Local news

ශ්‍රී ලංකන් ගුවන් සේවයේ යානා මිලදී ගැනීමට අදාළව පවතින නඩු දෙකේ, පසුගිය 2020 වසරේ මුලින්ම පැවරූ නඩුවේද සැකකරුවෙක් ලෙස පාර්ලිමේන්තු මන්ත්‍රී නාමල් රාජපක්ෂ නම් කරන ලෙස නීතිපතිවරයා අපරාධ පරීක්ෂණ දෙපාර්තමේන්තුවට උපදෙස් ලබාදී ඇත.

ආන්දෝලනාත්මක ශ්‍රී ලංකන් ගුවන් යානා ගණුදෙනුව සම්බන්ධයෙන් නඩු 02ක් මේ වනවිට විභාග වෙමින් පවතියි.

1.මෙම ගණුදෙනුව සම්බන්ධයෙන් අපරාධ පරීක්ෂණ දෙපාර්තමේන්තුව පසුගිය 2020 වසරේදී කොටුව මහේස්ත්‍රාත් අධිකරණයේ පැවරු නඩුව

2.මෙම ගණුදෙනුව සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව 2026 වසරේ සැප්තැම්බර් (04) වැනිදා පැවරු නඩුව

මුලින්ම 2020 වසරේ පැවරු නඩුවට අදාළව සැකකරුවන් ලෙස නම් කර සිටියේ, ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේන සහ ඔහුගේ බිරිඳ වන ප්‍රියංකා නියෝමාලි විජේනායක යන දෙදෙනායි.

පසුව 2026 වසරේ පෙබරවාරි (02) වනදා හිටපු කථානායක චමල් රාජපක්ෂගේ පුත්‍රයෙක් වන ශමින්ද රාජපක්ෂ තුන්වන සැකකරු ලෙස නම් කළ අතර ඔහුට මේ වනවිට රතු වරෙන්තු නිකුත් කර ඇත.

මේ වනවිට නීතිපතිවරයා අපරාධ පරීක්ෂණ දෙපාර්තමේන්තුවට උපදෙස් ලබාදී ඇත්තේ පාර්ලිමේන්තු මන්ත්‍රී නාමල් රාජපක්ෂද මෙම නඩුවේ සැකකරුවෙක් ලෙස නම් කරන ලෙසයි.

මෙම නඩුව පසුගිය පෙබරවාරි අවසානයේ කැඳවු අවස්තාවේදි මෙම නඩු ගොනුව නීතිපතිවරයාගේ උපදෙස් සඳහා ගොනුකර ඇති බව අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.

ඒ අනුව එළඹෙන සතියේදී මෝසමක් මගින් කොටුව මහේස්ත්‍රාත් අධිකරණයේ පවතින නඩුව කැඳවා නාමල් රාජපක්ෂ සැකකරුවෙකු ලෙස නම් කිරීමට නියමිතය.

මේ අතර අනෙක් නඩුව වන්නේ,

2026 වසරේ සැප්තැම්බර් (04) වැනිදා අල්ලස් හෝ දූෂණ චෝදනා විමර්ශන කොමිෂන් සභාව පැවරු නඩුවකට අදාළව මන්ත්‍රී නාමල් රාජපක්ෂ අත්අඩංගුවට ගෙන මේ වනවිට බන්ධනාගාරගත කර ඇත.

එම නඩුවේ චෝදනාව වන්නේ, ශ්‍රී ලංකන් ගුවන් සමාගමට ගුවන් යානා මිලදී ගැනීමේ ගනුදෙනුවකට අදාළව රුපියල් මිලියන 100ක අල්ලස් මුදලක් ලබාගැනීම වේ.

ඒ අනුව ශ්‍රී ලංකන් ගුවන් සමාගමට ගුවන් යානා මිලදී ගැනීමේදී සිදුවුයේ යැයි කියන අල්ලස් ලබාගැනීම සහ මුදල් විශුද්ධිකරණය යන සිදුවීම් වලට අදාළ නඩු දෙකේම නාමල් රාජපක්ෂ සැකකරුවෙක් ලෙස නම් කර ඇත.

