Local news

පොදු ප්‍රවාහනයේදී සිදුවන රිය අනතුරු වලට ප්‍රධාන හේතුව වී ඇත්තේ රියදුරන්ගේ නොසැලකිල්ල සහ වාහනවල පවතින විවිධ දුර්වලතා බව මාර්ග ආරක්ෂාව පිළිබඳව ජාතික කවුන්සිලයේ සභාපති මංජුල කුලරත්න සඳහන් කරයි.

එනිසා පොදු ප්‍රවාහන සේවා සපයන බස් රථ ඇතුළු සියලු රථවල තත්ත්ව පරීක්ෂාවක් සිදු කිරීමට තීරණය කර ඇති බවත් මෙම ක්‍රියාවලිය සැප්තැම්බර් මාසයේ සිට ආරම්භ කිරීමට බලාපොරොත්තු වන බවද එහි සභාපති මංජුල කුලරත්න සඳහන් කරයි.

බස් රථ ඇතුළු සියලු වාහනවල තත්ත්ව පරීක්ෂාව සඳහා සුදුසුකම් ලත් තාක්ෂණික නිලධාරීන් බඳවා ගැනීම වෙනුවෙන් මේ වනවිට අයදුම්පත් කැඳවා ඇති බවද එහි සභාපති මංජුල කුලරත්න සඳහන් කරයි.

අනතුරුව සැප්තැම්බර් අග වනවිට මෙම ක්‍රියාවලිය ආරම්භ කිරීමට හැකි වනු ඇති බවද එහි සභාපති මංජුල කුලරත්න සඳහන් කරයි.

සමාජයක් ලෙස අපගේ සමාජ වගකීම් නිවැරදිව ඉටු කළේ නම් ඩෙංගු මරණ මෙන්ම ජලභීතිකා මරණත් වළක්වා ගැනීමට හැකිව තිබූ බව රාජ්‍ය පරිපාලන, පළාත් සභා සහ පළාත් පාලන අමාත්‍ය මහාචාර්ය චන්දන අභයරත්න සඳහන් කරයි.

මේ වනවිට මෙරටින් ජලභීතිකා මරණ 20ක් වාර්තා වී ඇති බවත් ඉන් මරණ 04ක්ම වාර්තා වී ඇත්තේ පුත්තලම දිස්ත්‍රික්කයෙන් බව රාජ්‍ය පරිපාලන, පළාත් සභා සහ පළාත් පාලන අමාත්‍ය මහාචාර්ය චන්දන අභයරත්න සඳහන් කරයි.

මේ අතර ඩෙංගු ආසාදනයවීම හේතුවෙන් මේ දක්වා පුද්ගලයින් 53 දෙනෙකු මියගොස් ඇති බව ජාතික ඩෙංගු මර්දන ඒකකය සඳහන් කරයි.

2026 වසරේ මේ දක්වා කාලය තුළ වාර්තා වූ ඩෙංගු රෝගීන්ගේ සංඛ්‍යාව 75,321 දක්වා ඉහළ ගොස් ඇති බව ජාතික ඩෙංගු මර්දන ඒකකය සඳහන් කරයි.

බස්නාහිර පළාතෙන් රෝගීන් 39,667ක්, දකුණු පළාතෙන් රෝගීන් 11,610ක්, මධ්‍යම පළාතෙන් රෝගීන් 6,325ක් සහ සබරගමුව පළාතෙන් රෝගීන් 6,305ක් වාර්තා වී ඇති බව ජාතික ඩෙංගු මර්දන ඒකකය සඳහන් කරයි.

ජූලි මාසයේදී ගම්පහ දිස්ත්‍රික්කයෙන් රෝගීන් 15,762ක්, කොළඹ දිස්ත්‍රික්කයෙන් රෝගීන් 15,000ක් සහ මාතර දිස්ත්‍රික්කයෙන් රෝගීන් 5,280ක් හඳුනාගෙන ඇති බවද ජාතික ඩෙංගු මර්දන ඒකකය සඳහන් කරයි.

අද (19) පස්වරුවේ දක්ෂිණ අධිවේගී මාර්ගයේ වැලිපැන්න සහ කුරුඳුගහහැතැම්ම අතර 64 වෙනි කිලෝමීටර් කණුව අසල සුඛෝපභෝගී බස් රථයක් ගිනි ගැනීමකට ලක්ව ඇත.

හදිසියේ ඇති වූ කාර්මික දෝෂයක් හේතුවෙන් මෙම ගින්න හටගෙන ඇති අතර එම ගින්න හටගන්නා අවස්තාවේදි බස් රථයේ මගීන් 20 දෙනෙකු පමණ සිට ඇති බව වාර්තා වේ.

මෙම සුඛෝපභෝගී බස් රථය කොළඹ සිට ගාල්ල දක්වා ධාවනය වෙමින් තිබියදී ගිනි ගැනීම සිදුව ඇති අතර බස් රථයේ සිටි මගීන් කිසිවෙකුටත් හානියක් සිදුව නොමැත.

