මෙරට වාණිජ ණය ප්රතිව්යුහගතකරණය යටතේ ඩොලර් බිලියන 12ක ණය ප්‍රමාණයක් ප්රතිව්යුහගතකරණය කිරීමට ඇති අතර ඊට අදාළව ශ්‍රී ලංකා රජය හා පෞද්ගලික ණය හිමියන් අතර යෝජනාද මීට පෙර සාකච්ඡා විය. පසුගිය මාසයේදී එම ණය ප්‍රතිව්‍යුහගතකරණ සම්බන්ධයෙන් වන ශ්‍රී ලංකා රජයේ යෝජනා එම එම ණය හිමියන් කමිටුව වෙත ඉදිරිපත් කර තිබිණි.
පසුගිය විසි වැනිදා ජනාධිපති මාධ්‍ය අංශය නිකුත්කොට තිබූ නිවේදනයක දැක්වෙන්නේ, මහ බැංකු අධිපති ආචාර්ය නන්දලාල් වීරසිංහ සහ මුදල් අමාත්‍යාංශයේ ලේකම් මහින්ද සිරිවර්ධන යන නිලධාරීන් ඉදිරි සතිය තුළ යුරෝපයේදී පෞද්ගලික ණය හිමියන් නියෝජනය කරන කමිටුව මුණ ගැසී ඒ සම්බන්ධව සාකච්ඡා කිරීමට නියමිත බවයි.
කෙසේවෙතත් ජාත්‍යන්තර පෞද්ගලික ණය ප්‍රතිව්‍යුහගතකරණයට අදාළව මෙතෙක් කිසිදු මූලික එකඟතාවයකට හෝ පැමිණීමට අපොහොසත් වී ඇති අතර එය මෙරට හමුවේ පවතින ප්‍රධාන අභියෝගයකි. මේ සම්බන්ධයෙන් අදහස් දක්වමින් ආර්ථික විශේෂඥයෙකු පැවසුවේ පෞද්ගලික ණය හිමියන්ගේ ණය කඩිනමින් ප්රතිව්යුහගතකරණය කිරීම ඉතා වැදගත් බවත් අවම වශයෙන් එම ණය වලින් 30% කප්පාදුවක් ලබා ගැනීමට ශ්‍රී ලංකා රජය කටයුතු කළ යුතු බවත්ය.
මේ වසරේ ජූනි වන විට ණය ප්‍රතිව්‍යුහගතකරණයට අදාළ අවසන් ගිවිසුමට එළඹීමට ශ්‍රී ලංකාව අපේක්ෂා කරන බව ජනාධිපතිවරයා මීට පෙර පවසා තිබූ අතර ඒ අනුව ද්විපාර්ශීය ණය (චීනය ඉන්දියාව ජපානය සහ පැරිස් සමාජය නියෝජනය කරන රටවලින්) ප්‍රතිව්‍යුහගතකරණයට අදාළ සාකච්ඡා අවසන් අදියරට එලඹ ඇති බව වාර්තා වේ.
