Local news

Life Cities Development Programme – 2026 වසර සඳහා ඉදිරිපත් කරන ලද රජයේ අයවැය යෝජනාවලිය යටතේ හඳුන්වා දුන් නාගරික සංවර්ධන ක්ෂේත්‍රයේ විධිමත්, ප්‍රමුඛතාගත සහ දත්ත මත පදනම් වූ ප්‍රවේශයක් හරහා සියලු ක්ෂේත්‍රයන් ආවරණය වන පරිදි නගර සංවර්ධනය අරමුණු කරගත් මූලික වැඩසටහනක් වේ.

මෙම වැඩසටහන මගින්, පසුගිය කාලයේ ප්‍රමාණවත් සැලසුම්කරණයක්, ශක්‍යතා ඇගයීම් හා ආයතන අතර සම්බන්ධීකරණයක් නොමැතිව ක්‍රියාත්මක වූ නාගරික සංවර්ධන කටයුතු හේතුවෙන් ඇති වූ ගැටළු නිරාකරණය කිරීම අපේක්ෂාව වන අතර ඒ හරහා නගරයන් හි වූ සුවිශේෂීත්වයන් ද සලකා එම නගර දියුණු කරලීම ව්‍යාපෘතියේ ඉලක්කය වේ.

Life Cities සංවර්ධන වැඩසටහනින් 2026 වර්ෂයේදී යාපනය, මාතර, මඩකලපුව, බදුල්ල, මාතලේ, තඹුත්තේගම, වව්නියාව, හැටන්, හලාවත සහ ඇහැලියගොඩ යන නගර සංවර්ධනය කෙරේ.

එමෙන්ම මෙම ව්‍යාපෘතිය යටතේ 2027 වර්ෂය සදහා දෙහිවල, කළුතර, පානදුර, මතුගම, ගාල්ල, කෑගල්ල, බණ්ඩාරවෙල, කල්මුණේ, අකුරැස්ස, කුරුණෑගල, පුත්තලම, නාත්තන්ඩිය, රත්නපුර, ත්‍රිකුණාමලය, කන්තලේ සහ ඇල්ල යන නගර ද තෝරාගෙන ඇත.

මෙම වැඩසටහනේ ප්‍රධාන අරමුණ වන්නේ ජාතික ප්‍රතිපත්ති සමග සංවර්ධන ක්‍රියාමාර්ග සම්බන්ධ කිරීම, පහසුකම් හා සේවා සැපයුම වැඩිදියුණු කිරීම, ආර්ථික අවස්ථා වැඩිදියුණු කිරීම සහ සංචාරක ආකර්ෂණය වර්ධනය කිරීම මගින් කාර්යක්ෂම, තිරසාර හා ආයෝජන සඳහා සුදුසු නගර මධ්‍යස්ථාන නිර්මාණය කිරීමයි.

“ආණ්ඩුවට වසර දෙකයි – රටට සුබයි” යන තේමාවෙන් ජාතික ජන බලවේගය රට පුරා සංවිධාන කරන දැවැන්ත මහජන රැලි මාලාවේ පොළොන්නරු සහ අනුරාධපුර දිස්ත්‍රික්ක රැළි හෙට (12) දිනයේ සහ අනිද්දා (13) දින පැවැත්වීමට නියමිතය.

ජනාධිපති අනුර කුමාර දිසානායකගේ ප්‍රධානත්වයෙන් මෙම දැවැන්ත රැළි මාලාව පැවැත්වෙන අතර පොළොන්නරු දිස්ත්‍රික් රැළිය හෙට (12) දින පොළොන්නරු දීප උයන පරිශ්‍රයේදී පැවැත්වීමට නියමිතය.

සිර දඬුවම් නියම වී සිටින හිටපු අමාත්‍ය පියංකර ජයරත්න අල්ලස් කොමිසම විසින් ගොනුකර තිබෙන තවත් දූෂණ චෝදනා ඇතුළත් නඩුවක් සඳහා අද (11) දින කොළඹ මහාධිකරණයට ඉදිරිපත් කළේය.

