Local news

හිටපු අමාත්‍ය මර්වින් සිල්වා, හිටපු රාජ්‍ය අමාත්‍ය ප්‍රසන්න රණවීර ඇතුළු 6 දෙනෙකුට එරෙහිව අද (15) දින ගම්පහ මහාධිකරණය විසින් අධිචෝදනා භාරදීම සිදුවිය.

ගම්පහ මහාධිකරණය අංක දෙක විනිසුරු නයනා සෙනෙවිරත්න හමුවේ නඩුව අද (15) කැඳවූ අවස්ථාවේදී නීතිපතිවරයා වෙනුවෙන් පෙනී සිටි රජයේ අධි නීතිඥ සමදරී පියසේන විසින් අදාළ අධි චෝදනා පත්‍ර එක් එක් විත්තිකරු වෙනුවෙන් භාරදීම සිදුවිය.

කිරිබත්ගොඩ නගරයේ පිහිටි රජයට අයත් ඉඩමකට කූට ලේඛන සකසා විකිණීමට තැත් කිරීමේ චෝදනාව මත මර්වින් සිල්වා, ප්‍රසන්න රණවීර ඇතුළු 6 දෙනෙකුට එරෙහිව අධිචෝදනා භාරදී ඇත.

මූල්‍ය අපරාධ විමර්ශන කොට්ඨාසය විසින් හිටපු අමාත්‍ය විමල් වීරවංශගේ සහෝදරයා වන සරත් වීරවංශ අද (15) අත්අඩංගුවට ගත්තේය.

රජයේ වාහන අවභාවිත කිරීමේ සිද්ධියක් සම්බන්ධයෙන් නීතිපතිවරයාගේ උපදෙස් මත මූල්‍ය අපරාධ විමර්ශන කොට්ඨාසයේ නිලධාරීන් විසින් ඔහුව අත්අඩංගුවට ගෙන ඇත.

අනතුරුව අත්අඩංගුවට ගත් සරත් වීරවංශ කොළඹ කොටුව මහේස්ත්‍රාත් අධිකරණයට ඉදිරිපත් කිරීමෙන් අනතුරුව ලබන (22) වෙනිදා දක්වා රක්ෂිත බන්ධනාගාර ගත කිරීමට නියෝග කළේය.

මීගමුව මහා නගර සභාවේ නගරාධිපති රොබට් හීන්කෙන්ද සිය ධුරයෙන් ඉල්ලා අස්වී ඇති බව වාර්තා වේ.

සිය පෞද්ගලික හේතුවක් මත නගරාධිපති රොබට් හීන්කෙන්ද සිය ධුරයෙන් ඉල්ලා අස්වීමට තීරණය කර ඇති බව වාර්තා වේ.

ශක්තිමත් විපක්ෂයක් ගොඩනැගීම සඳහා එක්සත් ජාතික පක්ෂය සහ සමගි ජන බලවේගය එකතු විය යුතු බව හිටපු පාර්ලිමේන්තු මන්ත්‍රී නවීන් දිසානායක සඳහන් කරයි.

එනිසා එක්සත් ජාතික පක්ෂය සහ සමගි ජන බලවේගය එක්ව ශක්තිමත් විපක්ෂයක් ගොඩනැගීම වත්මන් යුගයේ අවශ්‍යතාවයක් බවද හිටපු මන්ත්‍රී නවීන් දිසානායක සඳහන් කරයි.

පක්ෂ දෙක අතර පවතින එකමුතුකම සම්න්බන්ධව රනිල් වික්‍රමසිංහ සහ සජිත් ප්‍රේමදාස අතර සාකච්ඡා සිදුව ඇති බවද නවීන් දිසානායක සඳහන් කරයි.

ඒ අනුව සියලු දෙනාගේ ඒකායන ප්‍රාර්ථනාව පක්ෂ දෙකෙහි එක්වීමත් බවත් මෙම පක්ෂ දෙක ඒකාබද්ධවී මෙරට ප්‍රධාන පෙළේ විපක්ෂය බවට පත්වීම අත්‍යවශ්‍ය කරුණක් බවද නවීන් දිසානායක සඳහන් කරයි.

