By unusuma.lk on (LK time)
දැන් බලයේ ඉන්න අපි අපරාධ කරන්නේ නැති බවත් කවුරු හරි අපරාධයක් කරනවා නම් ඒ අයට අපෙන් ගැලවීමක් නැති බව ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා සදහන් කරයි.
ශ්‍රී ලංකා ඉතිහාසයේ පළමු වතාවට පොලිස්පතිවරයා බන්ධනාගාරගත කර සිටින බවත් වැරදි කරන කිසිවකුට ගැලවෙන්න බැරි ආණ්ඩුවක් ජනතාව දැන් හදලා තිබෙන බවද ප්‍රධාන ලේකම් ටිල්වින් සිල්වා සදහන් කරයි.
ප්‍රධාන ලේකම් ටිල්වින් සිල්වා සදහන් කළේ,
“ලංකා ඉතිහාසයේ පළමු වතාවට පොලිස්පතිවරයා හිරේ ඉන්නේ. මේ ආණ්ඩුව ඇරෙන්න මීට කලින් තිබුණු කිසිම ආණ්ඩුවක් පොලිස්පතිවරයාට විරුද්ධව නඩු දමාවි කියා හිතන්නවත් පුළුවන්ද.? මීට පෙර දේශපාලන බලය උපයෝගි කරගෙන කරන ලද අපරාධ වලට දැන් යුක්තිය ඉටුවෙමින් තිබෙනවා.
තාජුඩීන්ගේ ඝාතනය, ලසන්ත වික්‍රමතුංග ඝාතනය පිළිබඳව සැකකරුවන් තවමත් සොයා ගැනීමට නොහැකි වී ඇත්තේ එදා එම අපරාධ සිදු වූයේ දේශපාලන බලය උපයෝගි කරගෙන වීම නිසයි. පසුගිය වසර 76 තුළ මේ රටේ නීතිය ක්‍රියාත්මක වූයේ බලවතුන්ට නොවෙයි.
ඔවුන් දේශපාලන බලයෙන් සෑම අපරාධයක්ම වසන් කළා. දැන් එහෙම සිදු වන්නේ නෑ. කවුරු වැරදි කළත් ඉන් කිසිවකුට ගැලවීමක් නැති ආණ්ඩුවක් දැන් බිහි වී තිබෙනවා. පහුගිය කාලේ සමහරු අපෙන් ඇහුවා කෝ හොරු ඇල්ලුවද කියලා. හොරු ඇල්ලීම දේශපාලන පක්ෂයක වැඩක් නොවෙයි.
ඒ සඳහා මේ රටේ පොලිසිය හා නීතිපති දෙපාර්තමේන්තුව, අල්ලස් හෝ දූෂණ කොමිෂන් සභාව ආදී ආයතන තිබෙනවා. අපරාධකරුවන්ට දඬුවම් දෙන්න අපිට අයිතියක් නෑ. ඒ නීතිය ක්‍රියාත්මක කරන්න මේ රටේ අධිකරණ පද්ධතියක් තිබෙනවා. දැන් අපරාධකරුවන්ට නඩු වැටෙනවා. නීතිය ක්‍රියාත්මක වෙනවා.”
පළාත් පාලන මැතිවරණ ප්‍රචාරක රැලියක් අමතමින් ප්‍රධාන ලේකම් ටිල්වින් සිල්වා මේ බව සදහන් කරයි.