පාර්ලිමේන්තු මන්ත්‍රී දයාසිරි ජයසේකර විසින් කථානායක වෛද්‍ය ජගත් වික්‍රමරත්නට එරෙහිව අන්තර්ජාතික පාර්ලිමේන්තු සංගමය (IPU), පොදු රාජ්‍ය මණ්ඩලයීය පාර්ලිමේන්තු සංගමය (CPA) සහ එක්සත් ජාතීන්ගේ මානව හිමිකම් පිළිබඳ මහ කොමසාරිස්වරයා වෙත ලිඛිත පැමිණිලි ඉදිරිපත් කර ඇත.

සැප්තැම්බර් (10) වන දින පාර්ලිමේන්තුවේදී මතු කිරීමට උත්සාහ කළ වරප්‍රසාද ප්‍රශ්නයක් ඉදිරිපත් කිරීමට පාර්ලිමේන්තු කථානායකවරයා විසින් අවස්ථාව ලබා නොදීම සහ ඊට බාධා කිරීම පදනම් කර ගනිමින් මෙම පැමිණිලි සිදුකර ඇත.

22 වැනි ආණ්ඩුක්‍රම ව්‍යවස්ථා සංශෝධනයට එරෙහිව දැවැන්ත ජනතා පෙළගැස්මක් සහ සාමකාමී උද්ඝෝෂණයක් පැවැත්වීමට සූදානම් බව විපක්ෂ නායක සජිත් ප්‍රේමදාස සඳහන් කරයි.

ඒ අනුව ආණ්ඩුවේ පාලනයට එරෙහිව තබන ප්‍රබලතම පියවර ලෙස ලබන සැප්තැම්බර් (24) වැනිදා කොළඹදී උද්ඝෝෂණයක් පවත්වන බව විපක්ෂ නායක සජිත් ප්‍රේමදාස සඳහන් කරයි.

රජය 22 වැනි සංශෝධනය හරහා අධිකරණයේ ස්වාධීනත්වය සහ නීතියේ ආධිපත්‍යය විනාශ කරමින් තනි පක්ෂ පාලනයක් ඇති කිරීමට උත්සාහ කරන බවද විපක්ෂ නායක සජිත් ප්‍රේමදාස සඳහන් කරයි.

රජයේ මෙම වැඩපිළිවෙළ පරාජය කිරීම සඳහා සියලු ප්‍රගතිශීලී ජනතාවගේ සහයෝගය තමන් අපේක්ෂා කරන බවද විපක්ෂ නායක සජිත් ප්‍රේමදාස සඳහන් කරයි.

අද (13) දින විපක්ෂ නායක කාර්යාලයේ පැවැති හමුවක් අමතමින් විපක්ෂ නායක සජිත් ප්‍රේමදාස මේ බව සඳහන් කරයි

හිටපු ජනා­ධි­පති මහින්ද රාජපක්ෂගේ බිරිඳ විසින් ක්‍රීඩා අමාත්‍යංශයට ආනයනය කරන මුවාවෙන් රුපියල් කෝටි ගණනක් බදු වංචා කර සුඛෝ­ප­භෝගී බස් රථ දෙකක් ආනයනය කර කාල්ටන් පෙර පාස­ලට ලබාදීමෙන් සිදු කරන ලද දූෂණ හා මූල්‍ය අක්‍රමිකතා සම්බන්ධයෙන් අල්ලස් හෝ දූෂණ විමර්ශන කොමිෂන් සභාව සහ අපරාධ පරීක්ෂණ දෙපාර්තමේන්තුව ඒකා­බද්ධ විම­ර්ශ­න­යක් ආරම්භ කර ඇත.

