By unusuma.lk on (LK time)
- ඉන්දියානු සාගරයේ උපායමාර්ගීක පිහිටීම නිසා ශ්‍රී ලංකාව කලාපිය සමුද්‍රීය ආරක්ෂාව සම්බන්ධයෙන් තීරණාත්මක කාර්යභාරයක් ඉටු කරයි. ජාතික ආරක්ෂාව සහ සමුද්‍රීය කලාපීය දැනුවත් භාවය තුල සමුද්‍රීය ආරක්ෂක උපාය මාර්ගය වැදගත්ම අංගය ලෙස සැලකේ.
මෙම තීරණාත්මක කරුණු ඉස්මතු කරමින්, නියෝජ්‍ය ආරක්ෂක අමාත්‍ය මේජර් ජෙනරල් අරුණ ජයසේකර (විශ්‍රාමික), ඊයේ (02) කොළඹ වරායේ නැංගුරම් ලා තිබෙන ජපාන සමුද්‍රීය ස්වයං ආරක්ෂක බලකායේ (JMSDF) Mine Sweeper Tender JS Bungo නෞකාවේ සිදුකල සංචාරයේදී සමුද්‍රීය ආරක්ෂාව සඳහා ශ්‍රී ලංකාවේ කැපවීම අවධාරණය කළේය.
2025 වාර්ෂික ඉන්දු – පැසිෆික් සහ මැද පෙරදිග මුර සංචාරයන්ට සමගාමීව ජපාන සමුද්‍රීය ස්වයං ආරක්ෂක බලකායේ නෞකා දෙකක් වන JS Bungo සහ JS Etajima පැමිණීම සනිටුහන් කරමින් මෙම උත්සවය සංවිධානය කරන ලදී.
නියෝජ්‍ය අමාත්‍යවරයා සිය කතාවේදී, විවිධ ක්ෂේත්‍ර හරහා ශ්‍රී ලංකාවට දිගුකාලීන සහ ස්ථිරසාර හවුල්කරුවෙකු ලෙස ජපානයේ කාර්යභාරය අවධාරණය කරමින් මූල්‍ය ආධාර සැපයීම, තාක්ෂණික සහයෝගීතාව, සංවර්ධන ව්‍යාපෘති ක්‍රියාත්මක කිරීම, මානුෂීය ආධාර සැපයීම, ධාරිතා ගොඩනැගීමේ මුලපිරීම්, සාම සාධක දායකත්වයන්, ආරක්ෂක සහයෝගීතාව, සමුද්‍රිය ආරක්ෂාව වැඩිදියුණු කිරීම් සහ දැනුම බෙදාගැනීම වැනි දෑ තුලින් ජපානය අපට සැලකිය යුතු සහයෝගයක් ලබාදී ඇති බව ප්‍රකාශ කළේය.
රැස්ව සිටි පිරිස අමතමින්, ශ්‍රී ලංකාවේ ජපන් තානාපති අතිගරු Akio Isomata මැතිතුමා, දෙරට අතර ගැඹුරින් මුල් බැසගත් ද්වීපාර්ශ්වික සබඳතා ඉස්මතු කල අතර ඉන්දියානු සාගරයේ මැද කේන්ද්‍රස්ථානයක් ලෙස කලාපීය ස්ථාවරත්වය සඳහා ශ්‍රී ලංකාවේ කැපවීම අවධාරණය කළේය.
මෙම උත්සවයට, ‘Kagami Biraki’ හෙවත් සාම්ප්‍රදායික සකේ බැරල් විවෘත කිරීමේ අවස්ථාවක් සහ සමුරායිවරුන්ගේ සම්භාව්‍ය කඩු හරඹයන්ගේ අභාෂයෙන් පෝෂණය වූ නවීන ජපන් සටන් කලාවක් වන ‘Kendo’ කඩු හරඹ නිරූපණයක් ඇතුළත් විය.
