Unusuma Editor

ඉතාලිය රජය විසින් මංගල උත්සවවලදී නිරුවත් වීමේ අයිතිය නීත්‍යානුකූල කර ඇති බව වාර්තා වේ.

ඉතාලියේ සොඩීනියාවේ නිරිතදිග වෙරළ තීරයේ නම් කරන ලද ප්‍රදේශයක නිරුවත් විවාහ සඳහා මෙසේ අවසර හිමිවී ඇත.

සැතපුම් හතරක් දිග වෙරළ තීරය වසර ගණනාවක් තිස්සේ ජනප්‍රිය නිරුවත් ස්ථානයක් බව සැන් වෙරෝ මිල්ස් නගරාධිපති ලුයිගි ටෙඩෙස්චි විදෙස් මාධ්‍ය වෙත පැවසීය.

එම අවසරය තුලින් නිරුවතින් විවාහ වීමට ලොව ප්‍රිය කරනා ලොව නන් දෙසින් පැමිණෙන සංචාරකයින්ගේ ආකර්ෂණීය ස්ථානයක් ලෙස වෙරළ තීරය යොදා ගැනීමට ඉතාලි රජය බලාපොරොත්තු වන බව නගරාධිපතිවරයා මාධ්‍ය වෙත අදහස් දක්වමින් වැඩිදුරටත් පැවසීය.

පැපුවා නිව්ගිනියාවේ සිදුවූ දැවැන්ත නායායෑමෙන් පුද්ගලයන් 670 දෙනෙකු මිය ගොස් ඇති බවට එක්සත් ජාතීන්ගේ සංවිධානය අනුමාන කර ඇති බව සඳහන්.

පසුගියදා මෙම නායායෑම සිදුවීමෙන් අනතුරුව එරට රජය නිවේදනය කළේ ඉන් මරණ 300ක් පමණ සිදුව ඇති බවට වූවත් මේ වනවිට අනාවරණය වී ඇති දත්තයන්ට අනුව මියගිය පිරිස 670ක් පමණ වෙතැයි පැවසේ.

පසුගිය සිකුරාදා සිදුවූ එම මහා ඛේදජනක සිදුවීමෙන් විශාල පිරිසක් සහ නිවාස දේපොල රැසක් පස් වලින් යටව ගොස් ඇති අතර විදෙස් වාර්තා වැඩිදුරටත් සඳහන් කළේ නිවාස 150කට අධික ප්‍රමාණයක් සම්පූර්ණයෙන්ම පස් තට්ටුවකින් යටවී ඇති බවයි.

එම ස්ථානයේ තවදුරටත් විශේෂ සහන මෙහෙයුම් ක්‍රියාත්මක බව විදෙස් මාධ්‍ය වාර්තා කර ඇත.

කෙසේ වෙතත්, අදාළ ස්ථානය විමර්ශනය කිරීමට ගොස් ඇති එක්සත් ජාතීන්ගේ නියෝජිත කණ්ඩායමක් පවසා ඇත්තේ පුද්ගලයන් 670 දෙනෙකු පමණ මියගොස් ඇති බවට මේ වනවිට ගණන් බලා ඇති බවයි.

ඉන්දියාවේ නවදිල්ලි අගනුවර ළමා රෝහලක ඊයේ ඇති වූ ගින්නකින් අවම වශයෙන් අලුත උපන් බිළිඳුන් හය දෙනෙකු මිය ගොස් ඇති බව ඉන්දීය බලධාරීහු පවසති.

අලුත උපන් බිළිඳුන් දොළොස් දෙනෙකු ගින්න අතරතුර මුදාගෙන ඇති නමුත් ගින්නෙන් බිලිඳුන් හය දෙනෙකු මිය ගිය බව දිල්ලි ගිනි නිවීමේ සේවා ප්‍රධානී අතුල් ගාර්ග් මාධ්‍ය වෙත පැවසීය.

බේරාගත් එක් බිළිඳෙකුගේ තත්ත්වය බරපතල වන අතර අනෙක් පස් දෙනා වෛද්‍ය ප්‍රතිකාර ලබමින් සිටින බව වාර්තා වේ. බේරාගත් ළදරුවන් හඳුනාගෙන නොමැති අතර ඔවුන්ගේ උප්පැන්න වාර්තා ගින්නෙන් විනාශ වී ඇති බව පැවසේ.

දිල්ලි ගිනි නිවන සේවා පැවසුවේ ඊයේ රාත්‍රී 11:32 ට ලැබුනු ඇමතුමක් අනුව ගිනි නිවන රථ 9ක් එම ස්ථානයට කඩිනමින් පිටත්කල බවයි.