ඒ අනුව මෙතෙක් කරන ලද විම­ර්ශන මඟින් අනාවරණය වූ කරුණු අනුව අපරාධ චෝදනා ගොනු කිරී­මට ප්‍රමා­ණ­වත් කරුණු ඇති බවට නීති­පති දෙපාර්තමේන්තුව ලබාදුන් උප­දෙස් අනුව පොලිස් මූල්‍ය විම­ර්ශන ඒක­කය මඟින්ද මේ අක්‍රමිකතා සම්බ­න්ධ­යෙන් විධි­මත් විමර්ශනයක් ආරම්භ කර ඇත.

තවද සිරි­ලිය පද­නම හෙවත් සිරි­ලිය සවිය ජනාධිපති කාර්යා­ලය යටතේ පව­තින කාන්තා සංවි­ධා­න­යක් බවට ඒත්තු ගන්වා මේ මූල්‍ය අක්‍ර­මි­ක­තාව සිදුකර ඇති අතර එනිසා හිටපු ජනාධිපති ලේක­ම්ව­ර­යකු වන ලලිත් වීර­තුංග හා ජනා­ධි­පති ලේකම් කාර්යා­ලයේ අති­රේක ලේකම්වරයෙක් ලෙස කට­යුතු කළ පුද්ග­ල­යකු සම්බන්ධයෙන් විම­ර්ශ­නය කර­මින් පවතියි.

මහින්ද රාජ­පක්ෂ ජනා­ධි­පති ධුරය දැරූ සමයේදී ජාතික ඉති­රි­ කි­රීමේ බැංකු­වෙන් දුන් රුපි­යල් ලක්ෂ සීයක මුද­ලක් සිරි­ලිය පද­නම මඟින් අව­භා­විත කිරී­මක් සම්බන්ධයෙන්ද මූල්‍ය විම­ර්ශන ඒක­කය මඟින් වෙනම පරීක්ෂණයක් ආරම්භ කර ඇත.

මේ අතර සිරිලිය පද­නම විසින් කොළඹ රිජ්වේ ආර්යා ළමා රෝහ­ලට සී.ටී ස්කෑනර් යන්ත්‍ර­යක් පරි­ත්‍යාග කිරී­මට අවශ්‍ය බව පෙන්වා, ඉදි­රි­පත් වූ ලිපි­යක් අනුව විධි­මත් අයු­රින් කරුණු සොයාබැලීමකින් තොරව එව­කට ජාතික ඉතිරි කිරීමේ බැංකුවේ සභා­ප­ති­ව­රයා විසින් දෙන ලද වාචික උපදෙස් අනුව එකී මුදල සිරි­ලිය පදනමට පරිත්‍යාග කොට ඇති අතර එකී මුදලින් මිලදී ගත් බව අඟවා හිටපු ජනා­ධි­පති මහින්ද රාජ­ප­ක්ෂගේ පුත්‍ර­ය­කුගේ උපන්දිනය නිමිත්තෙන් එම සී.ටී. ස්කෑනර් යන්ත්‍රය රෝහලට පරිත්‍යග කර ඇති බවද අනාවරණය වී ඇත.

රටේ මහජනයාගේ ධනයෙන් සතයකට අත තිබ්බොත් කවදාහරි දඩුවමක් ලැබෙන බව ඔප්පු කර පෙන්වන බවත් එනිසා දැන් විශාල පිරිසක් කලබල වී සිටින බව ජනාධිපති අනුර කුමාර දිසානායක සඳහන් කරයි.

මේ රට විනාශයට පත් කරපු දූෂිතයන්ට දඩුවම් දීම සඳහා වු නඩුවක් තිබෙන බවත් ආච්චි, මව, සහෝදරයා සහ බාප්පා හොරකම් කරානම් නීතිය කාටත් එකයි බවද ජනාධිපති අනුර කුමාර දිසානායක සඳහන් කරයි.

