ලොව විශාලතම නිදහස් වෙළෙඳ ගිවිසුම වන RCEP (Regional Comprehensive Economic Partnership) සංවිධානයේ සාමාජිකත්වය ලබා ගැනීම සඳහා වන රාජ්යතාන්ත්රික පියවර සාර්ථකව තබා ඇති බව විදේශ කටයුතු අමාත්ය විජිත හේරත් සඳහන් කරයි.
සිය ඔස්ට්රේලියානු සහ නවසීලන්ත නිල සංචාරය අවසන් කරමින් කැන්බරා නුවර පිහිටි ශ්රී ලංකා මහ කොමසාරිස් කාර්යාලයේ සිට විදේශ කටයුතු අමාත්ය විජිත හේරත් මේ බව සඳහන් කරයි.
මෙම සංචාරය අතරතුර සුවිශේෂී ප්රගතියක් අත්කර ගනිමින්, RCEP සංවිධානයේ ප්රධාන සාමාජිකයන් දෙපළක් වන ඔස්ට්රේලියාව සහ නවසීලන්තය, ශ්රී ලංකාවට එහි සාමාජිකත්වය ලබා ගැනීම සඳහා පූර්ණ සහයෝගය ලබා දීමට එකඟතාව පළ කර ඇති බවද අමාත්යවරයා සඳහන් කරයි.
ගෝලීය ජනගහනය මෙන්ම ආර්ථික නිපැයුම් අතින් ලොව විශාලතම නිදහස් වෙළෙඳ ගිවිසුම ලෙස සැලකෙන RCEP ආසියානු පැසිපික් කලාපයේ ආර්ථික සහයෝගීතාවය ඉහළ නැංවීම සඳහා රටවල් 15ක සහභාගීත්වයෙන් පිහිටුවා ඇත.
බෲනායි, කාම්බෝජය, ඉන්දුනීසියාව, ලාඕසය, මලයාසියාව, මියන්මාරය, පිලිපීනය, සිංගප්පූරුව, තායිලන්තය සහ වියට්නාමය යන ආසියාන් (ASEAN) කලාපීය සාමාජික රටවල් 10 සහ ඔස්ට්රේලියාව, නවසීලන්තය, ජපානය, චීනය සහ දකුණු කොරියාව යන සෙසු ප්රධාන ආර්ථික බලවතුන් ද ඇතුළත් වේ.