Local news

මැදපෙරදිග පැවති යුදමය තත්ත්වය හේතුවෙන් යම් කාලයක් ප්‍රමාද වූ රේල් පීලි ඇණවුම (23) දින කොළඹ වරායට ළඟා වූ අතර ඒවා ගොඩබෑමේ කටයුතු සිදු කරමින් පවතියි.

මෙම රේල් පීලි 10,000න් 5,000කට ආසන්න ප්‍රමාණයක් මුහුදුබඩ දුම්රිය මාර්ගයේ වේග සීමා පනවා ඇති ස්ථානවල මාර්ගය ප්‍රතිසංස්කරණය කිරීම සඳහා යොදා ගැනීමට නියමිතය.

ඒ අනුව, කොළඹ කොටුව සිට පානදුර දක්වා ස්ථාන 50කට ආසන්න ප්‍රමාණයක නව රේල් පීලි යොදා දුම්රිය මාර්ගය ප්‍රතිසංස්කරණය කිරීමට සැලසුම් කර ඇති අතර එම කටයුතු සඳහා මාස 6ක පමණ කාලයක් ගතවනු ඇතැයි අපේක්ෂා කෙරේ.

මෙම රේල් පීලි මිලදී ගැනීම සඳහා රුපියල් මිලියන 2,000ක පමණ දේශීය අරමුදල් වැය කර ඇති අතර මීට සමගාමීව දුම්රිය පාලම් ඉදිකිරීම් හා ප්‍රතිසංස්කරණ කටයුතු සිදු කිරීමටද අවශ්‍ය පියවර ගනිමින් පවතී.

මෙම කටයුතු අවසන් වීමත් සමඟ මුහුදුබඩ දුම්රිය මාර්ගයේ දෛනිකව සිදුවන දුම්රිය ප්‍රමාදයන් සැලකිය යුතු ලෙස අවම කිරීමට හැකිවනු ඇතැයි අපේක්ෂා කෙරේ.

පාස්කු ත්‍රස්ත ප්‍රහාරයට කුමන්ත්‍රණය කිරීම සහ ආධාර අනුබලදීම සම්බන්ධයෙන් චූදිතයින් 25 දෙනෙකුට එරෙහිව කොළඹ ස්ථීර ත්‍රිපුද්ගල මහාධිකරණය හමුවේ විභාග වූ නඩුවේ තීන්දුව ප්‍රකාශයට පත්කිරීමට තීරණය කර ඇත.

ඒ අනුව කොළඹ ස්ථීර ත්‍රිපුද්ගල මහාධිකරණය හමුවේ විභාග වූ නඩුවේ තීන්දුව සැප්තැම්බර් මස (22) වැනිදා ප්‍රකාශයට පත්කිරීමට ත්‍රිපුද්ගල මහාධිකරණ විනිසුරු මඩුල්ල තීරණය කර ඇත.

ත්‍රස්ත ප්‍රහාර සිද්ධිය සම්බන්ධව කුමන්ත්‍රණය කිරීම ඇතුළු චෝදනා 23,000 කට අධික සංඛ්‍යාවක් යටතේ ගොනුකර තිබෙන නඩුවේ විත්තිකරුවන් විසින් තමන්ගේ විත්තිවාචක ඉදිරිපත් කිරීම පසුගිය (17) කොළඹ ත්‍රිපුද්ගල මහාධිකරණ විනිසුරු මඩුල්ල ඉදිරියේ ආරම්භ කළේය.

ලෝක බැංකු ණය සහ ආධාර යටතේ ක්‍රියාත්මක කෙරෙන කොළඹ කොටුව සංචාරක කලාපයක් ලෙස සංවර්ධනය කිරීමේ ව්‍යාපෘතිය මෙන්ම මෙරට සංචාරක කර්මාන්තයේ ප්‍රවර්ධනය පිළිබඳව ශ්‍රී ලංකාව සහ මාලදිවයින සඳහා වන ලෝක බැංකු කළමනාකරු Gevorg Sargsyan ඇතුළු නියෝජිත කණ්ඩායමත්, ජනාධිපති කාර්යමණ්ඩල ප්‍රධානී ප්‍රභාත් චන්ද්‍රකීර්ති අතර සාකච්ඡාවක් ජනාධිපති ලේකම් කාර්යාලයේදි අද (24) පැවැත්විණි.

කොළඹ, කොටුව ඓතිහාසික උරුමය සුරකිමින් සංචාරක කලාපයක් ලෙස සංවර්ධනය කිරීමේ ව්‍යාපෘතියට අදාළව ජනාධිපති අනුර කුමාර දිසානායකගේ ප්‍රධානත්වයෙන් මීට පෙර පැවති සාකච්ඡාවේදී මතුවූ කරුණු පිළිබඳව මෙහිදී පුළුල් ලෙස සාකච්ඡා කෙරිණි.