ජනාධිපති අනුර කුමාර දිසානායක සඳහන් කළේ,

“අපිට නඩුවක් තියෙනවා බේරගන්න. මේ රට විනාශයට පත් කරපු දූෂිතයන්ට දඩුවම් දීම සඳහා වු නඩුව තියෙනවා බේරගන්න. කවුරු මොනතරම් අනුකම්පා කරන්න උත්සාහ කරත්, කට්ටිය කඳුළු පෙන්නලා අනුකම්පාව දිනා ගන්න.

තාත්තලාට තිබ්බා පුතා හොරකම් කරන කොට අඩලා පුතේ එපා කියන්න. ඇල්ලුවට පස්සේ කඳුළු හලලා වැඩක් නෑ. තාත්තට තිබුණේ පුතා හොරකම් කරනකොට පුතේ ඔය වැඩේ කරන්න එපා කියන්න.

පුතාට රිසිසේ හොරකම් කරන්න දීලා, අල්ලපුවාම කඳුළු එනවා. ඕවට අපි අහුවෙන් නෑ හොදේ. කඳුළු වලට මේක යටපත් වෙන්න දෙන්නේ නෑ. අනුකම්පාව යටපත් වෙන්න දෙන්නේ නෑ. ආච්චිද, ආච්චිටත් නීතිය එකයි.

මවද, මවටත් නීතිය ක්‍රියාත්මක වෙනවා. සහෝදරයාද, බාප්පොච්චිද ඔක්කොටම එහෙමයි. සමහර අය කියනවා, සහෝදරයා එක පවුලේ කට්ටිය වැඩියි නේද. පවුලේ කට්ටිය වැඩියෙන් හොරකම් කරානම් පවුලේ කට්ටියම අහුවෙනවා.

මොනවා කරන්නද අපි. මේක කරනවා. අපේ රටේ ජනතාවට ආදර්ශයක් දෙන්න ඕනා, මහජනයාගේ ධනයෙන් සතයකට අත තිබ්බොත් කවදාහරි දඩුවමක් ලැබෙන බව අපි ඔප්පු කරන්න ඕනා. දැන් විශාල ප්‍රමාණයක් කලබල වෙලා ඉන්නවා.

කලබල වෙලා කියනවා, මේ ආණ්ඩුව වට්ටනවා. මේ ආණ්ඩුව පළිගන්න එනවා. මේ ආණ්ඩුව වෛරයෙන් පෙළෙනවා. අපිට කිසි කෙනෙක් ගැන වෛරයක් නෑ. අපි මොනවට වෛර කරන්නද. අපිට තියෙන්නේ මේ රට ගොඩනැගීම පිළිබඳ අපේක්ෂාව.

ජනතාව අපි කෙරෙහි විශාල බලාපොරොත්තුවක් තියෙනවා. මේ රටේ හොරකම නතර කරන්න ඕන කියලා. නීති විධානයේ ආධිත්‍ය තහවුරු කරන්න ඕන කියලා. රටේ ආර්ථිකය ගොඩනගන්න ඕන කියලා.

තමන්ගේ දරුවන්ට හොද ජීවිතයක් හදලා දෙන්න ඕන කියලා. අපේ ආණ්ඩුව ඉටු කරන්නේ ඒ බලාපොරොත්තුව. හැබැයි බලාපොරොත්තුවට යන්න බෑ අපරාධ වලට දඬුවම් දෙන්නේ නැතුව, දුෂිතයන් නීතියේ රැහැනට ගේන්නේ නැතුව, මේවා කරන්න ඕනා.

ඒවා මේ රට ගොඩනැගීමේම කාර්යයේ කොටසක්. හොරකම් අල්ලන එකයි, හොරකම් නතර කරන එකයි ගොඩනැගීමේ කොටසක්. නීතිය කාටත් සාධාරණ ලෙස ඉෂ්ට කිරීම ගොඩනැගීමේම කොටසක්.”

පසුගිය අගෝස්තු මාසයේදී මෙරටට අමෙරිකානු ඩොලර් මිලියන 748.6ක් ලැබී ඇතැයි ශ්‍රී ලංකා මහ බැංකුව සඳහන් කරයි.

