මහ බැංකුව දැඩි තීරණයක් ගනී. ප්රසිද්ධ සමාගම් හයක වත්කම් අත්හිටුවයි
මෙරට ලියාපදිංචි සමාගම් හයක වත්කම් අත්හිටවූ බව ශ්රී ලංකා මහා බැංකුව නිවේදනය කරයි.
2011 අංක 42 දරන මුදල් ව්යාපාර පනතේ 44 වැනි වගන්තිය යටතේ මහ බැංකුවේ බැංකු නොවන මූල්ය ආයතන අධීක්ෂණ දෙපාර්තමේන්තුවේ අධ්යක්ෂවරයා විසින් මෙම නියෝග නිකුත් කර ඇත.
2011 අංක 42 දරන මුදල් ව්යාපාර පනතේ විධිවිධාන යටතේ මෙරට ක්රියාත්මක ආයතන හයක සහ ඒවායේ අධ්යක්ෂවරුන් සතු සියලු දේපළ හා වත්කම් පැවරීම, විකිණීම හෝ වෙනත් ආකාරයකින් ගනුදෙනු කිරීම වළක්වමින් වත්කම් අත්හිටුවීමේ (Freezing Orders) නියෝග නිකුත් කර ඇති බව ශ්රී ලංකා මහ බැංකුව සඳහන් කරයි.
මහ බැංකුවේ අත්හිටුවීමේ නියෝග කොළඹ මහාධිකරණය විසින් තහවුරු කර දීර්ඝ කර ඇත.
වත්කම් අත්හිටුවීමේ නියෝග ක්රියාත්මක සමාගම් වන්නේ,
1.කසාගල ග්රීන් ප්ලාන්ටේෂන් පුද්ගලික සමාගම,
2.සිලෝන් ග්රීන් ලයිෆ් ප්ලාන්ටේෂන් පුද්ගලික සමාගම,
3.සිංහ කැපිටල් ඉන්වෙස්මන්ට් ලිමිටඩ්
4.ප්රෝ ෂොප් ඇඩ්වර්ටයිසින් හෝල්ඩින්ග්ස් පුද්ගලික සමාගම,
5.ඇතෙන්ස් ඉන්ටර්නැෂනල් එඩියුකේෂන් සෙන්ටර් පුද්ගලික සමාගම,
6.එයොන් ලංකා ඉන්වෙස්මන්ට් ඇන්ඩ් ෆිල්ම් ප්රඩක්ෂන් ඉන්ටර්නැෂනල් පුද්ගලික සමාගම,
මෙහි මුල් සමාගම් දෙක සම්බන්ධයෙන් මුදල් ව්යාපාර පනතේ 42 වන වගන්තිය යටතේ මේ වන විට විමර්ශන ක්රියාත්මක වන අතර සෙසු සමාගම් 4 මුදල් ව්යාපාර පනත උල්ලංඝනය කරමින් නීතිවිරෝධී ලෙස මහජන තැන්පතු භාරගැනීම සහ මූල්ය ව්යාපාර පවත්වාගෙන ගොස් ඇති බවට මහ බැංකුව විසින් දැනටමත් තහවුරු කරගෙන ඇත.
තමන් මහන්සියෙන් උපයාගත් මුදල් තැන්පත් කළ යුත්තේ නීත්යනුකූලව බලයලත් මූල්ය ආයතනවල පමණක් බවත් අනවසර ආයතනවල මුදල් තැන්පත් කිරීමෙන් එම මුදල් සම්පූර්ණයෙන්ම අහිමිවීමේ බරපතළ අවදානමක් පවතින බවත් මහ බැංකුව මහජනතාවට දැඩි ලෙස අවධාරණය කරයි.
1988 අංක 30 දරන බැංකු පනත හෝ මුදල් ව්යාපාර පනත යටතේ මහ බැංකුවේ නිසි බලපත්රයක් හිමි ආයතන වලට පමණක් මහජනයාගෙන් තැන්පතු භාරගැනීමට නීතිමය අවසරය හිමිවන බව මහ බැංකුව සඳහන් කරයි.