අද (15) නුවරඑළියේ පැවැති මාධ්‍ය හමුවකට එක්වෙමින් නවීන් දිසානායක මේ බව සඳහන් කරයි.

මුදල් වංචාවකට අත්අඩංගුවට ගත් හිටපු අමාත්‍ය එස්.බී. දිසානායකගේ සහෝදරයා වන හිටපු පළාත් සභා මන්ත්‍රී ජයලත් බණ්ඩාර දිසානායක අද (15) නුගේගොඩ මහේස්ත්‍රාත් අධිකරණය වෙත ඉදිරිපත් කළේය.

නුගේගොඩ මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව රුපියල් මිලියන 10ක ශරීර ඇප 2ක් සහ රුපියල් 50,000ක මුදල් ඇපයක් මත ජයලත් බණ්ඩාර දිසානායක මුදාහැරීමට නියම කළේය.

තවද ජයලත් බණ්ඩාර දිසානායකට විදෙස් ගමන් තහනමක් පැනවීමට ද නුගේගොඩ මහේස්ත්‍රාත් අධිකරණය නියම කළේය.

සුරාබදු බලපත්‍රයක් ලබාදෙන බවට පවසා වීරකැටිය ප්‍රදේශයේ පුද්ගලයෙකුගෙන් රුපියල් 27,500,000ක මුදලක් වංචා කිරීම සම්බන්ධව ජයලත් බණ්ඩාර දිසානායක අද අත්අඩංගුවට ගත්තේය.

කුවේටය වෙත සහ දමාම් ජාත්‍යන්තර ගුවන් තොටුපොළ වෙත කොළඹ, කටුනායක ගුවන්තොටුපොළෙන් පිටත්ව ගිය ශ්‍රීලන්කන් ගුවන් යානා 02ක් මැදපෙරදිග යුද්ධයට මැදිව ඇත.

ඊයේ (14) දින පස්වරු 5.10ට ශ්‍රීලන්කන් ගුවන් සේවයේ U.L – 229 දරන ගුවන් යානය කුවේට් රාජ්‍යයේ සිටි ජාත්‍යන්තර ගුවන් තොටුපොළ වෙතත්, රාත්‍රී 06.36ට ශ්‍රීලන්කන් ගුවන් සේවයේ U.L – 253 දරන ගුවන් යානය දමාම් ජාත්‍යන්තර ගුවන් තොටුපොළ වෙතත් කටුනායක ගුවන් තොටුපොළෙන් පිටත්ව ගොස් ඇත.

ඉරානය විසින් මැදපෙරදිග කලාපය වෙත මිසයිල සහ ඩ්‍රෝන ප්‍රහාර මාලාවක් එල්ල කිරීමත් සමඟ කුවේට් රාජ්‍යය සහ සෞදි අරාබිය තම ගුවන් අවකාශයන් වසා දැමීමට පියවර ගෙන ඇත.

මැදපෙරදිග කලාපයේ පවතින යුදමය තත්ත්වය හමුවේ ගුවන් අවකාශය වසා දැමීම හේතුවෙන් ශ්‍රීලන්කන් ගුවන් යානා 02ක් එලෙස මැදිවී ආරක්ෂිතව ගුවන්තොටුපොළ වෙත ගොඩබැස්සවීමට නියමුවන් කටයුතු කර ඇත.

එම රටවල් බලා පිටත්ව ගිය ශ්‍රීලන්කන් ගුවන් යානා 02ක ආපසු කටුනායක වෙත පැමිණීමට අවශ්‍ය ඉන්ධන ප්‍රමාණවත් නොවීම නිසා, එම කලාපය ආසන්නයේ ඉහළ අහසේ පැය 1යි විනාඩි 10ක කාලයක් පියාසර කරමින් සිට පසුව ගුවන් කලාපය විවෘත කළ පසු මෙලෙස ගොඩබැස්වීමට කටයුතු කර ඇත.