ඒ අනුව විදෙස්ගත ශ්‍රී ලාංකික ශ්‍රමිකයින්ගෙන් අමෙරිකානු ඩොලර් මිලියන 748.6ක් ලැබී ඇති බවත් එය පසුගිය 2025 අගෝස්තු මාසයට සාපේක්ෂව වර්ධනයක් පෙන්නුම් කරන බවද ශ්‍රී ලංකා මහ බැංකුව සඳහන් කරයි.

පසුගිය 2025 වසරේ අගෝස්තු මාසයේදී විදෙස්ගත ශ්‍රී ලාංකික ශ්‍රමිකයින්ගෙන් මෙරටට අමෙරිකානු ඩොලර් මිලියන 680.8ක් ලැබී තිබුණ බවද ශ්‍රී ලංකා මහ බැංකුව සඳහන් කරයි.

ජනවාරි මාසයේ සිට අගෝස්තු මාසය දක්වා කාලය තුළ විදෙස් ගත ශ්‍රමිකයින්ගෙන් මෙරටට ලැබී ඇති සමස්ත ප්‍රේශණ ප්‍රමාණය අමෙරිකානු ඩොලර් මිලියන 6,131ක් බවද මහ බැංකු වාර්තාවේ සඳහන් වේ.

පසුගිය 2025 කාලයේ මුල් මාස 8 සඳහා ලැබී ඇති සමස්ත ප්‍රේෂණ ප්‍රමාණය අමෙරිකානු ඩොලර් මිලියන 5,116ක් බවද මහ බැංකුව නිකුත් කළ වාර්තාවේ සඳහන් වේ.

පාර්ලිමේන්තු මන්ත්‍රී නාමල් රාජපක්ෂ වැරදි කරානම් දඩුවම් ලැබිය යුතු බවත් එය ඇත්ත ස්වභාවය බව ශ්‍රී ලංකා පොදුජන පෙරමුණ පාක්ෂිකයෙක් සඳහන් කරයි.

තමන් ඇතුළු පිරිස අනුරාධපුර රැලියට පැමිණියද, ඡන්දය ලබා නොදෙන බවත් ඡන්දය දෙනවාද, නැද්ද තීරණය කරන්නේ තමන් බවද පොදුජන පෙරමුණ පාක්ෂිකයා සඳහන් කරයි.

අනුරාධපුර රැලියට පැමිණි ශ්‍රී ලංකා පොදුජන පෙරමුණ පාක්ෂිකයා මාධ්‍ය වෙත අදහස් දක්වමින් සඳහන් කළේ,

“එයත් ඉතින් මොනවාහරි හොරකම් කරලා තියෙනවා නම් දඬුවම් විදින්න ඕන. ඒක තමයි ඇත්ත ස්වභාවය. එයා අපේ කියලා බේරගන්න බෑ. මගේ අම්මා තාත්තා වැරදි කරත් වැරද්ද නම් වු වැරදි. අපිට ඒ පැත්ත ගන්න බෑ මල්ලී.

ඒක තමයි ඇත්ත කතාව. ඕන තැනක දාන්න. මගේ නමත් එක්ක කියලා තියෙන්නේ. කාටත් හොදයි. වැරදි කරන්නෑ. ඉතිං අපි කියන්නේ ඒකයි. නාමල් රාජපක්ෂ වැරදි කරානම් දඩුවම් විදපන්. අපි විදින්නද. අපි හිරේ යන්නද. වුණේ හිරේ යන්නේ.

වුණේ වැරදි කෙ⁣රුවේ. ඕක තේරුම් ගන්න මිනිස්සූ දන්නේ නෑනේ. මේ රැලියට ආවට අපි ඡන්දය දෙන්නේ නෑ. රැලියට ආව විතරයි. ඡන්දය දෙන එක තීරණය කරන්නේ වෙලාවටයි. කතිරය තියෙන්නේ අපේ අතේ.