තවදුරටත් ගලවා ගැනීමේ මෙහෙයුම් ක්‍රියාත්මක වෙමින් පවතින බවත්, ගින්න ඒ අසල තවත් ගොඩනැගිල්ලකට පැතිර ඇති බවත් මේ වනවිට එය පාලනය කර ඇති බවත් පැවසේ.

ගින්නට නිශ්චිත හේතුව මෙතෙක් අනාවරණය වී නොමැති බවත් ගාර්ග් මහතා පැවසීය.

මෙවැනිම 2021වසරේ බටහිර ඉන්දියාවේ මහාරාෂ්ට ප්‍රාන්තයේ රෝහලක ඇතිවූ ගින්නකින් අලුත උපන් බිළිඳුන් 10 දෙනෙකු මිය ගොස් ඇති බව සඳහන්.

සංචාරක බංගලදේශ ක්‍රිකට් කණ්ඩායම හා ඇමෙරිකා එක්සත් ජනපද කණ්ඩායම අතර පැවති පළමු 20-20 තරඟයෙන් කඩුලු පහකින් ජයග්‍රහණය කිරීමට ඇමෙරිකා කණ්ඩායමට හැකි විය.

තරඟයේ මුලින් පන්දුවට පහර දුන් බංගලි කණ්ඩායම නියමිත පන්දුවාර විස්ස අවසානයේ කඩුලු හයක් දැවී ලබාගත්තේ ලකුණු 153ක් පමණි.

පිළිතුරු ඉනිම ක්‍රීඩා කළ ඇමරිකා කණ්ඩායම කඩුළු පහක් පමණක් දැවී පන්දු තුනක් ඉතිරිව තිබියදී ඉලක්කගත ලකුණු ප්‍රමාණය සපුරා ගත්තේය.

මෙම සිදුවීම සුවිශේෂී වනුයේ, පළමු වතාවට 20-20 ලෝක කුසලාන තරගාවලිය සඳහා සහභාගි වන ඇමරිකානු කණ්ඩායම ටෙස්ට් ක්‍රීඩා කරන රටක් වන බංග්ලදේශය පරදා ජයග්‍රහණය කිරීමයි.!

විදේස් මාධ්‍ය පෙන්වා දෙන්නේ ඉරාන ජනාධිපති ඊබ්‍රාහිම් රයිසිගේ අවාසනාවන්ත මරණය දරාගත නොහැකි ලක්ෂ සංඛ්‍යාත ඉරාන ජනතාව එරට අගනුවර වන ටෙහරාන් නුවර වෙත ඒකරාශී වෙමින් සිටිනා අතර රට පුරාම ශෝකප්‍රකාෂ රැළි සංවිධානය වෙමින් පවතින බවයි.

මේ අතර ඉරාන ජනාධිපතිවරයාගේ මරණයට ඇමරිකාව වගකිය යුතු බව ඉරානයේ හිටපු විදේශ අමාත්‍යවරයෙකු වන ජාවාඩ් සරීෆ් විශේෂ ප්‍රකාශයක් නිකුත් කර ඇත.

ඔහු වැඩිදුරටත් පැවසූවේ ඇමරිකාව මූලිකව ඉරානයට සම්බාධක පැනවීමට මූලිකව කටයුතු කළ බවත්, ඒ හරහා ඉරානයට ගුවන් යානා සහ ගුවන් යානා අමතර කොටස් මිලදී ගැනීම් සඳහා බාධා පැමිණවූ බවත්‍ මේ සියලු කාරනා පිටුපස ඇමරිකාව සිටිනා බවත් ඔවුන්ට එරෙහිව දැඩි ක්‍රියාමාර්ග ගැනීමට කඩිනම්න් පියවර ගන්නා බවත් ය.

ඉරාන ජනතාවගේ අපරාධ ලැයිස්තුවේ ඉහළින්ම සිටින රටක් ලෙස ඇමරිකාව නම් කළහැකි බව ඔහු වැඩිදුරටත් පවසයි.

ඊයේ (19) ඉරාන කඳුකර ප්‍රදේශයක සිදුවූ හෙලිකොප්ටර් අනතුරකින් එරට ජනාධිපති ලෙස කටයුතු කළ ඊබ්‍රාහිම් රයිසි මියගොස් ඇති බව අද (20) තහවුරු වීමත් සමඟ එරට මීළඟ ජනපති සම්බන්ධයෙන් මේ වනවිට යම් අර්බුදකාරී තත්ත්වයක් මතුව ඇති බව විදේශ මාධ්‍ය වාර්තා කරයි.