කෙසේ වෙතත් අද (15) උදෑසන වනවිට එම ගුවන් යානා 02ක යළිත් කටුනායක ගුවන්තොටුපොළ වෙත පැමිණි බව ශ්‍රීලන්කන් ගුවන් සේවයේ ආයතනික සන්නිවේදන අංශයේ ප්‍රධානී දීපාල් පෙරේරා සඳහන් කරයි.

මෑතකදී සිදුකළ නවතම සමීක්ෂණයට අනුව ජනාධිපති අනුර කුමාර දිසානායකගේ පාලනය සහ ක්‍රියාකලාපය පිළිබඳව රටේ ජනතාවගෙන් 75.5%ක ඉහළ ප්‍රසාදයක් පවතින බව අනාවරණය වී ඇත.

දිවයිනේ දිස්ත්‍රික්ක 25ම ආවරණය වන පරිදි මැයි (23) සිට ජූනි (18) දක්වා කාලය තුළ විකල්ප ප්‍රතිපත්ති කේන්ද්‍රයේ (CPA) සමාජ දර්ශක ඒකකය මගින් මෙම සමීක්ෂණය පවත්වා ඇත.

මෙම සමීක්ෂණයට අනුව, විපක්ෂ නායක සජිත් ප්‍රේමදාසගේ ක්‍රියාකලාපය පිළිබඳව ජනතා ප්‍රසාදය පවතින්නේ 29.4%ක මට්ටමක වන අතර ඔහුගේ ක්‍රියාකලාපය පිළිබඳව 64.9%ක් අතෘප්තිය පළ කර ඇත.

“ප්‍රජාතන්ත්‍රවාදී පාලනය පිළිබඳ විශ්වාසය” මැයෙන් සිදුකළ මෙම සමීක්ෂණයට අනුව ජනාධිපති අනුර කුමාර දිසානායක කෙරෙහි වැඩිම ප්‍රසාදයක් පළ කර ඇත්තේ වතු දෙමළ ප්‍රජාව 94.4%ක් සහ මුස්ලිම් ප්‍රජාව 93.4%ක් විසිනි.

ජනාධිපතිවරයා කෙරෙහි සිංහල ප්‍රජාව අතර පවතින ප්‍රසාදය 69.9%ක් වන අතර වයස අවුරුදු (18-29) අතර තරුණ ප්‍රජාවගෙන් 81.6%ක් ජනාධිපතිවරයාගේ පාලනය පිළිබඳව සතුට පළ කර ඇති අතර ග්‍රාමීය ජනතාව අතර එම අගය 76.4%කි.

පාස්කු ප්‍රහාරය පිළිබඳ විමර්ශන සඳහා රජය ගන්නා උත්සාහය පිළිබඳව ජනතාවගෙන් 51.6%ක් සතුට පළ කරන අතර වැඩිම විශ්වාසයක් මුස්ලිම් 73.3%ක් සහ වතු දෙමළ 72.2%ක් ප්‍රජාවන් තුළ පවතින අතර සිංහල ප්‍රජාව අතර එම අගය 46.4%කි.

විධායක ජනාධිපති ක්‍රමය අහෝසි කළ යුතු බවට 64.1%ක බහුතරයක් එකඟතාව පළ කර ඇති අතර එය වහාම ආරම්භ කළ යුතු බව පවසන්නේ 23.6%ක් පමණි. ආපදා සහන සහ ප්‍රතිසංස්කරණ කටයුතු පිළිබඳව 68.6%ක් සතුට පළ කර ඇත.

තවද ජාතික ජන බලවේගය සතු කාර්යක්ෂම පාලනයක් ගෙන යාමේ හැකියාව පිළිබඳව 62.8%ක ජනතාවක් විශ්වාසය පළ කර ඇත.

කටුනායක බණ්ඩාරනායක ජාත්‍යන්තර ගුවන්තොටුපොළින් පිටත් වන ගුවන් මගීන් රැඳී සිටින පර්යන්තයේ ධාරිතාව පුළුල් කිරීම සඳහා වන යටිතල පහසුකම් සංවර්ධනය කිරීමේ ව්‍යාපෘතිය.

