Attention

හිටපු ජනාධිපති රනිල් වික්‍රමසිංහට සහ හිටපු ජනාධිපති ලේකම් සමන් ඒකනායකට එරෙහිව පොදු දේපොළ පනත යටතේ ගොනුකර ඇති නඩුව අද (11) දින කොළඹ කොටුව මහේස්ත්‍රාත් අධිකරණයේදී කැඳවනු ලැබුවේය.

නඩුව කැඳවු අවස්තාවේදි හිටපු ජනාධිපති රනිල් වික්‍රමසිංහ අධිකරණය හමුවේ පෙනී සිටියේය.

එහිදී හිටපු ජනාධිපති රනිල් වික්‍රමසිංහ එරෙහිව අපරාධ පරීක්ෂණ දෙපාර්තමේන්තුව විසින් ඉදිරිපත් කර ඇති නඩුකරය දෙසැම්බර් මස (09) වැනිදා යළිත් කැඳවන ලෙස කොළඹ කොටුව මහෙස්ත්‍රාත් අධිකරණය නියම කළේය.

2023 වසරේදී රනිල් වික්‍රමසිංහ සිය බිරිඳගේ උපාධි ප්‍රදානෝත්සවයට සහභාගී වීම සඳහා එක්සත් රාජධානියට ගිය අවස්ථාවට අදාළව රුපියල් මිලියන 16.6කට අධික රජයේ මුදල් අවභාවිතා කිරීම සම්බන්ධයෙන් අපරාධ පරීක්ෂණ දෙපාර්තමේන්තුව මෙම නඩුව ගොනුකර ඇත.

අදාළ සිද්ධිය සම්බන්ධයෙන් සිදුකළ විමර්ශන අවසන් කර ඊට අදාළ විමර්ශන ගොනු සහ ලේඛන නීතිපතිවරයා වෙත යොමුකර ඇති බව අපරාධ පරීක්ෂණ දෙපාර්තමේන්තුව මීට පෙර අධිකරණය හමුවේ සඳහන් කළේය.

මේ දිනවල දිවයිනට බලපා ඇති අධික වර්ෂා තත්ත්වය හේතුවෙන් ගංවතුර, නායයෑම් සහ අනෙකුත් ස්වාභාවික ආපදා තත්ත්වයන් හමුවේ දැඩි අවධානයෙන් පසුවන ලෙස ජාතික ගොඩනැගිලි පර්යේෂණ ආයතනය ජනතාවට දැනුම්දීමක් කරයි.

මෙම හදිසි තත්ත්වයන් හේතුවෙන් සිදුවිය හැකි ජීවිත හානි සහ දේපළ හානි අවම කර ගැනීම සඳහා නිල අනතුරු ඇඟවීම් නිරන්තරයෙන් සැලකිල්ලට ගනිමින්, හදිසි අවස්ථාවකට සූදානම් වන ලෙසද ජනතාවට දැනුම් දෙයි.

ඒ අනුව පහත සඳහන් ආරක්ෂක පියවරයන් අනුගමනය කරන්න,

පවුලේ සාමාජිකයන් හා අසල්වැසියන් දැනුවත් කිරීම – (පවුලේ සියලුම දෙනා සහ අසල්වැසි ප්‍රජාව ආරක්ෂක ක්‍රියාමාර්ග පිළිබඳව දැනුවත් කිරීම.)

හදිසි අවස්ථා බෑගයක් සූදානම් කර තබා ගැනීම – (හදිසි අවස්ථාවකදී අවශ්‍ය වන ඖෂධ, වැදගත් ලියකියවිලි, වියළි ආහාර සහ ප්‍රථමාධාර ඇතුළත් හදිසි බෑගයක් ළඟ තබා ගැනීම.)

කාලගුණික අනතුරු ඇඟවීම් නිරන්තරයෙන් අනුගමනය කිරීම – (කාලගුණ විද්‍යා දෙපාර්තමේන්තුව සහ ආපදා කළමනාකරණ මධ්‍යස්ථානය නිකුත් කරන නිවේදන පිළිබඳව නිරන්තර අවධානයෙන් සිටීම.)