පැහැදිලිනේ. කතිරය තියෙන්නේ අපේ අතේ. ඡන්දය දෙනවාද, නැද්ද තීරණය කරන්නේ අපි. මේ ඔය ආවට අපි ඡන්දය දෙන්නේ නෑ. ඕන වෙලාවක නමත් එක්ක දාන්න. බය නෑ. හිරිනේ. මම ගාල්ලේ.”

පොහොර සහනාධාරය රුපියල් 15,000 සිට රුපියල් 30,000ක් දක්වා වැඩි කළ බවත් එළඹෙන අයවැයේදීත් ඊළග කන්න සහ දිගටම රුපියල් 30,000ක් ලබාදෙන බව ජනාධිපති අනුර කුමාර දිසානායක සඳහන් කරයි.

ජනාධිපති අනුර කුමාර දිසානායක සඳහන් කළේ,

“වකුගඩු රෝගියෙකුට දුන්නා රුපියල් 5,000ක්. අපි ඇවිල්ලා අවුරුදු 2යි, දැන් රුපියල් 10,000යි. සහනාධාරය වැඩි කරා. භාණ්ඩාරගාරයේ සල්ලි තියෙනවා සහනාධාර වැඩි කරා. පොහොර සහනාධාරය රුපියල් 15,000යි. දැන් මේ යලට 30,000 කරා.

දිගටම 30,000යි. මම මේ සැරේ බජට් එකට දාලා තියෙන්නේ, ඊළග කන්නයේත් 30,000යි. අපි එනකොට 15,000යි, දැන් 30,000යි. ධනය තියෙනවා සහනාධාර වැඩි වෙනවා. වැඩිහිටි දීමනාව රුපියල් 3,000යි තිබ්බේ. දැන් 5,000යි. මහපොල ශිෂ්‍යාධාරය රුපියල් 5,000යි තිබ්බේ.

දැන් 10,000යි. භාණ්ඩාරගාරයේ ධනය එකතු කරලා සහනාධාර ලැබිය යුතු අයට දෙනවා. ඒ විතරක් නෙමෙයි. පළමු වතාවට ලංකාවේ, අපි 2024 අවුරුද්දෙත් දුන්නා, 2025 අවුරුද්දෙත් දුන්නා, 2026 අවුරුද්දෙත් දෙනවා. මොකක්ද.? අගහිගකම් තියෙන පාසල් දරුවන්ට රුපියල් 6,000ක් දෙනවා.

පාසල් පොත්, උපකරණ මිලදී ගන්න. ගිය අවුරුද්දේ අපි ලක්ෂ 17කට දුන්නා. අස්වැසුම සහනාධාර ගන්න පවුල්වල හැම දරුවට දුන්නා. ඊට අමතරව ළමයි 200ට අඩු පාසලකම හැම දරුවටම දුන්නා. රුපියල් 6,000 ගානේ.

අස්වැසුම සහනාධාරය වැඩි කරා. තව ගෙවල් හදන්න කිවුවා. අපි ගෙවල් හදන්න දස ලක්ෂ දහදාහක් දුන්නා. රුපියල් ලක්ෂ 10න් ගෙයක් හදන්න ආධාරයක් දෙනවා, ගමේ ඉන්න අය එකතු වෙලා ඒ ගේ හදනවා. ගෙවල් 10,000ක් හදන්න එහෙම කල්පනා කරා.

දැන් පරිවාස භාරයට පත්වෙච්ච දරුවෝ ඉන්නවා නේ. අම්ම, තාත්ත, භාරකාරයෙක් නැතුව. ඒ දරුවන්ට අනාගතයක් නෑ. අපි මේ ජනවාරි මාසයේ ඉදන් මොකද කරන්නේ. ඒ හැම දරුවටම මාසෙකට රුපියල් 5,000 ගානේ ස්ථාවර ගිණුමකට දානවා.”