මෙම නඩුව අද (11) දින කොළඹ මහාධිකරණ විනිසුරු රශන්ත ගොඩවෙළ ඉදිරියේ කැඳවනු ලැබු අතර එම අවස්ථාවේදී විත්තිකාර හිටපු අමාත්‍ය පියංකර ජයරත්නව බන්ධනාගාර නිලධාරීන් විසින් අධිකරණයට ඉදිරිපත් කර කළේය.

පසුගිය 2013 වසරේ සිවිල් ගුවන් සේවා අමාත්‍යවරයා වශයෙන් කටයුතු කරමින් සිටියදී අනීතික ලෙස වෙසක් කාඩ්පත් මුද්‍රණය කිරීම තුළින් රජයට රුපියල් 128,520 ක පාඩුවක් සිදුකළ බවට චෝදනා කරමින් අල්ලස් කොමිසම විසින් ප්‍රියංකර ජයරත්නට එරෙහිව කොළඹ මහාධිකරණය හමුවේ නඩු පවරා ඇත.

අල්ලස් කොමිසමේ නිලධාරිනිය අධිකරණයක් හමුවේ කරුණු දක්වමින් මෙම නඩුවේ සාක්ෂිකරුවකු ලෙස විමර්ශනයට සම්බන්ධ වූ නිලධාරියකු එක් කර ගැනීමට අවසර දෙන ලෙස ඉල්ලා සිටියේය.

එහෙත් විත්තිකරු වෙනුවෙන් පෙනී සිටි ජනාධිපති නීතිඥ ශවීන්ද්‍ර ප්‍රනාන්දු මෙම නඩුවේ විභාගය අවසන් අදියරට පැමිණ තිබෙන අවස්ථාවේ අලුතින් සාක්ෂිකරුවන් එක් කිරීමට අනුමැතිය පැතීම සම්බන්ධයෙන් තමන් විරුද්ධ වන බව සඳහන් කළේය.

එහෙත් අදාළ විමර්ශන නිලධාරියා මෙම නඩුවේ සාක්ෂිකරුවකු ලෙස එක් කර ගැනීමට අවසර ලබාදෙන බව මහාධිකරණ විනිසුරු රශන්ත ගොඩවෙල සඳහන් කළේය.

අදාළ සාක්ෂිකරු මාර්ගයෙන් අධිකරණයට ලේඛන ඉදිරිපත් කිරීමට අපේක්ෂා කරන්නේ නම් ඒවා අද දින සිට සතියක් තුළ විත්තිය වෙත ලබාදීමට පියවර ගන්නා ලෙසත් විනිසුරුවරයා විසින් අල්ලස් කොමිසමට නියෝග කළේය.

2013 වසරේ මැයි මස (10) වනදා සහ ජුනි මස (06) වනදා අතර කාල සීමාව තුළ සිවිල් ගුවන් සේවා අමාත්‍යවරයා වශයෙන් කටයුතු කරමින් අනීතික ලෙස වෙසක් කාඩ් පත් තුන්දහසක් මුද්‍රණය කිරීම තුළින් රජයට රුපියල් 128,520ක පාඩුවක් සිදු කිරීම තුළින් “දූෂණය” නැමති වරද සිදුකළ බවට චෝදනා කරමින් අල්ලස් කොමිසම විසින් පියංකර ජයරත්නට එරෙහිව මෙම නඩුව ගොනු කර ඇත.

සැප්තැම්බර් (22) සිට (25) දක්වා පැවැත්වීමට නියමිත මීළඟ පාර්ලිමේන්තු සතියේ කටයුතු තීරණය වූ බව පාර්ලිමේන්තුවේ මහ ලේකම් කුෂානි රෝහණදීර පැවසුවාය. කථානායක වෛද්‍ය ජගත් වික්‍රමරත්නගේ ප්‍රධානත්වයෙන් (10) රැස්වූ පාර්ලිමේන්තු කටයුතු පිළිබඳ කාරක සභාවේදී මෙම කටයුතු තීරණය වී ඇත.