නායයෑම් පූර්ව ලක්ෂණ පිළිබඳ සැලකිලිමත් වීම – (පොළොව පැලීම්, ජල මට්ටම්වල හදිසි වෙනස්වීම්, ගස් කඩා වැටීම් හෝ මඩ දිය කාන්දු වීම වැනි නායයෑම් පූර්ව ලක්ෂණ ගැන විමසිලිමත් වීම.)

වහාම ආරක්ෂිත ස්ථාන වෙත යාම – (යම් අවදානම් තත්ත්වයක් උද්ගත වුවහොත්, කිසිදු පැකිලීමකින් තොරව වහාම ආරක්ෂිත ස්ථානයක් වෙත ඉවත් වීම.)

අඳුර දුරලමින් ආලෝකය උදා කරන හින්දු ජනයාගේ උතුම් ආගමික උත්සවයක් වන දීපාවලි උත්සවය නිමිත්තෙන් මාගේ ශුභාශිංසන එක් කරන්නේ ඉමහත් සතුටිනි.

ක්‍රිෂ්ණා දෙවියන් නරගාසුරන් නමැති අසුරයා පරාජය කිරීම සිහිපත් කරමින්, අධර්මය පරදා ධර්මය ජය ගත් අයුරින් සියල්ලන්ගේ සිත්සතන්හි අඳුර දුරලා ආලෝකය පැතිරේවායි යන ප්‍රාර්ථනය පෙරදැරිව ලොව පුරා හින්දු බැතිමත්හු මෙදින ආගමික වතාවත්හි නිරත වෙති.

දීපාවලි සැමරුමේ සැබෑ අරුත වන්නේ හුදෙක් නිවෙස් පහන් ආලෝකයෙන් ඒකාලෝක කිරීමෙන් ඔබ්බට ගොස්, මිනිස් හදවත් තුළ ආදරය, කරුණාව, සහෝදරත්වය සහ මානවීය ගුණධර්මවල ආලෝකය දල්වාලීමයි.

එහෙයින්, වෛරය වෙනුවට මෛත්‍රියත්, බෙදීම වෙනුවට සහජීවනයත්, අයුක්තිය වෙනුවට යුක්තියත් තෝරා ගනිමින්, වඩාත් යහපත්, සාධාරණ සහ සහකම්පනයෙන් පිරි සමාජයක් ගොඩනැඟීම සඳහා වන අපගේ අදිටන අලුත් කර ගැනීමට දීපාවලි උත්සවය අගනා අවස්ථාවක් සලසා දෙයි.

සමාජීය, ආර්ථික සහ දේශපාලන යන සියලු ක්ෂේත්‍ර තුළ යහපත් පරිවර්තනයක් ඇති කරමින්, සියලු ආගමික සහ සංස්කෘතික අනන්‍යතාවන්ට ගරු කරන, සියලු දෙනාට සමානාත්මතාවෙන් සහ ගෞරවයෙන් සලකන රටක් ගොඩනැඟීමේ මහඟු වගකීම වෙනුවෙන් අප මේ වනවිට තිර අදිටනින් යුතුව කැපවී සිටිමු.

ආර්ථික සහ සමාජයීය වශයෙන් යළි ශක්තිමත් වෙමින්, ලෝකය හමුවේ ගෞරවාන්විතව නැඟී සිටින “සාමයේ සහ මනුෂ්‍යත්වයේ දිවයින” ලෙස ශ්‍රී ලංකාව ගොඩනැඟීම සඳහා අප එක්ව යන එම මාවත, මෙම දීපාවලියේ දැල්වෙන පහන් සිලෙන් තව තවත් ඒකාලෝක වේවායි ප්‍රාර්ථනා කරමි.

ශ්‍රී ලංකාවාසී මෙන්ම ලෝකවාසී සියලුම හින්දු බැතිමතුන්ට සාමය, සතුට, සෞභාග්‍යය පිරි සුබ දීපාවලි උත්සවයක් වේවායි හෘදයාංගම සුබපැතුම් එක් කරමි.

