සන්ඩේ ලීඩර් පුවත්පතේ හිටපු කර්තෘ ලසන්ත වික්‍රමතුංග ඝාතනය කිරීමට හේතුව හරියටම, නිශ්චිතවම හොයාගෙන තියෙන බව අල්ලස් හෝ දූෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල් රංග දිසානායක සඳහන් කරයි.
ලසන්ත වික්‍රමතුංග ඝාතනය කිරීමට හේතුව, ශ්‍රී ලංකාවේ දූෂණයට එරෙහිව තමන්ගේ පෑන මෙහෙයවීම බවත් ඔහු පාලකයින් විසින් කරනු ලැබු දූෂණයන්ට එරෙහි වු නිසා ජීවිතය අහිමි වු බවද අධ්‍යක්ෂ ජනරාල් රංග දිසානායක සඳහන් කරයි.
අධ්‍යක්ෂ ජනරාල් රංග දිසානායක සඳහන් කළේ,
“ලසන්ත වික්‍රමතුංග මරා දැමීමට හේතුව, ඔහු ශ්‍රී ලංකාවේ දූෂණයට එරෙහිව තමන්ගේ පෑන මෙහෙයවීම. අපි ලසන්තගේ ඝාතකයෝ හරියට හොයාගෙන නෑ. අනුමැතීන් අපිට තියෙනවා. හැබැයි හරියට හොයාගෙන නෑ.
ඒ වුණාට, ලසන්තගේ ඝාතනයට හේතුව හරියට හොයාගෙන තියෙනවා. ඒක හරියටම නිශ්චිතවම හොයාගෙන තියෙනවා. ඒ තමයි ඔහු මේ රටේ සිදුවෙච්ච දුෂණයන්ට, වංචාවන්ට එරෙහි වීම.
විශේෂයෙන්ම පාලකයින් විසින් කරනු ලබන දූෂණයන්ට එරෙහි වීම. ලසන්ත එදා එරෙහි වුයේ දූෂණය අපේ රටට මොනවාද කලේ කියන එක අද අපි සියලු දෙනාටම ඔප්පු වී අවසන්.”
“මේ දූෂණයන්ට, වංචාවන්ට එරෙහිව ලසන්ත වගේ මිනිස්සූ කීපදෙනෙක් හඬ නගද්දී නිශ්ශබ්දව සිටි දස දහසක් මිනිස්සු ඊට වසර ගාණකට පස්සේ පෝලිම්වල මැරිලා වැටුණා.
එදා දූෂණයට, වංචාවට එරෙහි වෙලා නැතුව ඇහැ කණ පියන් හිටපු මිනිස්සූන්ට ගෑස් ටික, තෙල් ටික ගන්න පෝලිම් වල ඉන්න වුණේ ඒ දූෂණය හින්දා තමයි රට මේ තත්ත්වයට පත් වුණේ. මේ ආර්ථිකමය ප්‍රපාතයට සම්පුර්ණ හේතුව ඒක.
ඒක මට අද ඉතා පැහැදිලිව පේනවා අල්ලස් හෝ දූෂණ චෝදනා විමර්ශන කොමිෂන් සභාවේ තියෙන ෆයිල් වලින්. සමහර ෆයිල් නෑ. හැබැයි තියෙන ඒවගෙන්. ඒ විතරක් නෙමෙයි ශ්‍රී ලංකාවේ ශ්‍රේෂ්ඨාධිකරණය නඩු තීන්දුවකින් තීරණය කරලා තිබෙනවා නම් එක්ක වගඋත්තරකරුවන්ගේ.
ලංකාවේ ආර්ථික බිදවැටීමට හේතුව මොකක්ද කියලා. අනිවාර්යයෙන්ම එය වංචාව සහ දූෂණය. එය බලය ඇති තැනැත්තන් විසින් කරනු ලැබූ දූෂණය. එනිසා ලසන්තගේ මරණයට හේතුව නිශ්චිතයි.
කවදා හරි දවසක අද වගේ ලසන්ත ගැන මිනිස්සූ කතා කරන කොට ඔහු වෙනස්ව හිතපු එක, ඔහු දූෂණයට, වංචාවට විරුද්ධව කටයුතු කරපු එක සම්බන්ධයෙන් අද ඔහුව අගයනවා නම්, මම හිතන්නේ ඔහුගේ ජීවිතය සාර්ථක වෙලා තියෙනවා.”
“එවැනි මිනිසුන් මරා දැමීම සහ ඒ මරා දමපු මිනිසුන් සම්බන්ධයෙන් යුක්තිය ඉෂ්ට නොවීම සම්බන්ධයෙන් විශාල ගැටලුවක් තිබෙනවා. ඒකට හේතුවත්, ඒ යුක්තිය ඉෂ්ට කරන්න සැබෑ වුවමනාවක් තිබුණාද.? නැද්ද.? කියන එකයි.
විනිශ්චයකාරවරයෙක් විදිහට මම දන්නවා, අපේ නීති ක්‍රමය ඇතුලේ හොයන්නේ පුද්ගලයෙක් ඒ දේ කරාද, නැද්ද කියලා නෙමෙයි. අපේ නීති ක්‍රමය ඇතුලේ හොයන්නේ පුද්ගලයෙක් යම් විත්තිකාරයෙක්ට විරුද්ධව නඩුව ඔප්පු කරාද, නැද්ද කියලා.
ඒ පැමිණිල්ල නඩුව ඔප්පු කරන්න සාක්ෂි ඕනි. ඒ සාක්ෂි නැතුව අධිකරණයක් ඉදිරියේ යුක්තිය ඉෂ්ට කරන්න බෑ. හැබැයි යුක්තිය ඉෂ්ට කරන්න පුළුවන් අධිකරණය ඉදිරියේ විතරක් නෙමෙයි. අධිකරණය ඉදිරියේ ලසන්තට යුක්තිය ඉෂ්ට වෙලා නෑ. හේතුව සාක්ෂි හොයාගන්න බැරි නිසා.
හැබැයි ලසන්ත මැරුවේ කවුද කියලා දන්න මිනිස්සූ දන්නවා. ඒ මිනිස්සූත් දන්නවා, ඒක කරපු අයත් දන්නවා, ඒවා දන්න අයත් ඉන්නවා. ඒගොල්ලෝ බොහෝ දෙනා කට හෙල්ලුවේ නෑ. හැබැයි කවදා හරි දවසක ඒගොල්ලෝ මැරෙන වෙලාවට හරි දන්නවා, මම ලසන්ත වෙනුවෙන් යුක්තිය ඉෂ්ට කරේ නෑ කියලා. මම කියන්නේ මරපු මිනිස්සූ නෙමෙයි, ඒ මරණය ගැන දන්න මිනිස්සූ.”