පාර්ලිමේන්තුව රැස්වන මෙම සෑම දිනකම පෙ.ව 9.30 සිට පෙ.ව. 10.00 දක්වා කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර ඇත. පෙ.ව 10.00 සිට 11.00 දක්වා කාලය වාචික පිළිතුරු අපේක්ෂා කරන ප්‍රශ්න සඳහා වෙන් කර ඇති අතර පෙ.ව. 11.00 සිට 11.30 දක්වා කාලය ස්ථාවර නියෝග 27(2) යටතේ වන ප්‍රශ්න සඳහා වෙන් කර තිබේ.

මේ අනුව, සැප්තැම්බර් (22) අගහරුවාදා පෙ.ව 11.30 සිට ප.ව 5.00 දක්වා ඛනිජ තෙල් සම්පත් පනත යටතේ අංක 2497/37 දරන අති විශේෂ ගැසට් පත්‍රයේ පළ කරන ලද නියෝග සහ අපනයන කෘෂිකර්මාන්තය ප්‍රවර්ධන (සංශෝධන) පනත් කෙටුම්පත (දෙවැනි වර කියවීම) විවාදයට ගැනීමට තීරණය වී ඇත.

අනතුරුව ප.ව 5.00 ට පෞද්ගලික මන්ත්‍රී පනත් කෙටුම්පතක් වන ට්‍රෙඩ්සෝ සංවර්ධන පදනම (සංස්ථාගත කිරීමේ) පනත් කෙටුම්පත දෙවැනි වර කියවීමෙන් අනතුරුව ව්‍යවස්ථාදායක ස්ථාවර කාරක සභාව වෙත යොමු කිරීමට නියමිතව ඇත.

ඉන්පසු ප.ව 5.00 සිට ප.ව 5.30 දක්වා විපක්ෂය විසින් ගෙනෙනු ලබන සභාව කල්තබන අවස්ථාවේ යෝජනාව විවාදයට ගැනීමට නියමිතය.

සැප්තැම්බර් (23) බදාදා පෙ.ව 11.30 සිට ප.ව 5.00 දක්වා ශ්‍රී ලංකා වරලත් මාධ්‍ය වෘත්තිකයන්ගේ ආයතනය පනත් කෙටුම්පත දෙවැනි වර කියවීමේ විවාදය පැවැත්වීමටත් තීරණය කර තිබේ.

අනතුරුව ප.ව 5.00 සිට ප.ව 5.30 දක්වා සභාව කල්තබන අවස්ථාවේ ප්‍රශ්න සඳහා කාලය වෙන් කර තිබේ.

සැප්තැම්බර් (24) බ්‍රහස්පතින්දා පෙ.ව 11.30 සිට ප.ව 7.00 දක්වා විසි දෙවන ආණ්ඩුක්‍රම ව්‍යවස්ථා සංශෝධන පනත් කෙටුම්පත සහ අධිකරණ සංවිධාන (සංශෝධන) පනත් කෙටුම්පත දෙවන වර කියවීමේ විවාදය පැවැත්වීම සඳහා කාලය වෙන් කර ඇත.

ආණ්ඩුක්‍රම ව්‍යවස්ථාවේ 121 ව්‍යවස්ථාව ප්‍රකාරව මෙම පනත් කෙටුම්පත්වලට එරෙහිව ගොනුකර ඇති පෙත්සම්වලට අදාළ ශ්‍රේෂ්ඨාධිකරණ තීරණය ලබා දීමෙන් අනතුරුව එය ගරු කථානායකවරයා විසින් සභාවට නිවේදනය කිරීමට යටත්ව අදාළ දෙදින විවාදය පැවැත්වීමට එකඟත්වය පළ වී ඇත.