හිටපු රාජ්‍ය බුද්ධි ප්‍රධානී සුරේෂ් සලේගේ සැලසුම් සහගත මෙහෙයුමක් මත සහ තවත් තිදෙනකුගේ වක්‍රාකාර දැනුවත්භාවය සහිතව මරාගෙන මැරෙන පාස්කු ත්‍රස්ත ප්‍රහාර මාලාව එල්ල වී ඇති බවට අපරාධ පරීක්ෂණ දෙපාර්තමේන්තුව (CID) විසින් කොළඹ කොටුව මහේස්ත්‍රාත් පසන් අමරසේන හමුවේ කරුණු අනාවරණය කර ඇත.

ත්‍රස්තවාදය වැළැක්වීමේ පනත යටතේ රඳවාගෙන ප්‍රශ්න කරනු ලබන හිටපු බුද්ධි ප්‍රධානී සුරේෂ් සලේ, හිටපු පොලිස්පති සී.ඩී. වික්‍රමරත්න, හිටපු නියෝජ්‍ය පොලිස්පතිවරුන් වන ප්‍රසාද් රණසිංහ, නිශාන්ත සොයිසා සහ අසාද් මවුලානා නමැත්තාගෙන් ලබාගත් ප්‍රකාශ පදනම් කරගනිමින් මෙම තොරතුරු අනාවරණය වී ඇත.

හිටපු ජනාධිපති ගෝඨාභය රාජපක්ෂ ඇතුළු හමුදා බුද්ධි නිලධාරීන් කිහිපදෙනකුට එරෙහිව විදෙස් ගමන් තහනම් ලබාගත් නමුත්, සුරේෂ් සලේගේ අසනීප තත්ත්වයෙන් මාස හතරක කාලයක් රෝහල්ගතව සිටීම නිසා විමර්ශන ප්‍රමාද වූ බවත් ඔක්තෝබර් (06) වනදා ඔහු යළි අපරාධ පරීක්ෂණ දෙපාර්තමේන්තුව වෙත රැගෙන ඒමෙන් පසු පරීක්ෂණ කඩිනම් කළ බවද අපරාධ පරීක්ෂණ දෙපාර්තමේන්තුව සඳහන් කරයි.

ලංකා ඉන්දියන් ඔයිල් (IOC) සහ සයිනොපෙක් සමාගම් විසින් අද (05) දිනයේ සිට ක්‍රියාත්මක වන පරිදි පෙට්‍රල් මිල ඉහළ දමා ඇත.

ඒ අනුව ඔක්ටේන් 95 පෙට්‍රල් ලීටරයක මිල රුපියල් 20කින් ඉහළ නංවා ඇති අතර රුපියල් 495ක්ව පැවති ඔක්ටේන් 95 පෙට්‍රල් ලීටරයක මිල රුපියල් 515ක් දක්වා ඉහළ යයි.

තවද, මෙම මිල සංශෝධනයට අනුව ෂෙල් (Shell) සමාගමද සිය ඔක්ටේන් 95 පෙට්‍රල් ලීටරය රුපියල් 20කින් ඉහළ නංවා ඇත.

2026 වසරේ සිව්වන කාර්තුව සඳහා විදුලි ගාස්තු 1.46%කින් ඉහළ නැංවීමට ශ්‍රී ලංකා මහජන උපයෝගිතා කොමිෂන් සභාව යෝජනා කර ඇත.

ජාතික පද්ධති ක්‍රියාකරු (NSO) විසින් එම කාර්තුව සඳහා විදුලි ගාස්තු 2.88%කින් ඉහළ නැංවීමට යෝජනා කර තිබුණද, කොමිෂන් සභාවේ මූලික සමාලෝචනයෙන් අනතුරුව එම ප්‍රතිශතය 1.46% දක්වා අඩු කර ඇත.

ඒ අනුව විදුලි ගාස්තු සංශෝධනය සම්බන්ධයෙන් අවසන් තීරණය ගනු ලබන්නේ හෙට (05) දින පැවැත්වීමට නියමිත මහජන උපදේශනයෙන් අනතුරුව බව සඳහන් කරයි.

