By unusuma.lk on (LK time)
අපරාධ පරීක්ෂණ දෙපාර්තමේන්තුවේ විශේෂ විමර්ශන ඒකකය විසින් පාර්ලිමේන්තු මන්ත්‍රී නාමල් රාජපක්ෂ නීතිඥභාවය ලබාගැනීම සම්බන්ධව අධිකරණයට ඉදිරිපත් කළ කරුණු සලකා බැලීමෙන් පසුව ඊයේ (03) දින කොළඹ ප්‍රධාන මහෙස්ත්‍රාත් තනූජා ලක්මාලි නියෝගයක් නිකුත් කළාය.
ඒ අනුව නාමල් රාජපක්ෂ මන්ත්‍රීවරයා සිය නීතිඥ භාවය වංචනිකව ලබාගෙන තිබේදැයි විමර්ශනය කර අධිකරණයට කරුණු වාර්තා කරන්නැයි කොළඹ ප්‍රධාන මහෙස්ත්‍රාත්වරිය අපරාධ පරීක්ෂණ දෙපාර්තමේන්තුවට නියෝග කළාය.
නීතිඥ භාවය ලබාගැනීමට අදාළ ශ්‍රී ලංකා නීති විද්‍යාලයේ විභාගයට මුහුණ දීමේ දී නාමල් රාජපක්ෂ වංචාවක් කර ඇද්ද යන්න පිළිබඳව තවදුරටත් විමර්ශන කරන බවත් නීති විද්‍යාලයේ ලේඛන පරීක්ෂා කරමින් ඒ විමර්ශනය දියත් කර ඇති බවද අපරාධ පරීක්ෂණ දෙපාර්තමේන්තුව අධිකරණයට සදහන් කරයි.
අල්ලස් හෝ දූෂණය, නාස්තිය පිටුදැකීමේ පුරවැසි බලය සංවිධානයේ සභාපති ජාමුනි කමන්ත තුෂාර විසින් කළ පැමිණිල්ලක් මත මෙම විමර්ශනය ආරම්භ කර ඇත.
