුජන පෙරමුණ පක්ෂයෙන් තරග කරන අපේක්ෂකයින් සඳහා වන සම්මුඛ පරීක්ෂණ බත්තරමුල්ල නෙළුම් මාවතේ පිහිටි එම පක්ෂ කාර්යාලයේදී ඊයේ (05) දින පැවැත් වුණි.

හිටපු ජනාධිපති රනිල් වික්‍රමසිංහ එළඹෙන මහ මැතිවරණයේදී එක්සත් ජාතික පක්ෂය ප්‍රමුඛ නව සන්ධානයේ නායකයා ලෙස කටයුතු කරනු ඇති බව හිටපු පාර්ලිමේන්තු මන්ත්‍රී සමන් රත්නප්‍රිය සදහන් කරයි.

විපක්ෂයේ සිටින දේශපාලන පක්ෂ එක්වී නව සන්ධානයක් බිහිකර ගැනීමේ අරමුණින් විවිධ සාකච්ඡා පවත්වමින් ඇති අතර මහ මැතිවරණය සදහා එක්සත් ජාතික පක්ෂය මේ වනවිට ගෑස් සිලින්ඩරය ලකුණින් තරග කිරීමට තීරණය කර ඇත.

මේ අතර විපක්ෂ නායක සජිත් ප්‍රේමදාස ඉදිරිපත් කළ කොන්දේසි හේතුවෙන් සමගි ජන බලවේගය සහ එක්සත් ජාතික පක්ෂය එක්වී තරග කිරීමට සිදුකළ සාකච්ඡා සියල්ල මේ වනවිට බිඳවැටී ඇත.

හිටපු ජනාධිපති මහින්ද රාජපක්ෂගේ වීරකැටිය කාල්ටන් වත්තට විදුලිය සපයා තිබූ තෙකලා විදුලි රැහැන් කිහිපයක් අද (05) දින දහවල් විදුලි බල මණ්ඩලයේ සේවකයින් විසින් ඉවත් කර ඇත.

මන්ත්‍රී ප්‍රතිපාදන යටතේ ලබාදී තිබූ පහසුකම් ඉවත් කිරීමට නව ආණ්ඩුව ගත් තීරණය යටතේ වීරකැටිය කාල්ටන් වත්තට විදුලිය සපයා තිබූ විදුලි රැහැන් දෙකක් ඉවත් කිරීමට කටයුතු කර ඇත.

හිටපු ජනාධිපතිවරයාගේ කාල්ටන් වත්තට තෙකලා විදුලි රැහැන් 03ක් ඇද තිබූ අතර ඉන් දෙකක් ඉවත් කිරීමට විදුලි බල මණ්ඩලයේ සේවකයින් කටයුතු කර ඇත.

රජයේ සංස්ථා මණ්ඩල රැසක සභාපතිවරුන් සහ අධ්‍යක්ෂවරුන් පිරිසක් ඉවත්ව ‌ගොස් ඇතත් තවත් සමහර ආයතනවල සභාපතිවරුන් සහ අධ්‍යක්ෂවරුන් රැඳී සිටින බව වාර්තා වේ.

ඒ අනුව සංස්ථා මණ්ඩලවල සභාපතිවරුන් සහ අධ්‍යක්ෂවරුන්ට එම තනතුරුවලින් වහාම ඉවත් වන ‌ලෙසට රජය දැනුම්දී ඇති බව වාර්තා වේ.

තවද අමාත්‍යංශ යටතේ පවතින ආයතනවල අධ්‍යක්ෂ මණ්ඩල රැස්වීම් තාවකාලිකව අත්හිටුවන ‌ලෙසට අග්‍රාමාත්‍ය ලේකම් ප්‍රදීප් සපුතන්ත්‍රි විසින් එම අමාත්‍යාංශ ලේකම්වරුන්ට දැනුම් දී ඇත.