සැප්තැම්බර් (25) සිකුරාදා පෙ.ව 11.30 සිට ප.ව 7.00 දක්වා විසි දෙවන ආණ්ඩුක්‍රම ව්‍යවස්ථා සංශෝධන පනත් කෙටුම්පත සහ අධිකරණ සංවිධාන (සංශෝධන) පනත් කෙටුම්පත දෙවන වර කියවීමේ විවාදය දෙවැනි දිනටත් පැවැත්වීමට මෙහිදී තීරණය වී තිබේ.

ක්ලීන් ශ්‍රී ලංකා ලේකම් කාර්යාලයේ සම්බන්ධීකරණයෙන් ක්‍රියාත්මක කිරීමට නියමිත “හරිත මාවත” – “රටට හුස්මක් – මගට සෙවනක් ” මාර්ග දෙපස පැල මිලියනයක් රෝපණය කිරීමේ ව්‍යාපෘතියේ මුලික අදියර වශයෙන් මාර්ග දෙපස පැල ලක්ෂයක් රෝපණය කිරීමේ වැඩසටහන ( Roadside Tree Planting Programme ) පිළිබඳ සාකච්ඡාවක් ජනාධිපති ලේකම් ආචාර්ය නන්දික සනත් කුමානායකගේ ප්‍රධානත්වයෙන් ජනාධිපති ලේකම් කාර්යාලයේදී (10) පැවැත්විණ.

මෙම ව්‍යාපෘතිය සඳහා පුළුල් මහජන සහභාගිත්වයක් ලබා ගැනීමේ අවශ්‍යතාව පිළිබඳ මෙහිදී විශේෂ අවධානය යොමු වූ අතර මාර්ග දෙපස පදිංචි ජනතාව, පාසැල් ප්‍රජාව, පුද්ගලික අංශය හා ව්‍යවසායකත්වය සහ රාජ්‍ය ආයතනවල සක්‍රීය දායකත්වය ලබා ගැනීම පිළිබඳව දීර්ඝ ලෙස සාකච්ඡා කෙරිණි.

මාර්ග සංවර්ධන අධිකාරිය සතු A සහ B ශ්‍රේණියේ මාර්ග දෙපස, පරිසර කලාපවලට අනුකුල පැල වර්ග මේ සඳහා යොදා ගැනීම පිළිබඳව අවධානය යොමු කරමින් මුරුත, පලු, බුළු, සියඹලා , මල් ඇහැල, රජරට ඇහැල, මඟුල් කරඳ, මයිල, පිහිඹියා, මදටියා, ගොරකා, දිවුල්, ඇටඹ, නා, කොහොඹ, රොබෝසියා, කළු මැදිරිය, දං, වෙරළු, කටු අනෝදා, කොස්, අඹ, පෙතන්, මී, කුඹුක්, අටඹ, බෙලි වැනි ශාක වර්ග රැසක් මේ සඳහා යොදා ගැනීමට මෙහිදී තීරණය විය .

තවද පැල ආරක්ෂණය (Guard Mesh) සිදු කිරීම පිළිබඳවද විශේෂ අවධානය යොමු කෙරිණි.

වායු දුෂණය අවම කිරීම, හා මගීන්ට සුවදායක පරිසරයක් නිර්මාණය කිරීම අරමුණු කර ගත් මෙම ව්‍යාපෘතිය මගින් කොළඹ, ගම්පහ, කුරුණෑගල, ගාල්ල ආදී නගරවල උෂ්ණත්වය පාලනය හා සෞන්දර්ය නගා සිටුවීම අපේක්ෂා කෙරේ.

තවද බියගම , කටුනායක හා සීතාවක වැනි කාර්මික කලාපවල වායු දුෂණය වැළැක්වීම හා දුම ස්වාභාවිකව අවශෝෂණය වීමට පරිසරය නිර්මාණය කිරීම මෙම ව්‍යාපෘති සැලැස්මට අයත්ය.

