දිළිඳුකම තුරන් කර සමාජ සවිබල ගැන්වීම සහ ආර්ථික සාධාරණත්වය තහවුරු කිරීම අරමුණු කර ගනිමින් රජයේ ප්රධාන වැඩසටහන ලෙස ක්රියාත්මක “ප්රජාශක්ති” වැඩසටහනේ 2026 වසරේ ප්රගතිය සමාලෝචනය කිරීමේ සහ 2027 වසරේ සැලසුම් පිළිබඳ සාකච්ඡාවක් ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීමේ අමාත්ය උපාලි පන්නිලගේ සහ ජනාධිපති ලේකම් ආචාර්ය නන්දික සනත් කුමානායකගේ ප්රධානත්වයෙන් (24) ජනාධිපති කාර්යාලයේදී පැවැත්විණි.
“ප්රජාශක්ති” වැඩසටහන සඳහා 2026 අයවැයෙන් වෙන් කළ රුපියල් බිලියන 25න් රුපියල් බිලියන 23ක ප්රතිපාදන යොදා ගනිමින් ව්යාපෘති 23,000ක් පමණ ක්රියාත්මක කර තිබෙන බවත්, එම සියලු ව්යාපෘති මෙම වසර තුළ අවසන් කිරීමේ හැකියාව පවතින බවත් මෙහිදි අවධාරණය කෙරිණි.
එමෙන්ම, තවත් මිලියන 2,000 ක ප්රතිපාදන විශේෂ ආකෘතික ව්යාපෘති (Model Projects) සහ ව්යවසාය සංවර්ධන වැඩසටහන් සඳහා යොමු කර ඇති බවත්, එම වැඩසටහන් ඔස්සේ හඳුනා ගන්නා ව්යාපෘති ඉදිරියේදී ප්රජාශක්ති වැඩසටහන යටතේ ක්රියාත්මක කිරීමට අපේක්ෂා කරන බවත් අනාවරණය විය.
පරිපාලන කරුණු යටතේ ප්රජා සංවර්ධන සභා සඳහා ප්රජා සවිබල ගැන්වීමේ නිලධාරීන් පත් කර අවසන් කර තිබෙන බවද සාකච්ඡාවට ලක් කෙරිණි
එසේම දත්ත රැස් කිරීම් සඳහා ජන හා සංඛ්යා ලේඛන දෙපාර්තමේන්තුවට ප්රජා සවිබල ගැන්වීමේ නිලධාරීන්ගේ සහාය ලබා දීමටත්, එහිදී ග්රාමීය මට්ටමේ දත්ත සම්පාදන ක්රියාවලියට සම්බන්ධ නිලධාරීන් අතර ගැටුම් ඇති නොවන සේ කටයුතු කළ යුතු බවත් අවධාරණය කෙරිණි.
ප්රජාශක්ති ලේකම් කාර්යාලය විසින් සැලසුම් කරන ලද ක්ෂුද්ර පරිමාණ ව්යවසාය සංවර්ධන සහ ප්රවර්ධන වැඩසටහන, ප්රජා සංවර්ධනය සභා ඇගයීම් සහ ප්රවර්ධන වැඩසටහන, ධාරිතා සංවර්ධන පුහුණු මොඩියුල සකස් කිරීම සහ පුහුණුකරුවන් පුහුණු කිරීම, ප්රජාශක්ති මාර්ගෝපදේශ සංග්රහය මුද්රණය කිරීම සහ බෙදා හැරීම, ප්රජා දත්ත සම්පාදන අත්පොත මුද්රණය හා බෙදා හැරීම මෙන්ම ප්රජාශක්ති තුන් අවුරුදු උපායමාර්ගික සැලැස්මේ මූලික ව්යූහයන් සම්බන්ධයෙන්ද සාකච්ඡා කෙරුණු අතර ඒවා ක්රියාත්මක කිරීමටද එකඟතාව පළ විය.
ප්රජාශක්ති ජාතික දත්ත හා තොරතුරු පද්ධතිය සකස් කිරීම අවසන් කර ඇති අතර ඒ සඳහා දත්ත හා තොරුතුරු ඇතුළත් කිරීමට ප්රජා සංවර්ධන සභා නිලධාරීන් මෙන්ම ප්රාදේශීය ලේකම් කාර්යාලවල නිලධාරීන් කඩිනමින් යොමු කළ යුතු බවට අමාත්යවරයා මෙහිදී උපදෙස් දුන්නේය.
එළඹෙන වසරේදී ග්රාමීය සංවර්ධන සැලැස්ම (VDP) මුළුමනින්ම මෙම දත්ත පද්ධතිය මගින් සකස් කළ යුතු අතර ඒ සඳහා කඩිනමින් ප්රාදේශීය ලේකම් කාර්යාවල නිලධාරීන් යොමු කරවන ලෙසද වැඩිදුරටත් උපදෙස් දෙන ලදී.
මෙහි පළමු වැඩසටහන එළඹෙන සැප්තැම්බර් (02) සහ (03) යන දෙදින පුත්තලම දිස්ත්රික්කයෙන් ආරම්භ කිරීමට සැලසුම් කර ඇති බව ජනාධිපති ජ්යේෂ්ඨ අතිරේක ලේකම් කපිල ජනක බණ්ඩාර විසින් දැනුම් දෙන ලදී.
මෙම ඒකාබද්ධ සංවර්ධන වැඩසටහන ක්රියාත්මක කිරීමේදී ජාතික මට්ටමෙන් පවතින සමීප සම්බන්ධීකරණය ප්රජා සවිබල ගැන්වීම සහ සමාජ රැකවරණය ලබාදීම සම්බන්ධයෙන් වගකීම් දරන සියලු ආයතන අන්යෝන්ය අවබෝධයෙන් හා සම්බන්ධීකරණයෙන් ජාතික අරමුණු කරා මෙහෙයවීම ප්රජාශක්ති වැඩසටහනේ වගකීම බව ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීමේ අමාත්ය ආචාර්ය උපාලි පන්නිලගේ විසින් අවධාරණය කරන ලදී.
ප්රජාශක්ති ලේකම් කාර්යාලයේ නිලධාරින් සහ ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීමේ අමාත්යාංශයේ ප්රධානීන් සමග පැවති මෙම සාකච්ඡාවේදී ප්රජාශක්ති ව්යාපාරයේ මේ වසරේ වැඩ කටයුතු සමාලෝචනය කෙරුණු අතර, ඉදිරි වර්ෂය සඳහා වැඩසටහන් සැලසුම් කිරිම පිළිබඳවද සාකච්ඡාවට ලක්විය.