එම ව්‍යාපෘතිය යටතේ පරීක්ෂා කිරීමේ කවුලු 36ක් සහ මගී පර්යන්තයේ සිට ගුවන්යානා වෙත පිවිසීමේ දොරටු හයක් 06ක් සඳහා නව ගොඩනැගිල්ලක් ඉදිකිරීමේ ප්‍රසම්පාදන ක්‍රියාවලිය ක්‍රියාත්මක කිරීම පිණිස 2025-02-09 දින පැවති අමාත්‍ය මණ්ඩල රැස්වීමේදී අනුමැතිය ලබාදී ඇත.

ඒ සඳහා සුදුසු කොන්ත්‍රාත්කරුවෙකු තෝරා ගැනීම පිණිස ජාත්‍යන්තර තරගකාරී ප්‍රසම්පාදන ක්‍රමවේදය අනුගමනය කරමින් ලංසු කැඳවා ඇති අතර එහිදී ලංසු තුනක් 03ක් ලැබී ඇත.

එම ලංසු ඇගයීමෙන් අනතුරුව ඉහළ මට්ටමේ ස්ථාවර ප්‍රසම්පාදන කමිටුව විසින් ඉදිරිපත් කරනු ලැබ ඇති නිර්දේශය මත පදනම්ව, සාරානුකූල ප්‍රතිචාරාත්මක අවම ලංසුකරු වන M/s Maga Engineering (Pvt) Ltd වෙත ඇමෙරිකානු ඩොලර් මිලියන 7.26ක මුදලකට (එකතු කළ අගය මත බදු රහිත) සහ රුපියල් බිලියන 3.77ක මුදලකට (එකතු කළ අගය මත බදු රහිත) එකී කොන්ත්‍රාත්තුව පිරිනැමීමට අමාත්‍ය මණ්ඩලය අනුමත කර ඇත.

කොළඹ ෂැංග්‍රිලා හෝටලයේ බෝම්බකරු මොහොමඩ් ඉල්හාම් ප්‍රහාරයට පෙර මරාගෙන මැරෙන බවට කර ඇති ප්‍රකාශයක් ඇතුළත් හඬපටයක් (14) දින කොළඹ මහාධිකරණය ඉදිරියේ වාදනය කර එහි අන්තර්ගතය සටහන් කරගෙන ඇත.

ෂැංග්‍රිලා හෝටලයේ බෝම්බකරු මොහොමඩ් ඉල්හාම්ගේ මෙම හඬපටය දෙමළ භාෂාවෙන් කර ඇති අතර එම ප්‍රකාශය අධිකරණය ඉදිරියේ වාදනය කිරීමෙන් පසු උසාවියේ භාෂා පරිවර්තක තුවාම් සදාත් මගින් සටහන්කර ගැනිණි.

නඩුව කොළඹ මහාධිකරණ විනිසුරු රශ්මික සිංගප්පුලි ඉදිරියේ කැඳවු අතර නඩුවේ වැඩිදුර සාක්ෂි විභාගය ලබන අගෝස්තු (11) වනදා විමසීමටත්, එදින පැමිණිල්ලේ සාක්ෂිකරුවන් සිව් දෙනකුට අධිකරණය ඉදිරියේ පෙනී සිටීමට විනිසුරුවරයා නියෝග කළේය.

පාස්කු ප්‍රහාරය පිළිබඳ තොරතුරු දැනගෙන ඒවා පොලීසියට අනාවරණය නොකිරීමේ චෝදනාව යටතේ දෙමටගොඩ, මහවිල උද්‍යානයේ පදිංචි කෝටිපති ව්‍යාපාරික මොහොමඩ් ඊබ්‍රහිම් ඇතුළු විත්තිකරුවන් තිදෙනාට එරෙහි මෙම නඩුව විභාග වේ.

මොහොමඩ් ඊබ්‍රහිම් යනු, පාස්කු ප්‍රහාරයට දායක වූ මරාගෙන මැරෙන බෝම්බකරුවන් වන මොහොමඩ් ඉන්සාෆ් සහ මොහොමඩ් ඉල්හාම් යන අයගේ පියා වේ.