මෙම දැවැන්ත ව්‍යාපෘතිය සඳහා ක්ලීන් ශ්‍රී ලංකා ලේකම් කාර්යාලය, වන සංරක්ෂණ දෙපාර්තමේන්තුව, මාර්ග සංවර්ධන අධිකාරිය, ජාතික උද්භිද විද්‍යා දෙපාර්තමේන්තුව, ශ්‍රී ලංකා යුද හමුදාව, ශ්‍රී ලංකා නාවික හමුදාව, ශ්‍රී ලංකා ගුවන් හමුදාව සහ රාජ්‍ය හා රාජ්‍ය නොවන ආයතන රැසක් එක් වීමට නියමිතය.

මෙරටට රැගෙන ආ මහා පරිමාණ මත්ද්‍රව්‍ය ජාවාරම්කරුවෙකු බව කියන ශිරාන් බාසික්ගේ පියා වන අබ්දුල් රසාක් මෙහෙමඩ් පාසික් මධ්‍යම අපරාධ විමර්ශන කාර්යාංශය විසින් අත්අඩංගුවට ගෙන ඇත.

ශිරාන් බාසික් විසින් මත්ද්‍රව්‍ය ජාවාරමෙන් උපයාගත් බව කියන රුපියල් කෝටි 03ක මුදලක් යොදාගෙන ගම්පහ ප්‍රදේශයේ සුඛෝපභෝගී නිවසක් ඔහුගේ පියාගේ නමින් මිලදී ගැනීම සම්බන්ධයෙන් සිදුකළ විමර්ශනයකදී මෙම අත්අඩංගුවට ගැනීම සිදුකර ඇත.

පළාත් සභා ඡන්දය විමසීම කුමන මැතිවරණ ක්‍රමයක් යටතේ පැවැත්විය යුතුද යන්න සොයා බලා වාර්තා කිරීම සඳහා පත් කෙරුණු පාර්ලිමේන්තු විශේෂ කාරක සභාවේ කාලය දීර්ඝ කර ඇති බව අමාත්‍ය නලින්ද ජයතිස්ස අද (11) දින පාර්ලිමේන්තුවේදි සඳහන් කළේය.

පළාත් සභා ඡන්ද විමසීම කුමන මැතිවරණ ක්‍රමයක් යටතේ පැවැත්විය යුතුද යන්න සොයා බලා වාර්තා කිරීමටත්, ඒ පිළිබඳව සිය යෝජනා සහ නිර්දේශ ඉදිරිපත් කිරීමටත් පාර්ලිමේන්තු විශේෂ කාරක සභාව විසින් නිරීක්ෂණය කරනු ලැබූ කරුණු 2026 ජනවාරි මස (06) වැනි දින පාර්ලිමේන්තුව විසින් සම්මත කරන ලද යෝජනාවක් මගින් පත් කෙරිණි.

එම කාරක සභාව ඉහත කරුණු සම්බන්ධව තවදුරටත් කරුණු පාර්ලිමේන්තුවට වාර්තා කිරීම සඳහා කාලය අවශ්‍ය වන බැවින් පාර්ලිමේන්තුවේ ස්ථාවර නියෝග 102ක ප්‍රකාරව එම කාරක සභාවේ කාලය දෙසැම්බර් (17) වැනි දින දක්වා දීර්ඝ කිරීමට පියවර ගත් බවද අමාත්‍යවරයා සඳහන් කරයි.

සිම් කාඩ්පත් භාවිතා කරමින් සිදුකරන ලද නීතිවිරෝධි ක්‍රියාවන්ගේ වැඩිවීමක් වාර්තා වී ඇති බවත් ඒ හේතුවෙන් සිමි කාඩ් පත් සමිබන්ධයෙන් ‍නියාමනයක් සිදුකරන බව විදුලි සංදේශ නියාමන කොමිෂන් සභාවේ අධ්‍යක්ෂ ජනරාල් බන්දුල හේරත් සඳහන් කරයි.