ජනතාවට අවශ්‍ය වැඩ කරගැනීම සඳහා කිසිදු දේශපාලඥයෙක්ට සහ රාජ්‍ය නිලධාරියෙක්ට කිසිදු මුදලක් ලබාදීමට අවශ්‍ය නැති බව කෘෂිකර්ම, පශු සම්පත්, ඉඩම් හා වාරිමාර්ග අමාත්‍ය කේ.ඩී ලාල් කාන්ත සඳහන් කරයි.

ජන හමුවක් අමතමින් අමාත්‍ය කේ.ඩී ලාල් කාන්ත සඳහන් කළේ,

“දේශපාලඥයකුට මොකක්වත් දෙන්න එපා. රාජ්‍ය නිලධාරියෙකුට කිසිවක් ගෙවන්න ඕනෙත් නෑ. රාජ්‍ය නිලධාරීන්ට පඩි ගෙවනවා. පඩි මදිනම් පඩි වැඩි කරනවා. ගිය අයවැයෙන් පඩි වැඩි කරා. මේ අයවැයෙනුත් වැඩි කරනවා. ඊළග අයවැයෙනුත් වැඩි කරනවා.

අපි ඒක නවත්වන්න ඕන රටේ. නවත්වාගෙන යනවා. ටික ටික ටික. නමුත් අපි දන්නවා තාම තැන් තැන්වල වැඩේ කෙරෙන්නේ නැතුව පොඩ්ඩක් හිර කරලා තියාගන්නවා ෆයිල් එක යට ගහලා කීයක් හරි අරගෙනම වැඩේ කරන්න. කලාතුරකින් එහෙම ඒවා තාම තියෙනවා.

දේශපාලඥයන්ගේ නෙමෙයි නිලධාරින්ගේ තියෙනවා. සමහර අයගේ. ඒක තව ටික දවසක් යනකොට ටික ටික ටික ක්‍රමානුකූලව හරි යයි. එක්කනෙක් දෙන්නෙක් අල්ලලා දීලා අල්ලස් හෝ දූෂණ කොමිෂන් එකෙන්, ඒ වැඩත් යනකොට හරි යයි. ඒක තව අවුරුද්දක්, දෙකක් තුනක් යනකොට ඒක විසදාගන්න පුළුවන්.”

වත්මන් කථානායකවරයාට එරෙහිව විපක්ෂය විසින් ගෙන එන විශ්වාසභංග යෝජනාව එළැඹෙන නොවැම්බර් මස (03) වැනි දින විවාදයට නොගන්නා බව සභානායක අමාත්‍ය බිමල් රත්නායක සඳහන් කරයි.

විශ්වාසභංග යෝජනාව ස්ථාවර නියෝග වලට ගැළපෙන පරිදි සංශෝධනය කර ඔක්තෝබර් (28) වැනි දිනට පෙර භාර නොදුන් නිසා එළැඹෙන නොවැම්බර් (03) වැනි දින විවාදයට ගත නොහැකි බව අමාත්‍ය බිමල් රත්නායක සඳහන් කරයි.

අමාත්‍ය බිමල් රත්නායක සඳහන් කළේ,

“විපක්ෂයෙන් කථානායකතුමාට ඉදිරිපත් කර තිබෙන විශ්වාසභංගය පාර්ලිමේන්තුවේ ස්ථාවර නියෝග උල්ලංඝනය නොවන පරිදි, ස්ථාවර නියෝග වලට ගැලපෙන පරිදි, පාර්ලිමේන්තුවේ මෙතෙක් කථානායකතුමන්ලාට ඉදිරිපත් කරලා තිබෙන විශ්වාසභංග වලත් ස්වභාවය පදනම් කරගෙන ස්ථාවර නියෝග වලට ගැලපෙන පරිදි ඉදිරිපත් කරන්න කියන එක.