ශ්‍රී ලංකාවේ සංචාරක කර්මාන්තයේ ප්‍රවර්ධනය වෙනුවෙනුත්, කෘෂි ව්‍යාපාර, වරාය සහ සැපයුම් සේවා මෙන්ම බලශක්ති යන ක්ෂේත්‍රයන්හි අපේක්ෂිත ඉලක්ක කරා ළඟා වීමටත් අවශ්‍ය සහය ලබාදීමට සූදානම් බවද ලෝක බැංකු නියෝජිතයෝ මෙහිදී වැඩිදුරටත් සඳහන් කළහ.

එමෙන්ම, කොළඹ කොටුව සංචාරක කලාපයක් ලෙස සංවර්ධනය කිරීමේ ව්‍යාපෘතියට මෙන්ම ස්වභාවික සෞන්දර්ය පදනම් කරගත් සංචාරක ව්‍යාපාරය ප්‍රවර්ධනය කිරීමටත්, උතුරු නැගෙනහිර සංචාරක ව්‍යාපාරය දියුණු කිරීම වෙනුවෙනුත් ලබා දිය හැකි දායකත්වය පිළිබඳවද මෙහිදී අවධානය යොමු විය.

ශ්‍රී ලංකාව සහ මාලදිවයින සඳහා වන ලෝක බැංකු කළමනාකරණ ඒකකයේ ජ්‍යෙෂ්ඨ මෙහෙයුම් නිලධාරී Stephan Massing, ලෝක බැංකු නියෝජිත කණ්ඩායමේ ප්‍රධාන මෙහෙයුම් නිලධාරී අසේල දිසානායක මෙම අවස්ථාවට එක්ව සිටියහ.

ප්‍රවාහන මහාමාර්ග සහ නාගරික සංවර්ධන අමාත්‍යාංශය යටතේ ක්‍රියාත්මක කිරීමට සැලසුම් ගත 2025 – 2035 දස අවුරුදු ඩිජිටල්කරණ ඒකාබද්ධ ආයතනික සහභාගිත්ව සංවර්ධන සැලැස්ම ක්‍රියාත්මක කිරීම.

එම සංවර්ධන සැලැස්ම ක්‍රියාත්මක කිරීම වෙනුවෙන් පැවැත් වූ අමාත්‍යාංශයීය උපායමාර්ගික සංවර්ධන සැලැස්ම සාර්ථක කර ගැනීම වෙනුවෙන් සංවිධානය කරන ලද වැඩමුළුව (23) දින බත්තරමුල්ල Waters Edge හෝටල් පරිශ්‍රයේදී පැවැත්වුණි.

මෙහිදී The “Symposium on – Integrated Transport, Highways and Urban Development For Sri lanka” ඒකාබද්ධ සැලැස්ම ක්‍රියාත්මක කිරීම පිළිබඳව සාකච්ඡා කෙරිණ.

මහජනතාවට කාර්යක්ෂම සේවාවක් සහ තිරසර සංවර්ධන සැලැස්ම යථාර්තයක් කරගැනීම වෙනුවෙන්, රාජ්‍ය ආයතනයන්ට ඩිජිටල් ප්‍රවේශයේ අත්‍යාවශ්‍ය බව ඩිජිටල් ආර්ථික කටයුතු නියෝජ්‍ය අමාත්‍ය ඉංජිනේරු එරංග වීරරත්න සඳහන් කරයි.

22 වැනි ආණ්ඩුක්‍රම ව්‍යවස්ථා සංශෝධන සහ අධිකරණ සංවිධාන පනත් කෙටුම්පත් පිළිබඳ පාර්ලිමේන්තු ඡන්ද විමසීමේදී ආණ්ඩු පක්ෂයේ මන්ත්‍රීවරුන් කිහිප දෙනෙකුගේ සහාය ලබාගැනීම සඳහා විපක්ෂයේ දේශපාලන පක්ෂ රහසිගත සාකච්ඡා ආරම්භ කර ඇතැයි වාර්තා වේ.

ආණ්ඩු පක්ෂයේ මන්ත්‍රීවරුන් කිහිප දෙනෙකු එම පනත් කෙටුම්පත් වලට එතරම් කැමැත්තක් නොදක්වන ‌බවට දැනගන්න ලැබීමත් සමඟ විපක්ෂයේ දේශපාලන පක්ෂ මෙම රහසිගත සාකච්ඡා ආරම්භ කර ඇත.