එනිසා බොහෝ දුරට 2026 වසර අවසානයේ අලුතින් සිම් ගන්න අයට සජීවී ඡායාරූපයක් සමග එම සිම් එක ගැනීමට සිදුවන බවද එම කොමිෂන් සභාවේ අධ්‍යක්ෂ ජනරාල් බන්දුල හේරත් සඳහන් කරයි.

තවද ලබන 2027 වසරේදී සියලුම දුරකථන පාවිච්චි කරන, සිම් භාවිත කරන පුද්ගලයින් සඳහා හඳුනා ගැනීම සියයට සියයක් සහතික වෙන විදියේ වැඩපිළිවෙළක් ආරම්භ කරන බවද අධ්‍යක්ෂ ජනරාල් බන්දුල හේරත් සඳහන් කරයි.

අධ්‍යක්ෂ ජනරාල් බන්දුල හේරත් සඳහන් කළේ,

“සිම් කාඩ්පත් නිකුත් කිරීමේ රෙගුලාසි අපි යාවත්කාලීන කරලා තියෙනවා. මොකද නීතිය ක්‍රියාත්මක කරන ආයතන, එනම් පොලීසිය වගේ ආයතනවලින් අපිට ඉල්ලීමක් කළා, ගිය වසර දෙක තුනක කාලයේදී සිම් කාඩ්පත් භාවිතයෙන් නීතිවිරෝධී ක්‍රියාකාරකම් ඉතාමත් වැඩිවෙලා කියලා.

ඒකට යම් ක්‍රියාමාර්ගයක් ගත යුතුයි කියලා. ඒ ආයතනත් එක්ක එකතුවෙලා සිම් රෙගුලාසි යාවත්කාලීන කරලා, විශේෂයෙන් මේක ක්‍රියාත්මක වුණ දිනයේ පටන්, බොහෝ දුරට මේ අවුරුද්ද අවසානයේ අලුතින් සිම් ගන්න අයට සජීවී ඡායාරූපයක් සමග තමයි ඒ සිම් එක ගන්න පුළුවන් වෙන්නේ.

ඒක පටන්ගත්තට පස්සේ 2027 වසරේදී සියලුම දුරකථන පාවිච්චි කරන, සිම් භාවිත කරන අය සඳහා, එනම් පාරිභෝගිකයා හඳුනා ගැනීම සියයට සියයක් සහතික වෙන විදියේ වැඩපිළිවෙළක් සිදු කරන්න කැමතියි.

මෙහිදී කිසිම වෙලාවක සාමාන්‍ය ජනතාවට මේකෙන් කිසිදු ගැටලුවක් නොවන විදිහට සහ විදේශිකයන්ටත් කිසිම විදිහකින් ගැටලුවක් නොවන විදිහට ඒක ක්‍රියාත්මක වෙනවා. වැඩිපුරම බලන්නේ මේ රටේ තියෙන නීතිවිරෝධී ක්‍රියාකාරකම් සඳහා සිම් භාවිතා කිරීම අවම කිරීම සඳහා.

රටේ මිලියන 30කට ආසන්න ප්‍රමාණයක් මේ සිම් පාවිච්චි කරනවා. ඒ ජනතාවගේ එක පැමිණිල්ලක් තමයි සේවාවේ ගුණාත්මකභාවය අඩුයි කියන එක. දැනට අපි ක්‍රියාකරන්නේ අදාළ සේවා සපයන්නන්ගේ තියෙන දත්ත මත. අපිට ඒක තවදුරටත් නිවැරදිව කියන්න බලාගැනීමට පද්ධතියක් නෑ.”

රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවකට එක්වෙමින් විදුලි සංදේශ නියාමන කොමිෂන් සභාවේ අධ්‍යක්ෂ ජනරාල් බන්දුල හේරත් මේ බව සඳහන් කරයි.