එතැනදි අපි ඉල්ලා සිටියා මෙම මස (28) වැනිදාට පෙර විපක්ෂයෙන් එම විශ්වාසභංගය ස්ථාවර නියෝගයට ගැලපෙන පරිදි වෙනස් කර ලබා දෙන්න කියලා. නමුත් එය විපක්ෂය පැත්තෙන් ස්ථාවර නියෝගවලට ගැලපෙන පරිදි සංශෝධනය කර ලබා නොදුන් නිසා පාර්ලිමේන්තුවට විවාද කළ නොහැකියි.

පාර්ලිමේන්තුව විසින් කටයුතු කළ යුතු වන්නේ එය විසින්ම සම්මත කරගෙන තිබෙන ස්ථාවර නියෝග අනුව. පාර්ලිමේන්තුවේ කථානායක තනතුර කියන්නේ පාර්ලිමේන්තුවේ ප්‍රධානියා. ඒ නිසා පාර්ලිමේන්තුවේ ස්ථාවර නියෝග වලට අදාළව ජනාධිපතිතුමාට, අග්‍රවිනිශ්චයකාරතුමා ඇතුළු ශ්‍රේෂ්ඨාධිකරණ විනිශ්චයකාරවරුන්ට, කථානායකතුමා වැනි ප්‍රධාන තනතුරුවල පුද්ගලයින්ට අදාළව විශ්වාසභංග ඉදිරිපත් කළ හැක්කේ කුමන ආකාරයෙන්ද කියන එක සම්බන්ධව පාර්ලිමේන්තුවේ ස්ථාවර නියෝග 83 තිබෙනවා.

ඒ වගේම අධිකරණයේ තිබෙන කරුණු සහ විශ්වාසභංගයක් සැලසුම්කර සකස් කිරීම සම්බන්ධයෙන් 91 ස්ථාවර නියෝගවල පැහැදිලි කරලා තිබෙනවා. ඒ වගේම පාර්ලිමේන්තුවේ කාරක සභාවට තමයි මේ පිළිබඳව තීන්දු අරගෙන පාර්ලිමේන්තුවේ වැඩසටහනට එකතු කිරීමේ හැකියාව තිබෙන්නේ.

ඒ නිසා විපක්ෂය පැත්තෙන් එය ඉදිරිපත් නොකිරීම නිසා නොවැම්බර් (03) වැනිදා පාර්ලිමේන්තුවේ දිනය සම්පූර්ණයෙන් වෙනස් කරලා තිබෙනවා කල්තැබීමේ විවාදයකට.”

මෙරට ඛනිජ කර්මාන්තය සඳහා ශක්තිමත් ආයෝජකයන් ආකර්ෂණය කර ගැනීමට අදාළ සැලසුම් සකස් කිරීම පිළිබඳ සාකච්ඡාවක් ජනාධිපති අනුර කුමාර දිසානායකගේ ප්‍රධානත්වයෙන් ජනාධිපති කාර්යාලයේදී (28) දින පැවැත්විණි.

මෙහිදී ඛනිජ කර්මාන්තයට අදාළ ඉඩම් හඳුනා ගැනීම සහ ඛනිජ සංචිත හඳුනා ගැනීමේ ප්‍රගතිය සමාලෝචනය කෙරුණු අතර රට තුළ පවතින ඛනිජ සම්පත්වල විභවතාව කඩිනමින් හඳුනා ගත යුතු බවත් ඒ සඳහා ශක්තිමත් ආයෝජකයින් කැඳවා ගැනීමට කටයුතු කළ යුතු බවත් ජනාධිපතිවරයා විසින් මෙහිදී අවධාරණය කරනු ලැබීය.

කහටගහ සහ එප්පාවල යන ප්‍රදේශවල ගවේෂණ කටයුතුවල ප්‍රගතිය සහ ආයෝජකයන් ආකර්ෂණය කර ගැනීම පිළිබඳව පුළුල් ලෙස සාකච්ඡා කෙරිණි.