ඒ අනුව ආණ්ඩු පක්ෂයේ මන්ත්‍රීවරුන් කිහිප දෙනෙකුගේ සහාය ලබා ගැනීමේ සාකච්ඡා ආරම්භ කර ඇති අතර එම මන්ත්‍රීවරුන්ගේ සහය ගැනීමට විපක්ෂයේ මන්ත්‍රී කණ්ඩායමක් පත්කර ඇති බවද වාර්තා වේ.

එම විපක්ෂ මන්ත්‍රී කණ්ඩායම සඳහා ආණ්ඩු පක්ෂයේ මන්ත්‍රීවරුන් සමඟ හිතවත් විපක්ෂ පාර්ලිමේන්තු මන්ත්‍රීවරුන් පිරිසක් එලෙස පත්කර ඇති බවද වාර්තා වේ.

හිටපු අමාත්‍ය දයා ගමගේට එරෙහිව සමෘද්ධි සේවක වෘත්තීය සමිති එකමුතුව විසින් අල්ලස් කොමිසමට පැමිණිල්ලක් ඉදිරිපත් කර ඇත.

අද (24) දින සමෘද්ධි සේවක වෘත්තීය සමිති එකමුතුව විසින් මෙම පැමිණිල්ල ඉදිරිපත් කර ඇත.

පසුගිය 2019 වසරේදී සමෘද්ධි දෙපාර්තමේන්තුවේ සිදුවූ බව කියන මූල්‍යමය අක්‍රමිකතාවයක් සම්බන්ධයෙන් මෙම පැමිණිල්ල ඉදිරිපත් කර ඇත.

ඕස්ට්‍රේලියාවේ ප්‍රමුඛ අඩු වියදම් ගුවන් සේවයක් වන “Jetstar Airways” හෙට (25) සිට පළමු වරට බණ්‌ඩාරනායක ජාත්‍යන්තර ගුවන්තොටුපළට ගුවන් ගමන් ආරම්භ කිරීමට නියමිතව ඇත.

මෙල්බර්න් සහ කොළඹ අතර සෘජු ගුවන් ගමන් ලෙස ආරම්භ වන අතර JQ5 මංගල ගුවන් යානය මෙල්බර්න් වෙතින් හෙට දහවල් 12.00ට පිටත්ව පස්වරු 5.50ට කොළඹට ළඟා වීමට නියමිතව ඇත.

අනතුරුව JQ6 ආපසු ගුවන් යානය පස්වරු 7.50ට කොළඹින් පිටත්ව පසුදින පෙරවරු 10.00ට මෙල්බර්න් වෙත ළඟා වේ.

මෙම නව ගුවන් ගමන් සතියකට තුන්වරක් අඟහරුවාදා, බ්‍රහස්පතින්දා සහ සෙනසුරාදා යන දිනයන් හි Boeing B787-8 Dreamliner ගුවන් යානා භාවිත කරමින් ක්‍රියාත්මක කරයි.

වරාය සහ සිවිල් ගුවන් සේවා අමාත්‍යාංශයේ මූලිකත්වයෙන් මෙරට ගුවන් භාණ්ඩ ප්‍රවාහන ක්‍රියාවලිය වඩාත් කාර්යක්ෂම, වේගවත් සහ විනිවිදභාවයෙන් යුතු ක්‍රියාවලියක් බවට පත් කිරීමේ අරමුණින් Air Cargo Community System (ACCS) හඳුන්වාදීම සඳහා නව වැඩපිළිවෙළක් ආරම්භ කර ඇත.

මෙම වැඩපිළිවෙළ සඳහා ගුවන් තොටුපොළ හා ගුවන් සේවා සමාගම, ශ්‍රී ලංකා රේගුව, ශ්‍රී ලංකා ආයෝජන මණ්ඩලය, ශ්‍රීලන්කන් ගුවන් සේවය, ඩිජිටල් ආර්ථික අමාත්‍යාංශය ඇතුළු අදාළ ආයතන සහ පාර්ශ්වකරුවන්ගෙන් සමන්විත බහු පාර්ශ්වකරුවන්ගේ කමිටුවක් ස්ථාපිත කර ඇත.

පසුගිය 2023 වසරේදී මෙම පද්ධතිය හඳුන්වා දීමට මූලික උත්සාහයක් ගෙන තිබුණද, සියලු පාර්ශ්වකරුවන් අතර ප්‍රමාණවත් සම්බන්ධීකරණයක් සහ එකඟතාවක් ඇති කර ගැනීමට නොහැකි වීම හේතුවෙන් එම කටයුතු ඉදිරියට ගෙන යාමට නොහැකි වී තිබුණේය.