එරට ව්‍යවස්ථාව අනුව ජනාධිපති වරයාගේ හදිසි අභාවයකදී අන්තර්වාර ජනපතිවරයෙක් පත්කළ යුතු අතර ඒ සඳහා මේ වනවිට එරට “පළමු නියෝජ්‍ය ජනාධිපති” ලෙස කටයුතු කරන පුද්ගලයා පත්කිරීමට සිදුව ඇති බව සඳහන්.

68 හැවිරිදි මොහම්මඩ් මොක්බර් නම් පුද්ගලයෙකු එම තනතුර මේ වනවිට දරනු ලබන අතර ඒ අනුව එරට අන්තර්වාර ජනාධිපති ලෙස මොක්බර් පත්වෙතැයි එරට මාධ්‍ය වාර්තා කර ඇත.

ඉන් පසුව දින 50ක් තුළ ඔහුද අයත් වන ත්‍රි-පුද්ගල කවුන්සිලයක් මඟින් නව ජනාධිපතිවරණයක් පැවැත්වීමට සැලසුම් කළ යුතු අතර එම කවුන්සිලයේ අනෙක් සාමාජිකයින් වන්නේ පාර්ලිමේන්තු කථානායක සහ අධිකරණයේ ප්‍රධානියා වේ.

නමුත් මෙම ක්‍රියාවලිය ක්‍රියාත්මක කළ හැක්කේ ඉරාන අධ්‍යාත්මික නායකයාගේ අනුමැතිය මත පමණක් වන අතර ඒ සම්බන්ධයෙන් යම් අර්බුදකාරී තත්ත්වයක් උදාවී ඇති බව සඳහන්.

ඉරානය තුළ සිදුකෙරෙන ඕනෑම කටයුත්තක අවසාන තීරණය ගත යුත්තේ එරට අධ්‍යාත්මික නායකයා බව පැවසේ.

විදෙස් මාධ්‍ය වාර්තා කර ඇත්තේ තුර්කි ඩ්‍රෝන් මෙහෙයුමක් මඟින් ඉරාන ජනාධිපති රයිසි රැගත් හෙලිකොප්ටරයේ කොටස් බවට සැක කෙරෙන තාප ප්‍රභවයක් හඳුනාගැනීමට හැකිව ඇති බවයි.

කෙසේ වෙතත්, ඉරාන බලධාරීන් සඳහන් කර ඇත්තේ එම තොරතුරු තහවුරු කරගැනීම සඳහා තවදුරටත් මෙහෙයුම් සිදුකරමින් පවතින බවයි.

විදෙස් මාධ්‍ය සඳහන් කර ඇත්තේ, ඉරාන ජනාධිපති ඊබ්‍රහිම් රයිසි අසල්වැසි අසර්බයිජානයේ විවෘත කිරීමේ උත්සවයකට අසර්බයිජාන ජනපතිවරයා සමග ඊයේ (19) සහභාගී වීමෙන් අනතුරුව නැවතත් ඉරානය වෙත හෙලිකොප්ටර් රථ පෙළකින් පැමිණෙමින් සිටියදී අදාල ප්‍රදේශයේ දැඩි මිදුම් තත්වයක් තිබී ඇති අතර, එවන් තත්වයක් පැවතියත් ඉරාන ජනපති ගමන් කළ හෙලිකොප්ටර් රථ තුන නොකඩවා ධාවනයේ යෙදී ඇති බවයි.

එහිදී ඉරාන ජනපතිවරයා හා විදේශ ඇමතිවරයා ගමන් ගත් හෙලිකොප්ටරය අනතුරකට ලක්ව ඇති බවට සැක කෙරේ.

ඉරාන ජනපතිවරයා ගමන් කළ හෙලිකොප්ටර් යානය සමග තවත් හෙලිකොප්ටර් යානා දෙකක් ආරක්ෂාව සපයමින් ගමන් කර ඇති නමුත්, එම හෙලිකොප්ටර් යානා දෙක නිරුපද්‍රිතව ඉරානයේ ටබ්රිස් නම් ගමනාන්තය වෙත ලඟා වී ඇතත්, ඉරාන ජනපතිවරයා හා විදේශ ඇමතිවරයා ගමන් කල හෙලිකොප්ටරය පිළිබඳ මේ වනතුරු හෝඩුවාවක් නොමැති බව සඳහන්.

මේ වනතුරු ඉරාන රජයෙන් නිල වශයෙන් හෙලිකොප්ටර් යානය සොයාගැනීම සම්බන්ධව නිශ්චිත නිවේදනයක් නිකුත් කර නොමැත.