භූ විද්‍යා සමීක්ෂණ සහ පතල් කාර්යාංශය මඟින් ඛනිජ සංචිත සහ ගවේෂණ පිළිබඳව නිකුත් කරනු ලබන වාර්තා ජාත්‍යන්තර ප්‍රමිතීන්ට අනුකූලව සකස් කර, ජාත්‍යන්තර වශයෙන් පිළිගත් වාර්තා බවට පත් කිරීම සඳහා අවශ්‍ය පහසුකම් සැලසීම පිළිබඳවද මෙහිදී දීර්ඝ ලෙස සාකච්ඡා කෙරිණි.

එමෙන්ම, ඉදිරියේදී ඛනිජ සංචිත පිළිබඳ ගවේෂණ කටයුතු බාහිර විශේෂඥ පාර්ශ්ව වෙත පැවරීම පිළිබඳව ද විශේෂ අවධානය යොමු විය.

තවද, මැණික් කර්මාන්තය ආශ්‍රිත කැණීම් කටයුතු නිත්‍යනුකූලව සහ විධිමත්ව සිදු කිරීම සඳහා ශක්තිමත් ප්‍රතිපත්ති මාලාවක් සකස් කරමින් පවතින බව කර්මාන්ත සහ ව්‍යවසායකත්ව සංවර්ධන අමාත්‍යාංශයේ නිලධාරීන් විසින් මෙහිදී දැනුම් දෙනු ලැබීය.

මැණික් අපනයනයේදී සිදුවන වංචා අවම කිරීම සඳහා ගෙන ඇති ක්‍රියාමාර්ගවල ප්‍රගතිය ද මෙහිදී විමසා බැලිණි.

එමෙන්ම, දේශීය මැණික් කර්මාන්තය නඟා සිටුවීම සහ විදේශීය ආයෝජකයන් ආකර්ෂණය කර ගැනීමේ අරමුණින් ඉදිකෙරෙන මැණික් හා ස්වර්ණාභරණ මධ්‍යස්ථානයේ ඉදිකිරීම් කටයුතුවල ප්‍රගතිය ද සාකච්ඡාවට ලක් විය.

බෙංගාල බොක්ක මුහුදු ප්‍රදේශයේ පවතින “ඔර්නබ්” නමැති සුළි කුණාටුව අද (27) දිනයේ චන්ඩ සුළි කුණාටුවක් දක්වා වර්ධනය වන බව ජාත්‍යන්තර කාලගුණ දත්ත පෙන්වා දෙයි.

ඒ හේතුවෙන් දිවයින වටා වන මුහුදු ප්‍රදේශ සහ බෙංගාල බොක්ක මුහුදු ප්‍රදේශය සඳහා කාලගුණ විද්‍යා දෙපාර්තමේන්තුවේ ස්වභාවික විපත් පිළිබඳ පූර්ව අනතුරු ඇඟවීමේ මධ්‍යස්ථානය විසින් රතු නිවේදනයක් නිකුත් කර ඇත.

එම චණ්ඩ සුළි කුණාටුව අද (27) දින ඉතාම චණ්ඩ සුළි කුණාටුවක් බවට පත්වී, හෙට (28) දිනයේ පෙ.ව. 11.30 පමණ වනවිට අන්ද්‍රා ප්‍රදේශය හරහා ඉන්දියානු වෙරළ තීරයට ඇතුල් වනු ඇතැයි අපේක්ෂා කරයි.

මෙම සුළි කුණාටුවේ සෘජු බලපෑමක් ශ්‍රී ලංකාවට නොමැති වුවද එහි වක්‍ර බලපෑමෙන් දිවයිනේ නිරිති දිග කොටසට තද වැසි සහ තද සුළං අපේක්ෂා කරන බව කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අජිත් විජයමාන්න සඳහන් කරයි.

ඒ අනුව උතුරු, බස්නාහිර, සබරගමුව, දකුණු, වයඹ, මධ්‍යම සහ උතුරුමැද පළාත්වල සහ ත්‍රිකුණාමලය දිස්ත්‍රික්කයේ ඇතැම් ස්ථාන වලට මි.මී. 100 ට වැඩි තද වැසි ඇති විය හැකි බවද අධ්‍යක්ෂ ජනරාල් අජිත් විජයමාන්න සඳහන් කරයි.