නව රජය පත්වීමෙන් අනතුරුව අදාළ සියලු පාර්ශ්ව එකම වේදිකාවකට ගෙන එමින් එම වැඩපිළිවෙළ නැවත ක්‍රමවත් ලෙස ආරම්භ කර ඇති අතර මේ වනවිට ACCS හඳුන්වාදීමේ ශක්‍යතාව, තාක්ෂණික අවශ්‍යතා සහ ව්‍යාපාරික අවශ්‍යතා පිළිබඳ ශක්‍යතා අධ්‍යයනයක් සිදුකරමින් පවතියි.

පසුගිය 2016 වසරේ සිට 2024 වසර දක්වා කාලය තුළ පාර්ලිමේන්තුවේ මන්ත්‍රීවරුන් සහ පාර්ලිමේන්තු නිලධාරීන් විදේශ සංචාර වෙනුවෙන් රුපියල් ‌කෝටි 27කට ආසන්න මුදලක් වැය කර ඇති බව පාර්ලිමේන්තුව පිළිබද විශේෂ විගණන වාර්තාවේ දැක්වෙයි.

ඒ අනුව 2016 වසරේ සිට 2024 වසර දක්වා පාර්ලිමේන්තුවේ මන්ත්‍රීවරුන් 451 දෙනෙකු කරන ලද විදේශ සංචාර වෙනුවෙන් රුපියල් කෝටි 21 කට ආසන්න මුදලක් වැය කර තිබූ බව විශේෂ විගණන වාර්තාව සඳහන් කරයි.

තවද 2016 සිට 2024 වසර දක්වා කාලයේදී පාර්ලිමේන්තුවේ නිලධාරීන් 115 දෙනෙකු යෙදුණු විදේශ සංචාර අසූ තුනක් වෙනුවෙන් රුපියල් පන් කෝටි හැට නව ලක්ෂයකට වැඩි මුදලක් වැය කර ඇති බවද විශේෂ විගණන වාර්තාව සඳහන් කරයි.

පාර්ලිමේන්තුවේ විදේශ සබඳතා හා සන්ධාන කාර්යාලය විසින් පොදු රාජ්‍ය මණ්ඩලීය පාර්ලිමේන්තු සංගමය, අන්තර් පාර්ලිමේන්තු සංගමය, සාර්ක් පාර්ලිමේන්තු මන්ත්‍රීවරුන්ගේ සංගමය යනාදී ජාත්‍යන්තර සංගම් වෙත මෙම විදේශ සංචාර සංවිධාන කර ඇත.

එහෙත් නිලධාරීන් විදේශීය පුහුණු වැඩසටහන් සඳහා සහභාගි වීමෙන් ලබාගන්නා දැනුම හා අත්දැකීම් සන්නිවේදනය කිරීමේ විධිමත් ක්‍රමවේදයක් පාර්ලිමේන්තුවේ නොමැති බව විගණන නිලධාරින් නිරීක්ෂණය කර ඇත.

තවද, පාර්ලිමේන්තුවේ නිලධාරීන්ට වැටුප් වර්ධක ලබාදීමේදී අනෙකුත් රාජ්‍ය නිලධාරින් අභිබවා විශේෂ ප්‍රතිලාභ ලබාදීමට හේතු විගණනයේදී නිරීක්ෂණය නොවූ බවද එම වාර්තාව සඳහන් කරයි.

අතුරුදන් වූ බදුල්ල රෝහලේ විශේෂඥ වෛද්‍යවරයාගේ මළසිරුර මහියංගනය මාපාකඩවැව ප්‍රදේශය අසල ගලක් මත තිබී සොයාගෙන ඇත.

රෝහලේ නිර්වින්දන විශේෂඥ වෛද්‍යවරයා ඊයේ (23) දින උදෑසන රාජකාරියේ යෙදී සිට ඇති නමුත් ඉන් පසුව මෙලෙස අතුරුදන්ව ඇත.

සිදුකරන ලද විමර්ශන වලදී වෛද්‍යවරයාගේ මෝටර් රථය බදුල්ල – මහියංගනය ඇල මාර්ගයේ 17 කනුව මාපාකඩවැව ප්‍රදේශයේ තිබී ඊයේ රාත්‍රීයේ සොයාගත් බව පොලීසිය සඳහන් කළේය.

අනතුරුව අද (24) දින වෛද්‍යවරයා සොයා එම ප්‍රදේශයේ පොලීසිය, අපරාධ ස්ථාන නිලධාරීන් සහ යුධ හමුදාව එක්ව ඒකාබද්ධ පරීක්ෂාවක් සිදුකළ අතර එහිදී ඔහුගේ මළසිරුර සොයාගෙන ඇත.