කිසියම් පුද්ගලයෙක් සියදිවි හානිකර ගත්තොත් එය රාජපක්ෂලා පිට පැටවීමට ඇතැම් පාර්ශව කටයුතු කරන බව ශ්‍රී ලංකා පොදුජන පෙරමුණ පාර්ලිමේන්තු මන්ත්‍රී නාමල් රාජපක්ෂ සඳහන් කරයි.

ජන හමුවක් අමතමින් මන්ත්‍රී නාමල් රාජපක්ෂ සඳහන් කළේ,

“අද ආණ්ඩුවක් විදිහට මේ රටේ මනුස්සයෝ ආරක්ෂා කරන්න ආණ්ඩුව ගත්තු ක්‍රියාමාර්ග මොනවාද. හිරේ දාන්න ක්‍රියාමාර්ග ගන්නවා. අපි දැක්කා පහුගිය දවස්වල බොරු සාක්ෂි හැදුවා. බලපෑම් කරා. සියදිවි හානි කරගැනීම් නිරන්තරයෙන් සිද්ද වෙනවා.

මේ දිනවලත් සියදිවි හානි කරගැනීම් වාර්තා වෙනවා. හැබැයි ආණ්ඩුව මේ හැම එකම ඇග බේරගන්නේ කොහොමද රාජපක්ෂලාට දාලා. මොකක්හරි දෙයක් කලොත් ඒක රාජපක්ෂලා. දැන් යුද්දෙ අවසන් කරපු එක, නෑ ඒක මහින්ද රාජපක්ෂ නෙමෙයි.

හයිවේ හැදුවේ, මොන මහින්ද රාජපක්ෂ හදපු හයිවේ එකක් නෑ. පෝට් සිටිය, නෑ ඒක රාජපක්ෂලා නෙමෙයි. ගමේ පාරවල්, ඒවත් රාජපක්ෂ ආණ්ඩුවලින් නෙමෙයි. හැබැයි කවුරුහරි සියදිවි හානි කරගත්තොත්, රාජපක්ෂලා වෙන්න ඕනේ. පිටිපස්සෙන්.”

හෙට (20) දිනයේ සිට බිත්තරයක මිල ඉහළ දැමීමට තීරණය කළ බව සමස්ත ලංකා බිත්තර නිෂ්පාදකයින්ගේ සංගමය සඳහන් කරයි.

ඒ අනුව සුදු බිත්තරයක විකුණුම් මිල රුපියල් 41ක් දක්වා ඉහළ දැමීමට තීරණය කර ඇත.

රතු බිත්තරයක විකුණුම් මිල රුපියල් 42ක් දක්වා ඉහළ දැමීමට තීරණය කර ඇත.

බිත්තර මිල ගණන් ඉහළ යාම සම්බන්ධයෙන් රජය සහ අදාළ බලධාරීන් සෘජුව වගකිව යුතු බව එම සංගමයේ සභාපති සරත් රත්නායක සඳහන් කරයි.

හොරණ එක්සත් ජාතික පක්ෂ හිටපු නාගරික මන්ත්‍රීනි සහ ආසන සංවිධායක රේනුකා දමයන්ති වත්තල පොලීසිය විසින් අත්අඩංගුවට ගෙන ඇත.

පිටකොටුවේ රෙදි පිළි ව්‍යාපාරිකයින් 6 දෙනෙකු රවටා ඔවුන්ට අගරු චෙක්පත් ලබාදී රුපියල් කෝටි 16කට ආසන්න මුදලක් වංචා කිරීම සම්බන්ධයෙන් රේනුකා දමයන්ති අත්අඩංගුවට ගෙන ඇත.

රේනුකා දමයන්ති කලක පටන් එම ව්‍යාපාරිකයින් මගහරිමින් සිට ඇති අතර ඊයේ (18) ඇය සිරිකොතට පැමිණ සිටින බවට ලද තොරතුරුක් මත එම ව්‍යාපාරිකයින් එහි ගොස් ඇත.

එහිදී ව්‍යාපාරිකයින් හා රේනුකා දමයන්ති අතර උණුසුම් තත්ත්වයක් හටගෙන ඇති අතර අනතුරුව මිරිහාන පොලිසිය මගින් ඔවුන් සියලු දෙනාම අත්අඩංගුවට ගැනීමට කටයුතු කර ඇත.

අනතුරුව පොලීසිය සිදු කරන ලද විමර්ශන වලදී අදාළ ව්‍යාපාරිකයින් විසින් ඇයට එරෙහිව ඇති පැමිණිලි ඉදිරිපත් කිරීමෙන් පසුව මිරිහාන පොලිසිය විසින් ඇය වත්තල පොලිසිය වෙත භාරදීමට කටයුතු කර ඇත.

අත්අඩංගුවට ගත් රේනුකා දමයන්ති අද (19) වත්තල වැඩබලන මහේස්ත්‍රාත් මෙරිල් බොතේජු හමුවට ඉදිරිපත් කිරීමෙන් අනතුරුව ලබන (21) වනදා දක්වා බන්ධනාගාර ගත කිරීමට නියෝග කර ඇත.